परमेश्वर उन वचन
उत्पत्ति 18
इसहाक उन जनम इन प्रतिग्या
याग अब्राहम हागुल इन कळकळास्त बिसुल दा तान ड्यारा अन दरवाजा मा कुर्तकु ईरोन आग यहोवा मम्रे अन बांज मार्र इन हाती आऊन मुंद प्रकट आदुन. अदिक याग आव तान कण्ण म्याकुच नेगदुन रा नोळदुन कि मुर मंळसा नान मुंद नीदुरकु आर. आंदरी नोळकु आव आंदुर से सीकली ड्यारा अन दरवाजा टु ओळदुन, अदिक जमीन मा बिदकु आव प्रणाम माळदुन, अदिक अंदुन, “नान प्रभु, अगर नान मा नींद कृपा दृष्टि आद रा तान दास उन हाती टु हिंग अच होगबाळेत. थ्वाळासा नीर तनकु आगुल यदुर देल कि नीव लॉकुर तान काल तोळकु ई मार्र इन ल्यालमा आराम माळी. नीव रा तान दास उन मान्या बंदीर, इदुरसाटी ना येनारा रोट्टीगोळ तराईन कि नीव तीनकु तृप्त आगी, अदुर बाद्दा नीव होटोगेतीर.”
आंदुर अंदुर, “ह्यांग नी अंद हांग अच माळ.”
अब्राहम ड्यारा दा सारा अन हाती जल्दी होगकु अंदुन, “तुरन्त हत्त किलो मैदा हुडुकु काल्सकोम अदिक रोट्टी माळ.” बाक अब्राहम वस्ता-वाळी इन झुंड दी ओळदुन अदिक ऊंद कोमल अदिक वळ्लीद पाड्डा हुडुकु तान सेवक उक कोट्टुन, अदिक आव अदरी जल्दी से बेईसदुन. आग आव हाल अदिक दही अदिक पाड्डा अन मास, जो आव बेईसुसीदुन, आंदुर मुंद वाट्स बुट्टुन; अदिक खुद मार्र इन ल्यालमा आंदुर हात्ती नीदुरकु ईत्तुन, अदिक आंदुर तीनली कुरतुर.
आंदुर आऊन से केळदुर, “नीन हिंग्स सारा येल आर?”
आव अंदुन, “आक रा ड्यारा दा आर.”
आव अंदुन, “ना ब्यासक्या अन दिनगोळ दा सही दा नीन हात्ती मात्त बराईन, अदिक नीन हिंग्स सारा अक ऊंद पार पैदा आदान.”
सारा ड्यारा अन दरवाजा मा जो अब्राहम उन हिंद ईरोर, केळोर. अब्राहम अदिक सारा येढ्ढु मुंदुर हापाळ हाळाबाट्ट आगेगीदुर; अदिक सारा अन व्हार्या आगोद बंद आगेगीत. इदुरसाटी सारा मन दा नेगकु अनली कुरतुर, “ना रा हाळामुंड आईन, अदिक नान गांड भी हाळाबाट्ट आन, रा येन नानी ईद सुख आदीत?”
आग यहोवा अब्राहम से अंदुन, “सारा ईद अनकु येती नेगदुर कि ना जो ईट हाळामुंड आईन, येन सही दा जनम कोळ सकाईन? येन यहोवा अन साटी येनारा भी क्याल्सा कठीण आद? ना सही समय मा मतलब सामने वर्ष ईदा समय नीन हात्ती मात बराईन अदिक सारा अन मोगुल दा ऊंद पार ईत्तान.”
आग सारा अंज्क इन मारा ईद अनकु तान मय तेगदुर, “ना नेगीदिल.”
आव अंदुन, “ईला नी रा नेगीद.”
