यहेजकेल 18

व्यक्तिगत जिम्मेदारी

1बक यहोवा अन ईद वचन नान हाती पोहचुस्त: 2नीव लॉकुर जो इस्त्राएल द्याश इन बारा दा ईद कहावत अनतीर,

हुळ्लग अंगुर रा तिंदुर पुराना हाळाबाट्टुर,

लेकीन हल्ल हुळ्लग आदव चिकोरव.

ईदुर येन मतलब आद?

3प्रभु यहोवा ईद अनतान कि नान जीवन इन किर्या, नीम इक इस्त्राएल दा ईद कहावत अनोद मात्त मौका सिकतीदील. 4नोळी, सप्पा मुंदुरव प्राण रा नानव हुव, ह्यांग आप्प उन प्राण, हांग अच पार उन भी प्राण आद; येढ्ढु नानव अच हुव. ईदुरसाटी जो प्राणी पाप माळ्यान आव सोत्तान.

5“जो यावारा धर्मी आन, अदिक न्याय अदिक धर्म इन क्याल्सा माळ्यान, 6अदिक ना रा पहाळीगोळ पुजा अन जागा मा भोजन माळीदान, ना इस्त्राएल इन घराना अन मुर्तीगोळ दी कण्ण नेगुकु नोळीदान; ना पराया आर्त इक बीगळुसीदान, अदिक ऋतुमती इन हाती होग्यान, 7अदिक ना यारदु मा अंधार माळ्यान बल्की ऋणी इक आऊन बन्धक वापस माळीदान, ना यारीकु लुटसीदान, बल्की हस्तकु उन तान रोट्टी कोटीदान अदिक ऊगळा अक कपळा होचीदान, 8ना ब्याम मा पैस्या कोटीदान, ना पैस्या अन ब्याज ताकोंडीदान, अदिक ना तान कय कुटिल क्याल्सा देल रोकसीदान, मंळसागोळ बीच दा सच्चाई देल न्याय माळीदान, 9अदिक नान विधीगोळ मा नळुतीदान अदिक नान नियमगोळी मान्सतेला सच्चाई देल क्याल्सा माळीदान, हींग मंळसा धर्मी आन, आव निश्चय जीत्ता ईत्तान, प्रभु यहोवा अन ईदा वाणी हुन.”

10“लेकीन आऊन पार डाकु, हत्यारा, या म्याकुच कोटकु आग्याव आ पापगोळ दा टु यातोदु माळावाळा ईतीदान, 11अदिक म्याकुच कोटकु आग्याव आ उचित क्याल्सा माळावाळा ईला ईतीदान, अदिक पहाळी इन पुजा अन जागा मा भोजन माळीदान, पराई आर्त इक बीगळुसीदान, 12दीन दरिद्र मा अंधेर माळीदान, दुसरा अक लुटसीदान, बन्धक ईला वापस माळीदान, मुर्तीगोळ दी कण्ण नेगदीदान, बेकार क्याल्सा माळीदान, 13ब्याज मा पैस्या कोटीदान, अदिक वाळुसकु ताकोंडीदान, रा येन आव जीत्ता ईत्तान? आव जीत्ता ईरतीदील; ईदुरसाटी कि आव ईव सप्पा बेकार क्याल्सागोळ माळ्यान आव सहीदा सोत्तान अदिक आऊन रक्ता आऊंद अच ताल्ला मा बीद्दीत.”

