परमेश्वर उन वचन
उत्पत्ति 34
दीना अक भ्रष्ट माळकु आगोद
ऊंद दिशी लियाह अन पोर दीना, जो याकूब से पैदा आगीदुर, आ द्याश इन पोरगोळ से मुलाखात माळली होट्टुर. आग आ द्याश इन प्रधान हिब्बी हमोर उन पार शकेम आकी नोळदुन, अदिक आकी वोतकु आकिन सांगुळ कुकर्म माळकु आकी भ्रष्ट माळ बुट्टुन. आग आऊन मन याकूब उन पोर दीना से हत्तेत. अदिक आव आ पोर इन से प्रेम इन मातगोळ माळदुन, अदिक आकिन से प्रेम माळली कुरतुन. शकेम तान आप्प हमोर से अंदुन, “नान मदा ई पोर इन से माळकु कोळ.”
याग याकूब उक पता हत्त कि शकेम आऊन पोर दीना अक खराब माळ बुटान, आ समय आऊन पारगोळ जनावरगोळ सांगुळ मैदान दा ईरोर; इदुरसाटी याकूब आंदुर बरासताका सुंगा ईत्तुन. आग शकेम उन आप्प हमोर याकूब उन सांगुळ मातकात माळोरसाटी आऊन हाती होदुन. याकूब उन पारगोळ ईद केळतेला अच मैदान टु हापाळ उदास अदिक सिट्ट दा बंदुर; यतिकी शकेम याकूब उन पोर इन सांगुळ कुकर्म माळकु इस्त्राएल इन घराना टु मूर्खता अन हिंग क्याल्सा माळीदुन, यदुर्द माळोद बराबर ईला ईरोद. हमोर आ सप्पा से अंदुन, “नान पार शकेम उन मन नीन पोर मा हापाळ आद, इदुरसाटी नीन पोर इक आऊन हिंग्स उन रूप दा आऊक कोटबुळ. नाम सांगुळ वैवाहिक संबंध माळ कोमी नीव नामी तान पोरगोळ कोळी अदिक नाम पोरगोळ नीव ईटी. ई प्रकार नीव नाम सांगुळ ई द्याश दा मिलुस्कु ईर सक्कीर; नीव ई द्याश दा ईरी, धंधा माळी अदिक संपत्ती हासील माळतेला ईरी.”
अदिक शकेम भी दीना अन आप्प अदिक वार्टुर से अंदुन, “अगर नान मा कृपा दृष्टी माळेतीर, रा जो येनारा नीव नान से अंदीर, अद ना कोळाईन. नीव पोर इन साटी जो भी किमत बेळीर अदरी ना पुरा माळाईन. लेकीन नान मदा आ पोर इन से अच माळी.”
आग ईद सोचकु कि शकेम आंदुर आकतींग दीना अक खराब माळदुन, याकूब उन पारगोळ शकेम अदिक आऊन आप्प हमोर उक छल इन सांगुळ ईद उत्तर कोट्टुर, “नाव हिंग क्याल्सा माळ सकालेव कि यातोदारा खतनारहित मंळसा अक तान आकतींग इक कोट्टेव; यतिकी हिंग माळदुर देल नामी हेसुर हुळदार. ई मात मा नाव नीम्द मांन्स कोंडेव कि नाम घाई नीम दा टु हर ऊंद मंळसा अन खतना माळकु आगुल. आग नाव तान पोरगोळ नीमी मदा साटी कोट्टेव, अदिक नीम सांगुळ बसुस्कु भी ईत्तेव, अदिक नाव येढ्ढु ऊंद अच समुदाय इन मंळसा आगेदेव. लेकीन अगर नीव नाम मात ईला केळकु तान खतना माळसुसतीदिल, रा नाव तान पोर इक हुडुकु ईल टु होटोदेव.”
