लैव्यव्यवस्था 16

पाप देल छुटकारा अन्द दिन

1जब हारून उन येढ्ढ पारगोळ यहोवा अन्द मुंद आऊन हात्ती होगकु सोतोदुर, अदुर बाद्दा यहोवा मूसा से मातगोळ माळदुन; 2अदिक यहोवा मूसा से अंदुन, “तान वार्ट हारून से अन कि सन्दुक इन म्याकुच इन प्रायश्चितवाळा ढकनगोळ्द मुंद, न्याड्यावाळा पळदागोळ्द बुळ्क, अति पवित्र जागा दा हर समय प्रवेश माळबाळी, ईलारा सोतोदान; यतिकी ना प्रायश्चितवाळा ढकनगोळ्द म्याकुच बादल दा कांळ्सकु बिळाईन.” 3याग हारून अति पवित्र जागा दा प्रवेश माळुल आग ई रीति देल प्रवेश माळुल, मतलब पापबली इन साटी ऊंद वस्ता अक अदिक होमबली इन साटी ऊंद म्यांडा अक हुळकु बरूल.

4आव सन इन कपळा अन्द पवित्र अंगरखा, अदिक तान तन मा सनी इन कपळा अन्द जंग्या हाक्कु, अदिक सनी इन कपळा अन्द पट्टा, अदिक सनी इन कपळा अन्द पगळी कटकु प्रवेश माळुल; ईव पवित्र कपळा हूँ, अदिक आव नीर देल मय तोळुकु ईवरी हाकुल.

5बाक आंदुर इस्राएलिगोळ्द मंडली इन हात्ती टु पापबली इन साटी येढ्ढ व्हातगोळ अदिक होमबली इन साटी ऊंद म्यांडा कोमुल. 6अदिक हारून आ पापबली इन वस्ता अक जो आऊंदा साटी आदीत येर्सकु तान अदिक तान घराना अन्द साटी प्रायश्चित माळुल. 7अदिक आ येढ्ढु व्हातगोळ इक हुळकु भेंटमाळोद तम्बू उन द्वार मा यहोवा अन्द मुंद निदरूसुल; 8अदिक हारून येढ्ढु व्हातगोळ मा चिट्टीगोळ हाकुल, ऊंद चिट्ठी यहोवा अन्द साटी अदिक दुसरा अजाजेल1 उन साटी ईरूल. 9अदिक या व्हात मा यहोवा अन्द हेसुर इन चिट्टी होळुल अदरी हारून पापबली इन साटी येरसुल; 10लेकीन या व्हात मा अजाजेल उन साटी चिट्टी होळुल आव यहोवा अन्द मुंद जीत्ता निदरूसकु आगुल कि अदुर देल प्रायश्चित माळकु आगुल, अदिक अद अजाजेल उन साटी आळी दा बिटकु आगुल.

11“हारून आ पापबली इन वस्ता अक, जो आऊंदा साटी आदीत, हात्ती हुळकु बरूल, अदिक अदरी बलिदान माळकु तान अदिक तान घराना अन्द साटी प्रायश्चित माळुल. 12अदिक जो वेदी यहोवा अन्द मुंद आद, अदुर माकळव होततेला कोयलागोळ देल तुमकु धूपदान इक हुळकु, अदिक तान येढ्ढु मुट्ठीगोळ इक कुटकु सुगन्धित धूप देल तुमकु, न्याड्यावाळा परदा अन्द बुळ्क तनकु 13आ धूप इक यहोवा अन्द मुंद बेक्की दा हाकुल, यदुर देल धूप इन धुंगा साक्षीपत्र अन्द म्याकुच इन प्रायश्चित इन ढकन इन म्याकुच छासेगुल, ईला रा अद सोतोदीत; 14आग आव वस्ता अन्द रकत दा टु थ्वाळासा हुळकु पूरब इन दी प्रायश्चित इन ढकन इन म्याकुच तान बेल्लगोळ देल सिपसुल, अदिक बाक आ रकत दा टु थ्वाळासा बेल्लगोळ्द द्वारा आ ढकन उन मुंद भी येळ घन सिप्स बुळुल.”

15बाक आव आ पापबली इन व्हात इक जो साधारण जनता अन्द साटी ईत्तीत बलिदान माळकु अदुर्द रकत इक न्याड्यावाळा परदा अन्द बुळ्क तरूल, अदिक या प्रकार वस्ता अन्द रकत देल आव माळीदुन ठीक हांग अच आव व्हात इन रकत देल भी माळुल, मतलब अदरी प्रायश्चित इन ढकन इन म्याकुच अदिक आऊन मुंद सिपसुल. 16अदिक आव इस्राएली लॉकुर्द अशुध्दता, अदिक अपराधगोळ, अदिक आंदुरव सप्पा पापगोळ्द कारण पवित्र जागा अन्द साटी प्रायश्चित माळुल; अदिक भेंट माळोद तम्बु जो आंदुर सांगुळ आंदुर भाँति-भाँति इन अशुद्धता अन्द बीच ईरतद अदुर साटी भी आव हांग अच माळुल. 17जब हारून प्रायश्चित माळोर साटी अति पवित्र जागा दा प्रवेश माळुल, आगी टु यागासताका आव तान अदिक तान घराना अदिक इस्राएल इन पुरा मंडली इन साटी प्रायश्चित माळकु व्हार्या होळ बाळुल आगासताका यावारा मंळसा भेंटमाळोद तम्बू दा ईरबाळुल. 18बाक आव होटकु आ वेदी इन हात्ती जो यहोवा अन्द मुंद आन होगुल अदिक आऊन साटी प्रायश्चित माळुल, मतलब वस्ता अन्द रकत अदिक व्हात इन रकत येढ्ढु दा टु थ्वाळासा हुळकु आ वेदी इन नाकु क्वाना अन्द सींगगोळ मा हचुल. 19अदिक आ रक्ता दा टु थ्वाळासा तान बेल्लगोळ्द द्वारा येळ घन अदुर मा छिळकुसकु अदरी इस्राएली लॉकुर्द अशुध्दता बिळस्कु शुद्ध अदिक पवित्र माळुल.