सदोम इन बचाव इन विनती
बाक आ मंळसागोळ अल टु नळदुर अदिक सदोम इन दी नोळदुर; अदिक अब्राहम आंदरी सार माळोर साटी आंदुर सांगुळ सांगुळ नळदुन. आग यहोवा अंदुन, “ईद जो ना माळतीन, अदरी येन ना अब्राहम से होचकोमकु ईटाईन? अब्राहम से रा सही दा ऊंद धोळ्द अदिक सामर्थी जाती पैदा आदीत, अदिक पृथ्वी इन सप्पा जातीगोळ आऊन द्वारा आशीष सिक्कीत. यतिकी ना जान्सतीन कि आव तान चिकोरी अदिक परिवार इक, जो आऊन हिंद ईतोदार, आग्या कोट्टान कि आंदुर यहोवा अन हादी दा अटल बन्सकु ईरूल, अदिक धर्म अदिक न्याय माळतेला ईरूल; ताकी जो येनारा यहोवा अब्राहम उन बारा दा अंदान अदरी पुरा माळुल.”
बाक यहोवा अंदुन, “सदोम अदिक गमोरा अन चिल्ळासोद वाळुसीग्याद, अदिक आंदुर्द पाप हापाळ भारी आगेग्याद; इदुरसाटी ना ईळुकु नोळाईन कि अदुर घाई चिल्ळासोद नान कीव ताका पोहचुस्याद, आंदुर ठीक हांग अच क्याल्सा माळ्यार कि ईला; अदिक ईला माळीदार रा ना अदरी जान्स कोमाईन.”
आग आ मंळसागोळ अल टु तिर्गकु सदोम इन दी होगली कुरतुर; लेकीन अब्राहम यहोवा अन मुंद नीदुरकु ईत्तुन. आग अब्राहम आऊन हात्ती होगकु अनली कुरतुन, “येन नी सही दा दुष्ट उन सांगुळ धर्मी इन भी नाश माळ्या? अगर आ नगर दा पचास मंळसा धर्मी ईरूल, रा येन नीव आ नगर इक नाश माळीर? येन आ पचास धर्मीगोळ कारण बाकी सप्पा लॉकुर ऊळु सकालुर? ई प्रकार इन क्याल्सा माळोद नीम से दुर ईरूल दुष्ट मंळसा अन सांगुळ धर्मी मंळसा अक कोंद कोमोद, बुरा अदिक धर्मी इन सांगुळ ऊंद घाई व्यवहार माळोद. हिंग माळोद नीम से दुर ईरूल! येन सप्पा पृथ्वी इन न्यायी न्याय माळतीदील?”
यहोवा अंदुन, “अगर नानी सदोम शहर दा पचास धर्मी मंळसा सीकतार, रा ना आंदुर कारण पुरा शहर इक बिट बुळाईन.”
अब्राहम मात अंदुन: “हालाकी ना सिर्फ मुण्ण अदिक राख हुईन, तरी भी ना प्रभु से मात माळोद हिम्मत माळीन, अगर अल पचास दा टु अईद धर्मी कम आगेदार, रा येन नीव अईद धर्मी कम आगदुर कारण पुरा नगर इन नाश माळीर?”
यहोवा उत्तर कोट्टुन, “अगर नानी अल पैतालीस भी सीकतार, रा ना आ नगर इक नाश माळतीदील.”
ऊंद घन मात अब्राहम यहोवा से अंदुन, “अगर अल चालीस अच धर्मी सीक्यार रा?”
यहोवा उत्तर कोट्टुन, “आ चालीस इन कारण भी ना नाश माळतीदील.”
आग अब्राहम अंदुन, प्रभु नान मा नाराज आगबाळ, “लेकीन नानी माताळगोळ. अगर अल तीस अच धर्मी सीक्यार रा?” यहोवा उत्तर कोट्टुन, “अगर नानी अल तीस भी सीकतार रा नाश माळतीदील.”
आग अब्राहम अंदुन, “प्रभु, ना नीम से मात माळोद रा हिम्मत माळ अच कोंडीन; ईद भी आग सकतद कि अल ईप्पत अच सीकतार रा?”
यहोवा उत्तर कोट्टुन, “आ ईप्पत इन कारण भी ना आ नगर इक नाश माळतीदील.”
बाक अब्राहम अंदुन, “हे प्रभु, नी सिट्ट दा बरबाळ, आखरी घन ना नीन से विनती माळतीन. अगर अल हत्त अच सीक्यार रा?”
यहोवा उत्तर कोट्टुन, “ना आ हत्त इन कारण आ नगर इक नाश माळतीदील.” याग यहोवा अन अब्राहम से मात माळकु आत, रा आव अल टु होटोदुन, अदिक अब्राहम तान मान्या वापस होटोदुन.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.