परमेश्वर उन वचन
यहोशू 2
यरीहो दा यहोशू अन भेदीगोळी कळोद
नून उन पार यहोशू अदिक सप्पा लॉकुर शित्तिम दा ड्यारा हाकीदुर. यहोशू येढ्ढ गुप्तचरगोळ इक कळुदुन. यातोदारा दुसरा मंळसा अक ईद पता हतीदिल कि यहोशू ई लॉकुर इक कळीदुन. यहोशू ई लॉकुर से अंदुन, होगी अदिक प्रदेश इन जाँच माळी, इदुरसाटी आ मंळसागोळ यरीहो होदुर. आंदुर ऊंद वेश्या अन मान्या होदुर अदिक अल ईत्तुर. आ आर्त इन हेसुर राहाब ईरोद. यावारा दुसरा मंळसा यरीहो अन्द राजा से अंदुन, “इस्त्राएल इन थ्वाळासा मंळसागोळ ईंद ईळ्लकी नाम्द द्याश इन भेद ताकोमली बंदार.” इदुरसाटी यरीहो अन्द राजा राहाब उन मान्या ईद बातणी कळुदुन: “आ मंळसागोळी होतुर्सबाळी जो बंदकु नीम्द मान्ना दा ठहरूसकु आर. आंदरी व्हार्या तरी. आंदुर भेद ताकोमली नाम द्याश दा बंदार.” आ आर्त येढ्ढु मंळसागोळ इक होतुर्सुकु ईटीदुर. लेकीन आर्त अंदुर, “आंदुर येढ्ढ मंळसागोळ बंदीदुर, लेकीन ना जानसालीन कि आंदुर यल टु बंदीदुर. नगर द्वार बंद आगोद समय आंदुर मंळसागोळ द्यावगा होटोदुर. ना जानसालीन कि आंदुर यल होदुर. लेकीन अगर नीव रा़टनेरी होदीर, रा शायद आंदरी हुडु कोंडीर.” आक आंदरी मान्ना अन्द छत मा येर्सकु सन इन हुळ्लीगोळ्द ल्यालमा होतुर्सीदुर जो आक हुळ्लीगोळी छत मा जमा माळकु ईटीदुर. इदुरसाटी इस्राएल इन येढ्ढ मंळसागोळ्द खोज दा राजा अन्द मंळसागोळ होटोदुर. राजा अन्द मंळसागोळ्द द्वारा नगर बिट्टुर तुरंत बाद नगर द्वार बंद माळकु आदव. आंदुर आ जागागोळ मा होदुर यल टु लॉकुर यरदन गांगा अक पार माळतोगोर. येढ्ढु मंळसागोळ ईळ्लक इक मिंगोद तयारी दा ईरोर. लेकीन आ आर्त छत मा होदुर अदिक आक आंदुर से मात माळदुर. राहाब अंदुर, “ना जान्सतीन कि ईद द्याश यहोवा नीम्द लॉकुरी कोट्टुन. नीव नाम लॉकुरी भयभीत माळतीर. ई द्याश दा ईरावाळेर सप्पा मुंदुर नीम लॉकुर से भयभीत आर. 2नाव लॉकुर अंज्कु आयेव यतिकी नाव केळदेव कि यहोवा नीव लॉकुर्द मदत ह्यांग माळदुन. नाव केळदेव की नीव मिस्त्र टु व्हार्या बंदीर रा यहोवा क्याचाँद समुद्र इन नीर इक वंळगास बुट्टुन. नाव लॉकुर ईद भी केळदेव की नीव लॉकुर येढ्ढ एमोरी राजागोळ इक सीहोन अदिक ओग इन सांगुळ येन माळदीर नाव लॉकुर केळदेव की नीव लॉकुर यरदन गांगा अन पूर्व दा ईरावाळेर आ येढ्ढ राजागोळ इक ह्यांग नष्ट माळदीर. नाव लॉकुर आ घटनागोळ इक केळदेव अदिक हापाळ येक्कुल अंजदेव अदिक ईग नाम दा टु यावारा मंळसा ईट साहसी हैलेच कि नीव लॉकुर से लळाई माळ सकुल. यती? यतिकी नीमव परमेश्वर यहोवा म्याकुच आकाश अदिक ल्यालमा पृथ्वी इन परमेश्वर हुन. रा ईग, ना चाहसतीन कि नीव नानी वचन कोळी. ना नीम्द मदत माळदीन अदिक नीम मा दया माळदीन. इदुरसाटी यहोवा अन्द मुंद वचन कोळी कि नीव नाम परिवार मा दया माळीर. कृपया नानी अनी कि नी हिंग माळेत. नान से