उत्पत्ति 35

याकूब उक बेतेल दा आशीष सिकोद

1आग परमेश्वर याकूब से अंदुन, “ईल टु होटकु बेतेल इक होग, अदिक अल्‍या ईर; अदिक अल परमेश्वर उन साटी वेदी माळ, याव नीनी आ समय दर्शन कोट्‍टुन या समय नी तान वार्ट एसाव उन अंज्‍क देल ओळतोग्‍या.”

2आग याकूब तान घराना, अदिक आ सप्‍पा से भी जो आऊन सांगुळ ईरोर, अंदुन, “ई समय नीम हाती जो पराया द्यावगोळ आर, आंदरी दुर माळ बुळी अदिक तान तान इक शुद्ध माळकु तान कपळा बदलुस बुळी. 3अदिक बरी, नाव ईल टु होटकु बेतेल इक होगाता; अल ना परमेश्वर उन साटी ऊंद वेदी माळाईन, याव संकट इन दिनगोळ दा नांद केळदुन, अदिक याता हादी देल ना नळु तोगीन, अदुर दा नान सांगुळ ईत्‍तुन.” 4ईद केळकु आंदुर याकूब उक सप्‍पा पराया द्याव कोट्‍ट बुट्‍टुर, जो आंदुर तान हाती ईटीदुर. ईदुर अलावा कीव इन कुण्‍डगोळ भी कोट्‍टुर. याकूब ई सप्‍पा अक आ बांज मार्र इन ल्‍यालमा नळ्‍सदुन, जो शकेम इन हाती ईरोद.

5याग आंदुर अल टु होट्‍टुर आग पुरा नगर मा परमेश्वर उन अंज्‍क बिदकु ईरोद. याऊ भी याकूब उन चिकोर्द पीछा माळीदिल. 6याकूब आ सप्‍पा मुंदुर सांगुळ जो आऊन सांगुळ ईरोर, कनान द्‍याश इन लूज नगर इक बंदुन. अद नगर इक बेतेल भी अनकु आगतद. 7अल आव ऊंद वेदी माळदुन, अदिक आ जागा अन हेसुर एल-बेतेल ईटदुन; यतिकी याग आव तान वार्ट उन अंज्‍क देल ओळतोगोन आग परमेश्वर आऊन मा अल्‍या‍ प्रगट आगीदुन. 8अदिक रिबका अक हाल कुळसावळ्‍त दाई दबोरा सोतोदुर, अदिक बेतेल इन बांज मार्र इन हाती आकी मुण्‍ण कोटकु आत, अदिक आ बांज मार्र इन हेसुर अल्‍लोनबक्‍कूत1 ईटकु आत.

9बाक याकूब उन पद्‍दनराम टु बंदुर बाद्‍दा परमेश्वर दुसरा घन आऊक दर्शन कोटकु आशीष कोट्‍टुन. 10अदिक परमेश्वर आऊन से अंदुन, “ईगास ताका रा नीन हेसुर याकूब ईत्‍त; लेकीन मुंदु टु नीन हेसुर याकूब ईरतीदील, नी इस्त्राएल कहलुस्‍या.” ई प्रकार आव आऊन हेसुर इस्त्राएल ईटदुन2. 11बाक परमेश्वर आऊन से अंदुन, “ना सर्वशक्तिमान प्रभु हुईन. नी फलुस फुलुस अदिक वाळुस; अदिक नीन से ऊंद जाती बल्‍की जातीगोळ्‍द ऊंद धोळ मंडली भी पैदा आदीत, अदिक नीन वंश दा राजा पैदा आदार.3 12अदिक जो द्‍याश ना अब्राहम अदिक इसहाक उक कोटीन, अदा द्‍याश नीनी कोळतीन, अदिक नीन हिंद नीन वंश इक भी कोळाईन.” 13आग परमेश्वर आ जागा दा, येल आव याकूब से मातगोळ माळदुन, आंदुर हाती टु म्‍याकुच येरेदुन. 14अदिक या जागा दा परमेश्वर याकूब से मातगोळ हेळदुन, अल याकूब कल्‍ल इन ऊंद खंबा नीदरूसदुन, अदिक अदुर मा अंगुर इन रास्सा अदिक जैतुन इन याण्‍णा हाक्‍क बुट्‍टुन. 15येल परमेश्वर याकूब से मातगोळ माळदुन, आ जागा अन हेसुर आव बेतेल ईटदुन.

राहेल इन मृत्‍यु

16बाक आंदुर बेतेल टु नळोद चालु माळदुर; अदिक एप्राता नगर थ्वाळासा अच दुर ईरोद कि राहेल इक पार हाळोद दुख सिकली कुर्त. 17याग आकी हापाळ दुख येळतोगोद आग दाई आकिन से अंदुर, “अंजबाळ; ईग भी नीनी पार अच आदीत.” 18आग हिंग आत कि आक सोतोदुर, अदिक जीव होळ्‍त-होळ्‍त आक आ पार उन हेसुर बेनोनी4 ईटदुर; लेकीन आऊन आप्‍प आऊन हेसुर बिन्यामीन5 ईटदुन.

19अदिक राहेल सोत्‍तुर, अदिक एप्राता, मतलब बैतलहम हादी दा, आकी मुण्‍ण कोटकु आत. 20अदिक याकूब आकिन कब्र मा ऊंद खंबा नीदरूसदुन: राहेल इन कब्र अन अद खंबा ईंद ताका बन्सकु आद. 21बाक इस्त्राएल तान यात्रा चालु माळदुन अदिक एदेर हेसुर इन गुम्‍मट इन मुंद तान ड्‍यारा नीदरूसदुन.

याकूब उन पारगोळ

(१ इतिहास 2:1,2)

22याग याकूब आ द्‍याश दा ईरोन, आग ऊंद दिशी हिंग आत कि रूबेन होगकु तान आप्‍प उन रखैल बिल्हा अन सांगुळ कुकर्म माळदुन; अदिक ईद मात इस्त्राएल उक मालुम आत.

याकूब उक हनुन पारगोळ ईरोर. 23अदुर दा टु लियाह अन चिकोर ईंदुर ईरोर; मतलब याकूब उन धोळ पार रूबेन, बाक शिमोन, लेवी, यहूदा, इस्साकार, अदिक जबूलून. 24अदिक राहेल इन चिकोर ईंदुर ईरोर; मतलब यूसुफ, अदिक बिन्यामीन. 25अदिक राहेल इन दासी बिल्हा अन चिकोर ईंदुर ईरोर; मतलब दान, अदिक नप्ताली. 26अदिक लियाह अन दासी जिल्‍पा अन चिकोर ईंदुर ईरोर : मतलब गाद, अदिक आशेर. याकूब उन इंदुर अच चिकोर आदुर, जो आऊन से पद्‍दनराम क्षेत्र दा पैदा आदुर.

इसहाक उन मृत्‍यु

27अदिक याकूब मम्रे दा, जो किर्यतर्बा, मतलब हेब्रोन हुन, येल अब्राहम अदिक इसहाक परदेशी आगकु ईतीदुर, तान आप्‍प इसहाक उन हाती बंदुर.6 28इसहाक उन ऊमर ऊंद सौ अस्‍सी वर्ष इन आत. 29अदिक इसहाक उन जीव बीटोत, अदिक आव सोतोदुन, अदिक आव बाट्‍ट अदिक पुरा ऊमर इन आगकु तान लॉकुर दा होगकु सीकेदुन; अदिक आऊन पार एसाव अदिक याकूब आऊक मुण्‍ण कोट्‍टुर.