यहोशू 4

स्मृति इनव हन्नेळ कल्ल

1याग आ सप्पा जाती इन लॉकुर यरदन गांगा अन आप्पाटी ईळदुर, आग यहोवा यहोशू से अंदुन, 2“लॉकुर दा टु हन्नेळ मंळसागोळी नीवळुस कोमी, हर ऊंद वंश दा टु ऊंद मंळसा निवळुसकु ईद आग्या कोळी. 3अदिक लॉकुर से अनी कि आंदुर अल यरदन गांगा दा नोळुल यल याजकगोळ नीदुरकु आर, आंदुर अल हन्नेळ कल्लगोळ ढुंढस्कु तेगुली हेळी, आ हन्नेळ कल्लगोळी तान सांगुळ वोई, आ हन्नेळ कल्लगोळी आ जागा मा ईटी येल नीव ईंद ईळ्लकी ईत्तीर.” 4आग यहोशू आ हन्नेळ मंळसागोळी, यारी आव इस्त्राएलगोळ हर ऊंद वंश दा टु नीवळुसकु थाम्सकु ईटीदुन, 5यहोशू आंदुर से अंदुन, “नीव तान परमेश्वर यहोवा अन सन्दुक इन मुंद यरदन इन बीच दा होगकु इस्त्राएलगोळ वंश इन गिनती इन अनुसार ऊंद ऊंद कल्ल नेगुकु तान तान खांदा मा ईटी, 6यदुर देल ईद नीम लॉकुर इन बीच दा चिन्ह ठहरूसुल, अदिक मुंद याग नीम चिकोर ईद केळुल, ‘ई कल्लगोळ्द येन मतलब आद?’ 7आग नीव आंदरी ईद उत्तर कोळेतीर, कि यरदन गांगा अन नीर परमेश्वर उन वाचा अन सन्दुक इन मुंद येढ्ढ भाग आगेगीदव; यतिकी याग आंदुर यरदन गांगा पार माळकु बरोर, आग यरदन गांगा अन नीर येढ्ढ भाग आगेगीदव. इदुरसाटी अव कल्लगोळ इस्त्राएल इक हमेशा अन साटी याद दिलुसावाळा ठहरूसेव.” 8यहोशू उन ई आग्या अन अनुसार इस्त्राएलगोळ माळदुर, ह्यांग यहोवा यहोशू से अंदीदुन हांग अच आंदुर इस्त्राएलीगोळ्द वंश इन गिनती इन अनुसार हन्नेळ कल्ल यरदन इन बीच दा टु नेगदुर; अदिक आंदरी तान सांगुळ वोतकु येल आंदुर थामसीदुर ईट बुट्टुर, 9यहोशू भी यहोवा अन पवित्र सन्दुक इक वयावाळेर याजक येल नीदुरकु ईरोर, अल्या यरदन गांगा अन बीच दा हन्नेळ कल्ल निदरूसदुन; अव ईंद ताका अल्या अदा जागा मा आव. 10यहोवा यहोशू उक आदेश कोटीदुन कि आव लॉकुर से अनुल कि आंदरी येन माळोद आद. अव अवा मातगोळ ईरव, यवरी अवश्य अनोर साटी मूसा यहोशू से अंदीदुन. इदुरसाटी पवित्र सन्दुक इक वयावाळेर याजक यरदन गांगा अन बीच दा आगासताका नीदुरकु ईत्तुर, यागासताका ई सप्पा क्याल्सा पुरा आगीदील, लॉकुर जल्दी माळदुर अदिक गांगा अक पार माळदुर. 11याग लॉकुर गांगा अन आप्पाटी होटोदुर आग याजक यहोवा अन सन्दुक इक हुडुकु लॉकुर मुंद बंदुन. 12अदिक रूबेनी, गादी, अदिक मनश्शे अन आर्धा वंश इन लॉकुर मूसा अन अनोद हिसाब देल युध्द इन हथियार कटकु इस्त्राएलीगोळ्द मुंद आपाटी आगेदुर; 13लगभग चालीस हजार सैनिक, जो युध्द साटी तैयार ईरोर, यहोवा अन मुंदु टु होदुर, आंदुर यरीहो अन मैदान दा पोहचुसदुर. 14आ दिशी यहोवा सप्पा इस्त्राएलीगोळ मुंद यहोशू उन महिमा वाळुसदुन; अदिक ह्यांग आंदुर मूसा अन भय मानसोर हांग अच यहोशू उन भी भय आऊन जीवन तीम मान्सतेला ईत्तुर. 15आग यहोवा यहोशू से अंदुन, 16“वाचा अन सन्दुक नेगावाळेर याजकगोळी आग्या कोळ कि यरदन दा टु व्हार्या बंदार.” 17रा यहोशू याजकगोळी आग्या कोट्टुन, “यरदन गांगा दा टु व्हार्या बरी.” 18अदिक ह्यांग अच यहोवा अन वाचा अन सन्दुक नेगावाळेर याजक यरदन गांगा दा टु व्हार्या बंदुर, अदिक आंदुरव काल जागा मा बिद्दव, आग अच यरदन गांगा अन नीर तान जागा दा बत्त, अदिक पयला घाई तटगोळ मा म्याकुच वाहुसली कुर्त. 19पयला तींगुळ इन हतवा दिशी इक प्रजा अन लॉकुर यरदन गांगा दा टु होटकु यरीहो अन पुर्वी सीमा मा गिलगाल दा तान ड्यारा हाकदुर. 20अदिक जो हन्नेळ कल्ल यरदन गांगा दा टु तेगुकु आगीदव, अवरी यहोशू गिलगाल दा निदरूसदुन. 21आग आव इस्त्राएलगोळ से अंदुन, “मुंद याग नीम चिकोर तान तान आप्प से ईद केळुल, ‘ईव कल्लगोळ्द येन मतलब आद?’ 22आग नीव आंदरी ईद हेळेतीर, ‘ई यरदन गांगा अक नाव इस्त्राएलीगोळ वंळ्गींद जागा मा नळुकु आपाटी होगीदेव.’ 23यतिकी ह्यांग नीम परमेश्वर यहोवा क्याचाँद समुद्र अक नाम आप्पाटी आगासताका नाम मुंद टु सरकुसकु वंळ्गीद ईटीदुन, हांग अच आव यरदन गांगा अन नीर भी नीम आप्पाटी आगासताका नीम मुंद टु सरकुसकु वंळ्गीद ईटदुन; 24इदुरसाटी कि पृथ्वी इन सप्पा द्याशगोळ लॉकुर जानसुल कि यहोवा अन कय ताकतवर आद; अदिक नीव हमेशा तान परमेश्वर यहोवा अन अंज्क मान्सतेला ईरी.”