गलातिगोळ 3

व्यवस्था या विश्वास

1हे निर्बुद्धी गलातिगोळा, याव नीमी मोहीत माळ कोंडान? नीम रा मान्सी कण्णगोळ मुंद यीशु मसीह क्रूस मा येर्सकु आदुन! 2ना नीम से सिर्फ ईद जानसोद चाहासतीन कि नीमी आत्मा, येन व्यवस्था अन क्याल्सागोळ देल या विश्वास इन समाचार देल सिक्त? 3येन नीव हिंग निर्बुद्धी आईर कि आत्मा अन रीति मा सुरूवात माळकु ईग मय इन रीति मा अन्त माळीर? 4येन नीव ईट दुख बेकार अच नेगदीर? लेकीन यागलु बेकार हैलेच. 5जो नीमी आत्मा दान माळतान अदिक नीम दा सामर्थ्य नव क्याल्सा माळतान, आव येन व्यवस्था अन क्याल्सागोळ देल या खुशखबरी मा विश्वास देल हिंग माळतान? 61

“अब्राहम रा परमेश्वर मा विश्वास माळदुन अदिक ईद आऊन साटी न्यायीपन आळुकु आत.” 72इदुरसाटी ईद जान्स कोमी कि जो विश्वास माळावाळेर आर, आंदुर अच अब्राहम उन औलाद उर. 8अदिक पवित्रशास्त्र पयले टु अच ईद जान्सकु कि परमेश्वर गैरयहूदीगोळी विश्वास देल न्यायी ठहरूस्यान, पयले टु अच अब्राहम उक ईद खुशखबरी केळ्स बुट्टुन कि “नीन दा सप्पा जातीगोळी आशीष सिक्‍कीत.” 9इदुरसाटी जो विश्वास माळावाळेर आर, आंदरी अब्राहम उन सांगुळ आशीष सिक्‍कीत.

10इदुरसाटी यास लॉकुर व्यवस्था अन क्याल्सागोळ मा भरोसा ईटतार, आंदुर सप्पा श्राप इन हात्‍ती आर, यतिकी शास्त्र दा लिख्सकु आद, “जो यावारा व्यवस्था अन किताब दा लिख्सकु सप्पा मातगोळ माळदुर दा स्थिर ईरालुन, आव श्रापित आन.” 11लेकीन ईद मात प्रगट आद कि व्यवस्था अन द्वारा परमेश्वर उन ईल याऊ न्यायी ठहरूसालुन, यतिकी न्यायी जन विश्वास देल जित्‍ता ईत्‍तान. 12लेकीन व्यवस्था अन विश्वास देल येनु संबंध हैलेच; यतिकी “जो अवरी मानस्यान, आव अऊर कारण जित्‍ता ईत्‍तान.” 13मसीह जो नाम साटी श्रापित बन्सदुन, नामी कोंडकु व्यवस्था अन श्राप देल बिळ्सुसदुन, यतिकी शास्त्र दा लिख्सकु आद, “जो यावारा क्रूस मा लटकुसकु आगतान आव श्रापित आन.” 14ईद इदुरसाटी आत कि अब्राहम उन आशीष मसीह यीशु दा गैरयहूदीगोळ ताका पोहचुसुल, अदिक नाव विश्वास इन द्वारा आ आत्मा अक प्राप्त माळेव यदुर्द वादा आग्याद.

व्यवस्था अदिक वाचा

15हे वार्टुरा अदिक आकतींगेरा, ना मंळसा अन रीति मा अनतीन; मंळसा अन वाचा जो पक्‍का आगेगतद, रा ना यावारा अदरी टाल्सतान अदिक ना अदुर्दा येनारा वाळुस्तान. 16इदुरसाटी वादागोळ अब्राहम उक अदिक आऊन वंश इक कोटकु आग्याव. आव ईद अनालुन, “वंशगोळी,” ह्यांग हापाळ मुंदुर बारा दा अंदुन; लेकीन ह्यांग ऊंद इन बारा दा कि “नीन वंश इक” अदिक आव मसीह हुन. 17लेकीन ना ईद अनतीन: जो वाचा परमेश्वर पयले टु पक्‍का माळीदुन, अदरी व्यवस्था नाक सौ तीस वर्ष इन बाद्दा बंदकु टाल्स सकाल्द कि वादा बेकार ठहरूसुल. 183यतिकी अगर मीरास व्यवस्था देल सिक्याद रा बाक वादा देल ईला, लेकीन परमेश्वर अब्राहम उक वादा अन द्वारा कोट बुटान.

19आग बाक व्यवस्था येती कोटकु आत? अद रा अपराधगोळ कारण बाद्दा कोटकु आत कि आ वंश इन बरासताका ईरूल, यारी वादा कोटकु आगीत; अदिक आव स्वर्गदूतगोळ द्वारा ऊंद मध्यस्थ अन कय दा ठहरूसकु आत. 20मध्यस्थ रा ऊंद इन आगाल्द, लेकीन परमेश्वर ऊंद अच आन.

व्यवस्था अन उद्देश

21रा येन व्यवस्था परमेश्वर उन वादागोळ विरोध दा आद? यागलु ईला! यतिकी अगर हिंग व्यवस्था कोटकु आगाईत जो जीवन कोळ सकाईत, रा खराखुरा न्यायीपन व्यवस्था देल ईराईत. 22लेकीन पवित्रशास्त्र सप्पा मुंदरी पाप इन हात्‍ती माळ बुळ्त, ताकी अद वादा यदुर्द आधार यीशु मसीह मा विश्वास माळोद आद, विश्वास माळावाळेर साटी पुरा आगेगुल.

23लेकीन विश्वास इन बरोर से पयले व्यवस्था अन हात्‍ती ता दा नाम रखवाली आगतोगोद, अदिक आ विश्वास इन बरासताका जो प्रगट आगावाळा ईरोद, नाव अदुर्दा बंधन दा ईत्‍तेव. 24इदुरसाटी व्यवस्था मसीह ताका पोहचुसोर साटी नाम गुरु आग्याद कि नाव विश्वास देल न्यायी ठहरुसेव. 25लेकीन याग विश्वास होट्ट बत्‍त, रा ईग नाव गुरु उन हात्‍ती ईतीदील. 26यतिकी नीव सप्पा आ विश्वास इन द्वारा जो मसीह यीशु मा आद, परमेश्वर उन औलाद हुईर. 27अदिक नीम दा टु यास मुंदुर मसीह दा बपतिस्मा ताकोंडार आंदुर मसीह अक हाक्‍क कोंडार. 28ईग ना यावारा यहूदी ईत्‍तुन अदिक ना यावारा गैरयहूदी, ना यावारा दास ना यावारा स्वतंत्र, ना यावारा नर ना नारी, यतिकी नीव सप्पा यीशु मसीह दा ऊंद आईर. 294अदिक अगर नीव मसीह अन आईर रा अब्राहम उन वंश अदिक वादा अन अनुसार वारीस भी हुईर.