उत्पत्ति 44

काळ्द बेळ्ली इन कटोरा

1आग आव तान मान्या अन अधिकारी इक आग्या कोट्टुन, “ई मंळसागोळ बॉरागोळ दा याट भोजन वस्तु बर सकताव आट तुमकोळी, अदिक ऊंद ऊंद मंळसा अन पैस्या अक आंदुरव बॉरा अन बाय मा ईट बुळी. 2अदिक नांद चांदी इन कटोरा श्याण वार्ट उन बॉरा अन बाय मा आऊन अन्न अन पैस्या अन सांगुळ ईट बुळी.” यूसुफ उन ई आग्या अन अनुसार आव माळदुन. 3दुसरा दिशी हापाळ व्हातर्या सप्पा वार्टुर तान गधागोळ सांगुळ तान द्याश इक वापस कळुकु आदुर. 4याग आंदुर नगर इक बिट्ट बुट्टुर, यूसुफ तान सेवक से अंदुन, “होग अदिक आ लॉकुर्द पीछा माळ. आंदरी रोक्स अदिक आंदुर से अन, ‘नाव लॉकुर नीम लॉकुर प्रती वळ्लेव ईत्तेव. लेकीन नीव लॉकुर नाम मान्या काळ्लपनी यती माळदीर? नीव लॉकुर यूसुफ उन चांदी इन कटोरा यती कदुदीर? 5येन अद ईद वस्तु आलच यदुर दा नान स्वामी आप्प आन, अदिक यदुर देल आव गुप्त मातगोळ भी माळतान? नी जो ईद माळ्या अद बुरा आद.’”

6आग आव आंदरी हुळदुन, अदिक हिंगा मातगोळ आंदुर से अंदुन. 7आंदुर आऊन से अंदुर, “हे नामव प्रभु, नी हिंग मातगोळ यती अनत्या? हिंग क्याल्सा माळेत नीन दासगोळ से दुर ईरूल. 8नोळ जो पैस्या नाम बॉरागोळ बाय मा होटीत, याग नाव अदरी कनान द्याश टु तनकु नीनी वापस कोट्टेव, आग भला, नीन स्वामी इन मान्या टु नाव यातोदारा चांदी या व्हान्ना अन वस्तु ह्यांग कदू सकतेव? 9नीन दासगोळ दा टु यारदारा हाती भी अद होट्टीत, आऊक कोंदकु आगुल, अदिक नाव भी तान आ प्रभु उन दास आगेदेव.”

10आव अंदुन, “नीम्द अच अनोद सही, यार हाती भी अद कटोरा होट्टीत आव नान दास आदान; अदिक नीव लॉकुर निर्दोष ठहरूसीर.” 11ईदुर मा आंदुर जल्दी तान तान बॉरागोळी ईळ्सकु जमीन मा ईटकु अवरी तेगुली कुरतुर. 12आग आव ढुंढ्‍सली कुरतुन, अदिक श्याणेव उन हाती टु धोड्डेव उन बॉरा ताका खोज माळदुन: अदिक कटोरा बिन्यामीन उन बॉरा दा सीक्त. 13आग आंदुर दुख दा तान तान कपळा हरदुर, अदिक तान तान गधागोळ लादस्कु नगर इक वापस होदुर.

14याग यहूदा अदिक आऊन वार्ट यूसुफ उन मान्या पोहचुसदुर, अदिक यूसुफ अल्या ईरोन, आग आंदुर आऊन मुंद जमीन मा बिद्दुर. 15यूसुफ आंदुर से अंदुन, “नीव लॉकुर ईद ह्यांग क्याल्सा माळीर? येन नीव जानसीर नान जसा मंळसा गुप्त मातगोळ इक जान्स सकतीन?”

16यहूदा अंदुन, “नाव लॉकुर तान प्रभु से येन अंदेव? नाव येन अनकु तान तान इक निर्दोष ठहरूसेव? परमेश्वर नीन दासगोळ्द अधर्म इक हुडु कोंडान. नाव, अदिक यार हाती कटोरा होटाद आव भी, नाव सप्पा तान प्रभु उन दास अच हुयेव.”

17आव अंदुन, “हिंग माळोद नान से दुर ईरूल, याता मंळसा अन हाती कटोरा होटाद, आवा नान दास आदान; अदिक नीव लॉकुर तान आप्प उन हाती कुशल देल होटोगी.”

