यहोशू 3

इस्राएल इन लॉकुर्द यरदन इन आप्पाटी होगोद

1यहोशू व्हातर्या येद्दुन, अदिक इस्त्राएल इन सप्पा लॉकुर यद्दुर अदिक शित्तिम इक आंदुर बिट्ट बुट्टुर. आंदुर यरदन गांगा ताका यात्रा माळदुर. आंदुर आप्पाटी होगोर से पयले यरदन गांगा मा ड्यारा हचदुर. 2अदिक मुर दिन इन बाद्दा स्याणागोळ छावनी इन बीच होगकु 3प्रजा अन लॉकुरी ईद आग्या कोट्टुर, “याग नीमी तान परमेश्वर यहोवा अन वाचा अन सन्दुक1 अदिक आ लेवी याजक जो अदरी नेगुकु काणस्यान, आग तान जागा मा टु यदकु आऊन हींद हींद नळेतीर, 4लेकीन आऊन अदिक नीम बीच दा येढ्ढ हजार कय ईट अन्तर ईरूल; नीव सन्दुक इन हाती होगबाळेतीर. ताकी नीव नोळ सकीर, कि याता हादी टु नीमी नळोद आद, यतिकी ईगासताका नीव ई हादी मा आगकु नळदिदील.” 5बाक यहोशू इस्त्राएली लॉकुर से अंदुन, “नीव तान तान इक पवित्र माळी; यतिकी नाळ इन दिशी यहोवा नीम बीच दा आश्चर्यकर्म माळ्यान.” 6आग यहोशू याजकगोळ से अंदुन, “वाचा अन सन्दुक नेगुकु लॉकुर्द मुंद मुंद नळी.” आग आंदुर वाचा अन सन्दुक नेगुकु मुंद मुंद नळदुर. 7आग यहोवा यहोशू से अंदुन, “ईंद इन दिन टु ना सप्पा इस्त्राएलगोळ हाती नींद प्रशंसा माळोद चालु माळाईन, यदुर देल आंदुर जानसुल कि ह्यांग ना मूसा अन सांगुळ ईरतोगीन हांग अच ना नीन सांगुळ भी आईन. 8अदिक नी वाचा अन सन्दुक इक नेगावाळेर याजकगोळी ईद आग्या कोळ, ‘याग नीव यरदन इन नीर इन किनारा मा पोहचुसीर, आग यरदन दा नीदुरकु ईरेतीर.’” 9आग यहोशू इस्त्राएली लॉकुर से अंदुन, “हाती बंदकु तान परमेश्वर यहोवा अन वचन केळी.” 10अदिक यहोशू अनली कुरतुन, “ईदुर देल नीव जान्स कोंडीर कि जीत्ता परमेश्वर नीम बीच दा आन, अदिक आव नीम मुंदु टु नि:सन्देह कनानीगोळी, हित्तीगोळी, हिब्बीगोळी, परिज्जीगोळी, गिर्गाशीगोळी, एमोरिगोळी, अदिक यबूसीगोळी आंदुर द्याश दा टु तेगु बुट्टान. 11केळी, सप्पा पृथ्वी नोर प्रभु अन वाचा अन सन्दुक नीम मुंद मुंद यरदन दा होगदुर मा आद. 12इदुरसाटी ईग इस्त्राएल इन गोत्रगोळ दा टु हन्नेळ मंळसागोळी नीवळुसी, आंदुर ऊंद ऊंद गोत्र दा टु ऊंद मंळसा ईरूल. 13अदिक याता समय दा पृथ्वी दाकळोर प्रभु यहोवा अन वाचा अन सन्दुक नेगावाळेर याजकगोळ काल यरदन गांगा अन नीर दा बिद्दव, आ समय यरदन इन म्याकुच टु वाहुसतेला नीर थामसेदीत, अदिक ढेर आगकु थाम्सकु ईत्तीत.” 14इदुरसाटी याग लॉकुर यरदन गांगा अन आप्पाटी होगोर साटी होट्टुर, अदिक याजक वाचा अन सन्दुक नेगुकु लॉकुर मुंद मुंद नळदुर, 15अदिक सन्दुक इक नेगावाळेर यरदन मा पोहचुसदुर, अदिक सन्दुक इक नेगावाळेर याजकगोळ काल यरदन तीर इन नीर दा मुळ्कदव, यरदन इन नीर रा कटनी इन समय इन सप्पा दिन तान तट इन म्याकुच म्याकुच वाहुसतेला ईरतद, 16आग जो नीर म्याकुच इन दी टु वाहुसकु बरताव अव हापाळ दुर, मतलब आदाम नगर इन हात्ती जो सारतान नगर इन हात्ती रूक्सकु ऊंद ढेर आगेत, अदिक दिवाल घाई येदकु ईत्त, अदिक जो नीर अराबा अन समुद्र जो मृत समुद्र भी कहलुस्तद, अदुर दी वाहुसकु होगोद, अद पुरा रीति देल वंळ्गेत; अदिक प्रजा अन लॉकुर यरीहो अन मुंद आपाटी ईळदोदुर. 17अदिक याजक यहोवा अन सन्दुक नेगुकु यरदन इन बीचोबीच होगकु जागा मा स्थिर निदुरकु ईत्तुर, आखरी दा अद सप्पा जाती अन लॉकुर यरदन गांगा अन पार आगेदुर.