उत्पत्ति 43

बिन्यामीन उन सांगुळ मिस्त्र द्याश इक होगोद

1कनान द्याश दा अकाल अदिक भी भयंकर आगतेला होत. 2याग अद अनाज जो आंदुर मिस्त्र टु तंदीदुर, खतम आत आग आंदुर आप्प आंदुर से अंदुन, “मात होगकु नाम साटी येनारा अदिक भोजन वस्तु कोंडकु तरी.”

3आग यहूदा आंदुर से अंदुन, “आ मंळसा नामी चेतावनी कोटकु अंदुन, ‘अगर नीम वार्ट नीम सांगुळ बरतीदील, रा नीव नान हाती बर सकतीदील.’ 4इदुरसाटी अगर नी नाम वार्ट उक नाम सांगुळ कळ्या, आग रा नाव नीन साटी भोजन वस्तु कोंडकु तंदेव; 5लेकीन अगर नी आऊक कळुतिदील, रा नाव होगतीदील, यतिकी आ मंळसा नाम से अंदान, ‘अगर नीम वार्ट नीम सांगुळ ईरतीदील, रा नीव नान हाती बर सकतीदील.’”

6इस्त्राएल याकूब से अंदुन, “नीव लॉकुर आ मंळसा से यती अंदीर, कि नीमव दुसरा वार्ट भी आन. नीव लॉकुर नान सांगुळ ईत्ता बुरा मात यती माळदीर?” 7आंदुर अंदुर, “याग आ मंळसा नाम्द अदिक नामोर रिश्तेदारगोळ्द स्थिति इन बारा दा केळदुन, ‘येन नीमव आप्प ईगासताका जीत्ता आन?’ आग नाव ई प्रश्नगोळ अनुसार आऊन से वर्णन माळदेव; बाक नाव येन जानसेव कि आव अंदान, ‘तान वार्ट उक ईल तरी.’”

8बाक यहूदा तान आप्प इस्त्राएल से अंदुन, “आ पार उक नान सांगुळ कळी, कि नाव होटोदेव; ईदुर देल नाव, अदिक नी, अदिक नाम चिकोर सायतीदिल, बल्‍की जित्ता ईत्तार. 9ना विश्वास दिलुसतीन कि आव सुरक्षित ईत्तान. ना ईदुर्द उत्तरदायी ईराईन. अगर ना आऊक नीम हाती वापस तरतीदील रा सदा अन साटी नानी दोषी ठहरूस सकतीर. 10अगर नीव नामी पयले होग गोळाईदिर रा भोजन इन साटी नाव लॉकुर येढ्ढ यात्रागोळ ईगासताका माळ कोमायदेव.”

11आग आंदुर आप्प इस्त्राएल अंदुन “अगर सहीदा ईत्ता मात आद, रा ईद माळी; ई द्याश इन वळ्लीद वळ्लीद वस्तु दा टु येनारा तान बॉरा दा आ मंळसा अन साटी भेंट वई: ह्यांग कि थ्वाळासा ढीक, अदिक थ्वाळासा शयद, अदिक येनारा सुगन्ध द्रव्य, अदिक गन्धरस, पिस्ते, अदिक बादाम. 12बाक तान तान सांगुळ येढ्ढ गुणा येक्‍कुल पैस्या वई; अदिक जो पैस्या नीम बॉरा दा ईटकु वापस माळकु आगीदव, अवरी भी वई; आग सकतद ईद भूल देल आगीदाद. 13तान वार्ट उक भी सांगुळ हुडुकु आ मंळसा अन हाती मात्त होगी, 14अदिक सर्वशक्तिमान परमेश्वर आ मंळसा अक नीम मा दयालु माळ्यान, यदुर देल कि आव नीम दुसरा वार्ट उक अदिक बिन्यामीन उक भी बर गोळुल: अदिक अगर ना निर्वंश आगतीन रा आगगोळी.”

15आग आ मंळसागोळ अव भेंट, अदिक दुगणा पैस्या, अदिक बिन्यामीन उक भी सांगुळ हुळदुर, अदिक होट्टुर अदिक मिस्त्र दा पोहचुस्कु यूसुफ उन मुंद नीदुरदुर. 16आंदुर सांगुळ बिन्यामीन उक नोळकु यूसुफ तान मान्या अन अधिकारीगोळ से अंदुन, “आ मंळसागोळी मान्या दा तरी, यतिकी आ लॉकुर हागुल नान सांगुळ भोजन माळ्‍यार.” 17आग आव अधिकारी मंळसा यूसुफ उन अना अनुसार आ मंळसागोळी यूसुफ उन मान्या वोतुन.

