परमेश्वर उन वचन
उत्पत्ति 17
वादा अन चिन्ह, खतना
याग अब्राहम निन्यानवे वर्ष इनव आगेदुन, आग यहोवा आऊक दर्शन कोटकु अंदुन, “ना सर्वशक्तिमान ईश्वर हुईन; नान उपस्थिति दा नळु अदिक सिद्ध आगतेला होग. ना नीन सांगुळ वादा माळाईन, अदिक नीन वंश इक हापाळ अच वाळुसाईन.” आग अब्राहम बाय इन भार बिद्दुन; अदिक परमेश्वर आऊन से ईव मातगोळी माळतेला ईत्तुन, “नोळ, नान वादा नीन सांगुळ कटकु ईत्तीत, इदुरसाटी नी जातीगोळ समूह अन मूल आप्प आगेद्या. इदुरसाटी ईग टु नीन हेसुर अब्राहम ईरतीदील, लेकीन नीन हेसुर अब्राहम आदीत; यतिकी ना नीनी जातीगोळ समूह अन मूल आप्प ठहरूस बुटीन. ना नीनी हापाळ फलवन्त माळाईन, अदिक नीनी जाती जाती इन मूल माळाईन, अदिक नीन वंश दा राजा पैदा आदार.”
अदिक ना नीन सांगुळ, अदिक नीन बाद्दा पीढ़ी पीढ़ी ताका नीन वंश इन सांगुळ भी ई आशय इन युग युग इन वादा कटतीन, कि ना नीन अदिक नीन बाद्दा नीन वंश इनव भी परमेश्वर ईराईन. अदिक ना नीनी इक, अदिक नीन बाद्दा नीन वंश इक भी, ईद सप्पा कनान द्याश यदुर दा नी परदेशी आगकु ईरत्या, युग युग इन साटी कोट बुळाईन; अदिक ना आंदुरव परमेश्वर आगाईन.
बाक परमेश्वर अब्राहम से अंदुन, “नी भी नान सांगुळ कट्द वादा अन पालन माळेत; नी अदिक नीन बाद्दा नीन वंश भी तान तान पीढ़ी दा अदुर्द पालन माळुल. जो वादा नीन अदिक नान बीच तथा नीन बाद्दा नीन वंशज इन बीच दा आद अदिक जो नीव मान्सतोदिर अद ईद हुन कि नीम दा टु हर ऊंद मंळसा अन खतना माळकु आदीत. नीव तान तान खतना माळ कोमेतीर: जो वादा नीम अदिक नान बीच दा आद, अदुर्द ईदा चिन्ह आदीत. अदिक नीम पीढ़ी टु पीढ़ी ताका नीम बीच दा येट्ट दिन इन सप्पा पारगोळ्द खतना माळकु आगुल; चाहे आव नीम मान्या पैदा आगीदान या यातोवारा परदेशी इन हाती टु पैस्या देल कोंडकु यती ईला आगीदान अदिक नीम वंश इनव येती ईला आगीदान. जो दास नीन मान्या पैदा आगीदान या नीन धन देल कोंडकु आगीदान आऊन खतना जरूर माळकु आगुल; ई प्रकार नान वादा अन ईद चिन्ह युग युग ताका नीम शरीर दा बन्सकु ईत्तीत. लेकीन जो मंळसा खतना रहित ईरूल, मतलब यार्द खतना ईला आगीदाद, आव प्राणी तान लॉकुर दा टु नष्ट माळकु आगुल, यतिकी आव नान सांगुळ कट्द वादा अक मुर्द बुट्टुन.”
बाक परमेश्वर अब्राहम से अंदुन, “नीन हिंग्स जो सारै आर, आकी नी ईगी टु सारै अनबाळेत, आकिन हेसुर सारा ईत्तीत. अदिक ना आकी आशीष कोळाईन, अदिक सही दा नीनी आकिन द्वारा ऊंद चिग्द कोळाईन. अदिक ना आकी आशीष कोळाईन अदिक आक जाती जाती इन जननी आदार; अदिक आकिन से राज्य राज्य अन राजागोळ पैदा आदार.”
आग अब्राहम बाय इन भार देल बिद्दुन अदिक नेगली कुरतुन, अदिक अनली कुरतुन, “येन सौ वर्ष इन मंळसा अन भी चिग्द आदीत अदिक येन सारा जो नब्बे वर्ष इन आर चिग्द हाळदार?” अदिक अब्राहम परमेश्वर से अंदुन, “इश्माएल नीन नजर दा बन्सकु ईरूल! ईदा हापाळ आद.”
आग परमेश्वर अंदुन, सही दा नीन हिंग्स सारा नीन से ऊंद पार पैदा आदान; अदिक नी आऊन हेसुर इसहाक ईटेत; अदिक ना आऊन सांगुळ हिंग वादा माळाईन जो आऊन बाद्दा आऊन वंश इन साटी युग-युग इन वादा आदीत. इश्माएल इन बारा दा भी ना नींद केळीन; ना आऊक भी आशीष कोळाईन, अदिक आऊक फलवन्त माळाईन अदिक हापाळ अच वाळुस बुळाईन; आऊन से हन्नेळ प्रधान पैदा आदार, अदिक ना आऊन से ऊंद धोळ्द जाती माळाईन. लेकीन ना तान वादा इसहाक इन सांगुळ अच कटाईन जो सारा से सामने वर्ष ईदा नीवळुस्द समय दा पैदा आदान. आग परमेश्वर अब्राहम से मातगोळ माळोद बंद माळदुन अदिक आऊन हाती टु म्याकुच येरेदुन.
आग अब्राहम तान पार इश्माएल उक अदिक आऊन मान्या यास पैदा आगीदुर सप्पा लॉकुर इक अदिक यारी आव धन कोटकु कोंडीदुन, मतलब आऊन मान्या यास मंळसागोळ ईरोर, आ सप्पा मुंदुरी हुडुकु अदा दिशी परमेश्वर उन वचन इन अनुसार आदुर्द खतना माळदुन. याग अब्राहम उन खतना आत आग आव निन्यानवे वर्ष ईनव ईरोन. अदिक याग आऊन पार इश्माएल उन खतना आत आग आव तेरह वर्ष ईनव ईरोन. अब्राहम अदिक आऊन पार इश्माएल येढ्ढु मुंदुर्द खतना ऊंदा दिशी आत; आऊन सांगुळ अच आऊन मान्यागोळोर सप्पा मंळसागोळ्द जो मान्या पैदा आदुर अदिक जो परदेशीगोळ कय देल पैस्या देल कोंडकु आगीदुर, खतना आत.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.