बिन्यामीन उन साटी यहूदा अन निवेदन

18आग यहूदा आऊन हाती होगकु अनली कुरतुन, “हे नान प्रभु, नीन दास उक तान प्रभु से ऊंद मात अनोद आग्या कोळ, अदिक नीन कोप नीन दास मा भळकुस बाळुल; यतिकी नी रा फिरौन उन घाई आय. 19नान प्रभु तान दासगोळ से केळीदुन, ‘येन नीम आप्प या दुसरा वार्टुर आर?’ 20अदिक नाव नीनी उत्तर कोट्टेव, नामव ऊंद आप्प आन, आव हाळाबाट्ट आन अदिक नामव ऊंद श्याणेव वार्ट आन, नाम आप्प आऊन से हापाळ प्यार माळतान, यतिकी आऊन जनम आऊन बुळापा दा आगीत, आव आबना पार आन. नाम आप्प आऊन से हापाळ प्यार माळतान. 21आग नी नाम से अंदीद, ‘आ वार्ट उक नान हाती तरी. ना आऊक नोळोद चाहसतीन.’ 22आग नाव तान प्रभु से अंदिदेव, ‘आव पार बर सकालुन. आव तान आप्प उक बीळ सकालुन, ईदारा आऊन आप्प सोतोदान.’ 23अदिक नी तान दासगोळ से अंद, ‘अगर नीम श्याण वार्ट नीम सांगुळ बरतीदील, रा नीव नान हाती बाक बर सकतीदिल.’ 24इदुरसाटी नाव लॉकुर तान आप्प उन हाती होदेव अदिक नी जो टान प्रभु उन बारा दा अंदीद, आऊक हेळदेव.”

25“आग नाम आप्प अंदुन, ‘मात्त होगकु नाम साटी थ्वाळासा भोजन वस्तु कोंडकु तरी.’ 26अदिक नाव लॉकुर तान आप्प से अंदेव, नाव लॉकुर तान सब से श्याणेव वार्ट उन बीना होग सकालेव, शासक अंदान कि आव आगासताका नाम लॉकुरी अनाज मारतीदिल यागासताका आव नाम श्याणेव वार्ट उक नोळ कोमालुन.” 27आग नान आप्प नाव लॉकुर से अंदुन, “नीव जान्सतीर कि नान हिंग्स राहेल नानी येढ्ढ पार कोट्टुर. 28ना ऊंद पार उक दुर होग गोट्टीन अदिक आव आळी दाकळव जनावर द्वारा सोतोदुन अदिक आग टु ना आऊक नोळीदील. 29अगर नीव लॉकुर नान दुसरा पार उक नान से दुर वोतीर अदिक आऊक येनारा आगेतद रा नानी ईट दुख आदीत कि ना सोतोगाईन.”

30इदुरसाटी अगर ईग नाव तान सब से श्याणेव वार्ट उन बीना मान्नी होदेव आग नाव आप्प उक ईद नोळोद बिद्दीत, ईव श्याणेव पार नाम आप्प उन जीवन दा सब से येक्‍कुल महत्व ईटतान. 31याग आव नोळ्यान कि श्याणेव पार नाम सांगुळ हैलेच रा आव सोतोदान अदिक ईद नाम लॉकुर्द दोष ईत्तीत. नाव लॉकुर तान आप्प उन हापाळ दुख अदिक सायोद कारण आदेव. 32“ना श्याण पार उन जिम्मेदारी ताकोंडीन, ना तान आप्प से अंदीन, ‘अगर ना आऊक नीन हाती वापस तरतीदील रा नी नानी पुरा जीवन तीम दोषी ठहरूस सकत्या.’ 33इदुरसाटी ईग ना नीन से बेळतीन, अदिक नीन से प्रार्थना माळतीन कि कृपा माळकु श्याण पार उक तान वार्टगोळ सांगुळ वापस होग गोळ अदिक ना ईल ईराईन अदिक नीन दास आगाईन. 34ना तान आप्प उन हाती वापस होग सकालीन अगर नाम सांगुळ श्याणेव वार्ट ईरतीदील, ना ईद मात देल हापाळ अंजकु आईन कि नान आप्प उन सांगुळ येन आदीत.”