18याग आंदुर यूसुफ उन मान्या पोहचुस्कु आदुर आग आंदुर आपस दा अंजकु अनली कुरतुर, “जो पैस्या पयला घन नाम बॉरागोळ दा वापस माळकु आगीदव, अदुर्दा कारण नाव बुळ्क पोहचुस्कु आगेव; कि आव मंळसा नाम मा येरूल, अदिक नामी वश दा माळकु तान दास माळ्यान, अदिक नाम गधागोळी भी कसुल.” 19आग आंदुर यूसुफ उन मान्या अन अधिकारी अन हाती होगकु मान्या अन दरवाजा मा होगकु ई प्रकार अनली कुरतुर, 20“हे नाम प्रभु, याग नाव पयला घन अन्न कोमोर साटी बंदीदेव, 21आग नाव सराय दा पोहचुस्कु तान बॉरागोळी तेरदेव, रा येन नोळदेव, कि ऊंद ऊंद मंळसा अन पुरा पुरा पैस्या आऊन बॉरा दा ईटकु आव; इदुरसाटी नाव आ पैस्यागोळी मात्त वापस तंदेव. 22अदिक दुसरा पैस्या भी भोजन वस्तु कोमोर साटी तंदेव; नाव जानसालेव कि नाम बॉरागोळ दा नामव पैस्या याव ईट कोंडीदुन.”

23आव अंदुन, “नीम्द वळ्लीद आगुल, अंजबाळी: नीम परमेश्वर, जो नीम आप्प उन भी परमेश्वर हुन, आवा नीमी नीम बॉरा दा धन कोटीदान, नीम पैस्या रा नानी सीकीगित.” बाक आव शिमोन उक तेगुकु आंदुर सांगुळ माळ बुट्टुन.

24सेवक आ लॉकुरी यूसुफ उन मान्या वोतुन. आव आंदरी नीर कोट्टुन अदिक आंदुर तान काल तोळदुर. आगासताका आव आंदुर गधागोळी तीनली चारा कोट्टुन. 25वार्टुर केळदुर कि आंदुर यूसुफ उन सांगुळ भोजन माळ्यार. इदुरसाटी आऊन साटी तान भेंट तैयार माळदुर दा हागुल ताका हतकु ईत्तुर. 26यूसुफ मान्या बंदुन अदिक वार्टुर आऊक भेंट कोट्टुर जो आंदुर तान सांगुळ तंदीदुर. आग आंदुर जमीन मा बांगकु प्रणाम माळदुर. 27यूसुफ आंदुर से आंदुर्द कुशल केळदुन. यूसुफ अंदुन, “नीम लॉकुर बाट्ट आप्प यार बारा दा नीव हेळीदीर, वळ्लेव रा आन? येन आव ईगासताका जीत्ता आन?”

28वार्टुर उत्तर कोट्टुर, “महोदय, नाम आप्प वळ्लेव आन. आव ईगासताका जीत्ता आन” अदिक आंदुर मात्त यूसुफ उन मुंद बांगदुर.

29आग यूसुफ तान वार्ट बिन्यामीन उक नोळदुन. अदिक यूसुफ अंदुन, “येन ईव नीम लॉकुरव सबसे श्याण्णेव वार्ट हुन यार्द बारा दा नीव हेळीदीर?” आग यूसुफ बिन्यामीन से अंदुन, “परमेश्वर नीन मा अनुग्रह माळुल.” 30यूसुफ खोली दा टु व्हार्या ओळतेला होदुन. यूसुफ हापाळ चाहासोन कि आव तान वार्टुर से हापाळ प्रेम माळतान. आव वर्लदुर घाई आगोन, लेकीन आव ईला चाहासोन कि आऊन वार्ट आऊक वर्लतेला नोळुल. इदुरसाटी आव तान खोली दा ओळतेला होदुन अदिक अल्या वर्लदुन. 31आग यूसुफ तान बाय तोळदुन अदिक व्हार्या बंदुन. आव तान तानीक संभाळसदुन अदिक अंदुन, “ईग भोजन माळोद समय आद.” 32आग आंदुर यूसुफ उन साटी अलग, अदिक आऊन वार्टुर साटी अलग, अदिक जो मिस्त्री आऊन सांगुळ तीन तोगोर, आंदुर साटी भी अलग भोजन वाट्सदुर; इदुरसाटी कि मिस्त्री इब्रीगोळ सांगुळ भोजन माळ सकालुर, बल्‍की मिस्त्री हिंग माळोद घृणा सम्स तोगोर. 33रा यूसुफ उन वार्ट आऊन मुंद, धोड्डेर पयले, अदिक श्याण्णेर हिंद, तान तान अवस्था अन अनुसार, क्रम देल कुर्सकु आदुर; ईद नोळकु आंदुर विस्मित आगकु आबुर दाबुर दी नोळली कुरतुर. 34आग यूसुफ तान मुंद टु भोजन वस्तुगोळ नेगु नेगुकु आंदुर हाती कळुली कुरतुन, अदिक बिन्यामीन उक तान वार्टुर से अईद गुणा भोजन वस्तु सिक्त. अदिक आंदुर आऊन सांगुळ हापाळ तिंदुर कुळदुर.