बलि इन व्हात

20“याग आव पवित्र जागा अदिक भेंटमाळोद तम्बू अदिक वेदी इन साटी प्रायश्चित माळ कोंडुर बाद्दा, आग जीत्ता व्हात इक मुंद तरूल; 21अदिक हारून तान येढ्ढु कय इक जीत्ता व्हात मा ईटकु इस्राएलिगोळ्द सप्पा दुष्कर्म इन सप्पा क्याल्सागोळ, अदिक आंदुरव सप्पा अपराधगोळ, मतलब आंदुरव सप्पा पापगोळ इक अंगीकार माळुल, अदिक आंदरी व्हात इन ताल्ला मा हुळकु अदरी यावारा मंळसा अन्द कय जो ई क्याल्सा अन्द साटी तयार ईरूल सुनसान आळी दा कळुकु बिळ्स बुळुल. 22अद व्हात आंदुर सप्पा दुष्कर्म इन क्याल्सागोळ इक तान म्याकुच लादस्कु यातोदारा सुनसान जागा दा नेगुकु वोतान; इदुरसाटी आ व्हात इक आळी दा बिटबुळुल.

23“आग हारून भेंटमाळोद तम्बू दा बरूल, अदिक या सन इन कपळा गोळ इक हाक्कु आव अति पवित्र जागा दा प्रवेश माळीदुन अदरी तेगुकु अल्या ईट बुळुल. 24बाक आव यातोदारा पवित्र जागा दा नीर देल मय तोळुकु तान रोजी नव कपळा हाक्क कोमुल, अदिक व्हार्या होगकु तान होमबलि अदिक साधारण जनता अन्द होमबली इक येर्सकु तान अदिक जनता अन्द साटी प्रायश्चित माळुल. 25अदिक पापबली इन चरबी इक आव वेदी मा होताकुल. 26अदिक जो मंळसा व्हात इक अजाजेल उन साटी बिटकु बरूल आव भी तान कपळागोळ इक तोळुल, अदिक नीर देल मय तोळुल, अदिक आग आव छावनी दा प्रवेश माळुल. 27अदिक पापबली इन पाड्डा अदिक पापबलि इन व्हात इक भी अदुर रकत पवित्र जागा दा प्रायश्चित माळोर साटी पोहचुस्कु आगुल अव येढ्ढु छावनी टु व्हार्या पोहचुस्कु आगुल; अदिक अऊर तोगुल, चिच्ची, अदिक सेंगळी बेक्की दा होताक्कु आगुल. 28अदिक जो अवरी होताकुल आव तान कपळागोळ इक तोळुल, अदिक नीर देल मय तोळुल, अदिक इदुर बाद्दा आव छावनी दा प्रवेश माळुल.

प्रायश्चित इन दिन मानसोद

29“नीव लॉकुर साटी ईद सदा अन्द विधी आदीत कि सातवा तिंगुळ इन दसवा दिन इक नीव उपास माळेतीर, अदिक आ दिन यावारा, चाहे अद नीम्द खुद इन द्याश इन ईरूल चाहे नीम्द न्याड्या ईरावाळा यावारा देशी या परदेशी ईरूल, यावारा भी यातोदारा प्रकार इन क्याल्सा धंदा माळबाळुल; 30यतिकी आ दिन नीमी शुद्ध माळोर साटी नीम्द निमित्त प्रायश्चित माळकु आदीत; अदिक नीव तान सप्पा पापगोळ देल यहोवा अन्द मुंद पवित्र ठहरूसीर. 31ईद नीम्द साटी परम आराम इन दिन ठहरूसीत, अदिक नीव आ दिन उपास माळेतीर अदिक यातोदारा प्रकार इन क्याल्सा धंदा माळेतीर; ईद सदा अन्द विधी हुंद. 32अदिक जो तान आप्प उन जागा मा याजक पद इन साटी अभिषेक अदिक शुद्ध माळकु आगुल आ याजक प्रायश्चित माळुल, मतलब आव सन इन कपळा गोळ इक हाक्कु, 33पवित्र जागा, अदिक भेंटमाळोद तम्बू, अदिक वेदी इन साटी प्रायश्चित माळुल; अदिक याजक उन अदिक मंडली इन सप्पा लॉकुर साटी भी प्रायश्चित माळुल. 34अदिक ईद नीम्द साटी सदा अन्द विधी आदीत, कि इस्राएलिगोळ्द साटी हर साल ऊंद घन नीम्द पुरा पापगोळ्द साटी प्रायश्चित माळकु आगुल.” यहोवा अन्द ई आग्या अन्द अनुसार जो आव मूसा अक कोटीदुन, हारून माळदुन.