नीव ईद अनी कि नीव नान परिवार इक जित्ता ईर गोट्टीर आंदुर दा नान आप्प, मोय, वार्ट, आकतींगेर, अदिक आंदुर्द परिवार ईत्तीत. नीव प्रतिग्या माळी कि नीव नानी सायोर देल वाचुसीर.” आ मंळसागोळ आकिन मातगोळी मान्स कोंडुर. आंदुर अंदुर, “ नाव नीम जीवन इन साटी तान जीवन इन बाजी हच बुट्टेव. यातोदारा मंळसा अक ईद हेळबाळी कि नाव येन माळीतेव. आग याग यहोवा नाव लॉकुर इक नाम्द द्याश कोट्टान, आग नाव नीम मा दया माळेव. नीव नाम लॉकुर मा विश्वास माळ सकतीर.” आ आर्त इन मान्ना नगर इन दिवार इन बुळ्क बन्सकु ईरोद. ईद दिवार इन ऊंद हिस्सा ईरोद. इदुरसाटी आर्त खिळकी दा टु आ भेदीगोळी ईळोर साटी जाळी इन उपयोग माळदुर. आग आर्त आंदुर से अंदुर, “पहाळीगोळ मा होगी, ईदुर देल राजा अन्द मंळसागोळ नीमी हुडु सकतीदील. अल मुर दिन होचकु ईरी. राजा अन्द मंळसागोळ याग वापस बंदार आग नीव तान हादी देल होग सकतीर.” मंळसागोळ आकिन से अंदुर, “जो किर्या नी नामी तिनस्या, अदुर विषय दा नाव निर्दोष ईत्तेव. नी ईद क्याचांद जाळी इन उपयोग नाम लॉकुरी ऊळ्दकु ओळोर साटी माळेत्या. नाव लॉकुर ई द्याश दा वापस बंदेव. आ समय नी ई जाळी इक तान खिळकी देल जरूर कटकु ईटेत. नीनी तान आप्प, तान मोय, तान वार्ट, अदिक तान पुरा परिवार इक तान सांगुळ ई मान्या ईटोद बिद्दीत. नाव लॉकुर हर ऊंद मंळसा अक सुरक्षित ईट्टेव जो ई मान्ना दा ईत्तान. अगर नीम मान्ना अन्द बुळ्क यारीकारा चोट पहुचुस्तद, रा अदुर साटी नाव लॉकुर दोषी ईत्तेव. अगर नीम मान्ना टु यावारा मंळसा व्हार्या होदान, रा आव कोंदकु आग सकतान. आ मंळसा साटी नाव दोषी ईरतीदील. नाव ईद वचन नीनी कोळतेव. लेकीन अगर नी यारीकारा हेळ्या कि नाव येन माळेतेव, रा नाव तान ईद वचन देल आजाद आदेव.” आर्त उत्तर कोट्टुर, “ना इदरी स्वीकार माळतीन.” आर्त नमस्कार माळदुर अदिक आंदुर आकिन मान्ना बिट्टुर. आर्त खिळकी टु क्याचाँद जाळी कटदुर. भेदी आकिन मान्ना बिटकु पहाळीगोळ दा होटोदुर. येल आंदुर मुर दिन ईत्तुर. राजा अन्द मंळसागोळ पुरा सळक मा आंदुर्द खोज माळदुर. मुर दिन इन बाद्दा राजा अन्द मंळसागोळ खोज बंद माळ बुट्टुर. आ सिपाहीगोळ आंदरी ढुंढ्स सकीदील, रा सिपाहीगोळ नगर दा वापस होट्ट बंदुर. आग येढ्ढु भेदीगोळ यहोशू उन हात्ती वापस बरोद सुरूवात माळदुर. आ मंळसागोळ पहाळीगोळी बिट्टुर अदिक गांगा अक पार माळदुर. आंदुर नून उन पार यहोशू उन हात्ती होदुर. आंदुर जो येनारा पता हचीदुर, यहोशू उक हेळदुर. आंदुर यहोशू उक अंदुर, “यहोवा खराखुरा पुरा द्याश नाव लॉकुर इक कोट बुट्टान. आ द्याश इन सप्पा लॉकुर नाम लॉकुर से भयभीत आर.”
Source notes (2)
- Cross-reference इब्रानिगोळ 11:31; याकूब 2:25
- Cross-reference निर्गमन 14:21; गिनती 21:21-35
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.