आंदुर्द ई मातगोळ मा हमोर अदिक आऊन पार शकेम खुश आदुन. अदिक आ हारोदव जो याकूब उन पोर इक चाहासोन, ई क्याल्सा अक माळदुर दा आव समय माळीदिल. आव रा तान आप्प उन सप्पा घराना दा येक्कुल सम्मानीत मंळसा ईरोन.
इदुरसाटी हमोर अदिक आऊन पार शकेम तान नगर इन फाटक इन हाती होगकु नगरवासीगोळी ईद समझुसली कुरतुर; “ई मंळसागोळ रा नाम सांगुळ मेल देल ईरोद चाहसतार; लेकीन आंदरी ई द्याश दा ईतकु लेन देन माळगोळी; नोळी, ईद द्याश आंदुर साटी भी हापाळ आद; बाक नाव लॉकुर आंदुर पोरगोळी हिंग्स माळ सकतेव, अदिक तान पोरगोळ आंदरी कोळ सकतेव. ईंदुर ऊंद अच मात मा नाम सांगुळ ईरोर साटी सहमत आग्यार, कि नाम सप्पा मंळसागोळ्द खतना माळकु आगुल, ह्यांग आंदुर्द माळकु आगतद कि नाव सप्पा मुंदुर ऊंद आगेगुल. येन आंदुरव मर्र म्यांडा, अदिक वस्ता गोसी बल्की आंदुरव सप्पा जनावर अदिक धन-संपत्ती नाम्द आगतीदील? ईटा माळी कि नाव लॉकुर आंदुर्द मात मान्स कोंडेव, रा आंदुर नाम सांगुळ निसास माळली कुरतार.” इदुरसाटी यास भी आ नगर इन फाटक टु होळतोगोर, आ सप्पा मुंदुर हमोर उन अदिक आऊन पार शकेम उन मात मान्सदुर; अदिक हर ऊंद मंळसा अन खतना माळकु आत, यास आ नगर इन फाटक टु होळ तोगोर.
तीसरा दिशी, याग आ लॉकुर दुख दा बिदकु ईरोर, आग हिंग आत कि शिमोन अदिक लेवी याकूब उन येढ्ढु पारगोळ, जो दीना अन वार्टुर ईरोर, तान-तान तलवार हुडुकु आ नगर दा बेधळक होगकु सप्पा मंळसागोळी घात माळदुर. हमोर अदिक आऊन पार शकेम उक आंदुर तलवार देल कोंद बुट्टुर, अदिक दीना अक शकेम उन मान्या टु तेगुकु ओतुर. अदिक याकूब उन दुसरा चिकोर नगर इक लुट्स बुट्टुर, यतिकी आंदुर आऊनोर आकतींग इक खराब माळ बुटीदुर. आंदुर मर्र म्यांडा, अदिक वस्ता गोसी, अदिक गधागोळ, अदिक नगर अदिक मैदान दा जो येनारा ईरोद सप्पा हुडु कोंडुर. आंदुर आंदुर्द सप्पा संपत्ती मा अधिकार माळकु अदरी लुट्स बुट्टुर, ईल ताका कि आंदुर आंदुरोर हिंग्सुरी अदिक आंदुर चिकोरी बंदी माळकु सप्पा येनारा जो आंदुर मान्यागोळ दा ईरोद, लुट्स बुट्टुर.
आग याकूब शिमोन अदिक लेवी से अंदुन, “नीव जो ई द्याश इन निवासी कनानीगोळ अदिक परिज्जी अन मन दा नान प्रती सिट्ट पैदा माळीर, ईदुर देल नीव नानी मुसीबत दा हाकदीर, यतिकी नान सांगुळ रा थ्वाळासा अच लॉकुर आर, इदुरसाटी आंदुर जमा आगकु नान मा चळाई माळ्यार, अदिक नानी कोंद बुट्टार, रा ना तान घराना अन्द सांगुळ नाश आगेगाईन.”
आंदुर अंदुर, “येन शकेम उक नाम आकतींग इन सांगुळ वेश्या अन घाई व्यवहार माळोद वळ्लीद ईरोद?”
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.