14“बाक अगर ईत्ता मंळसा अन पार आगुल अदिक आव तान आप्प उन ईव सप्पा पाप नोळकु अंज्क इन मारा आंदुर घाई ईला माळतीदान. 15मतलब ना रा पहाळी इन पुजा अन जागा मा भोजन माळ्यान, ना रा इस्त्राएल इन घराना अन मुरतीगोळ दी कण्ण नेगदीदान, ना पराया आर्त इक बीगळुस्यान, 16ना यारदु मा अंधेर माळ्यान, न येनारा बन्धक ताकोंडान, ना यारीकु लुटस्यान, बल्की तान रोट्टी हस्तकु उक कोटान, ऊगळा अक कपळा होच्यान, 17दीन जन इन हानि माळोर से रोकस्यान, ब्याज अदिक वाळुस्कु ईला तांकोडीदान, नान नियमगोळी मानसीदान, अदिक नान विधीगोळ मा नळदीदान, रा तान आप्प उन अधर्म इन कारण सायतीदील, बल्की जीत्ता अच ईत्तान. 18आऊन आप्प, याव अंधेर माळ्यान अदिक लुटस्यान, अदिक तान वार्टुर बीच अनुचित क्याल्सा माळ्यान, आवा तान अधर्म इन कारण सोतोदान. 19तरी भी नीव लॉकुर अनतीर, यती? येन पार आप्प अन अधर्म इन भार नेगालुन? याग पार उन न्याय अदिक धर्म इन क्याल्सा माळीदान, अदिक नान विधीगोळ पालन माळकु अऊर मा नळदीदान, रा आव जीत्ता अच ईत्तान. 20जो प्राणी पाप माळ्यान आवा सोत्तान, न रा पार आप्प उन भार नेगदान अदिक ना आप्पा पार उन; धर्मी इक तांद अच धर्म इन काय सीक्कीत, अदिक दुष्ट उक तांद अच दुष्टता अन काय सीक्कीत. 21लेकीन अगर दुष्ट मंळसा तान सप्पा पापगोळ से तिर्गकु, नान सप्पा विधीगोळ पालन माळुल अदिक न्याय अदिक धर्म इन क्याल्सा माळुल, रा आव सायतीदील; ब्लकी जीत्ता अच ईत्तान. 22आव यास अपराध माळ्यान, अऊर दा टु यारदु याद आऊन विरूद्ध माळकु आगतीदील; जो धर्म इन क्याल्सा आव माळीदान, आऊन कारण आव जीत्ता ईत्तान.” 23प्रभु यहोवा अन ईद वाणी आद, येन ना दुष्ट उन सोत्तुर देल येनारा खुश आगतीन? येन ना ईदुर देल खुश आगालीन कि आव तान हादी टु तिर्गकु जीत्ता ईरूल? 24लेकीन याग धर्मी तान धर्म देल तिर्गकु तेळा क्याल्सा, बल्की दुष्ट इन सप्पा बेकार क्याल्सागोळ अनुसार माळली कुरतुर, रा येन आव जीत्ता ईत्तान? यास धर्म इन क्याल्सा आव माळ्यान, अदुर दा टु यातोदु याद माळकु आगतीदील. जो विश्वासघात अदिक पाप आव माळ्यान, अदुर कारण आव सोतोदान.

25“तरी भी नीव लॉकुर अनतीर, ‘प्रभु उन गती ऊंद घाई हैलेच.’ हे इस्त्राएल उन घराना, नोळ, येन नान गती ऊंद घाई हैलेच? येन नीम्द अच गती अनुचित हैलेच? 26याग धर्मी तान धर्म देल तिर्गकु, तेळा क्याल्सा माळली कुरूल, रा आव आंदुर कारण सोत्तान, मतलब आव तान तेळा क्याल्सा अन कारण अच सोतोदान. 27बाक याग दुष्ट तान दुष्ट क्याल्सागोळ देल तिर्गकु, न्याय अदिक धर्म इन क्याल्सा माळली कुरतान, रा आव तान जीव ऊळस्यान. 28आव जो सोच विचार माळकु तान सप्पा अपराधगोळ से तिर्गदुन, ई कारण आव सायतीदील, जीत्ता अच ईत्तान. 29तरी भी इस्राएल उन घराना अनतद कि प्रभु उन गति ऊंद घाई हैलेच. हे इस्त्राएल इन घराना, येन नान गती ऊंद घाई हैलेच? येन नीम्द अच गति अनुचित हैलेच?”

30“प्रभु यहोवा अन ईद वाणी आद, हे इस्त्राएल इन घराना, ना नीम दा हर ऊंद मंळसा अन न्याय आऊन चाल चलन इन अनुसार अच माळाईन. पश्चाताप माळी अदिक तान सप्पा अपराधगोळी बिळी, आग अच नीम्द अधर्म नीम्द ठोकर तीना कारण ईरतीदील. 31तान सप्पा अपराधगोळी जो नीव माळीर, दुर माळी; तान मन अदिक तान आत्मा बदलुसकोमी! हे इस्त्राएल इन घराना, नीव यती सोत्तीर?” 32यतिकी प्रभु यहोवा अन ईद वाणी आद, जो सोत्तुर, आऊन सोत्तुर देल ना खुश आगालीन, ईदुरसाटी पश्चाताप माळी, आग अच नीव जीत्ता ईत्तीर.