परमेश्वर उन वचन
यहेजकेल 17
गिधाळगोळ अदिक अंगुर इन डाली इन दृष्टान्त
यहोवा अन ईद वचन नान हाती पोहचुस्त: “हे मंळसा अन सन्तान, इस्त्राएल इन घराना से ईद पहली अदिक दृष्टान्त अन; प्रभु यहोवा ईद अनतान, ऊंद लंबा पंखवाळा, अदिक रंग बिरंगा धोड्डेव गिधाळ पक्षी लबानोन होगकु ऊंद देवदार इन फुगनी तिंद कोंड्डव. आग अद आ फुगनी इन सबसे म्याकुच इन पतला डगाल मुरू कोम्त, अदिक अदरी लेन देन माळावाळा द्याश दा वोतकु व्यापारीगोळ ऊंद नगर दा हचबुळ्त. आग आव द्याश इन येनारा बिंजा हुडुकु ऊंद उपजाऊ केई दा हचदुन, अदिक अदरी हापाळ नीर इन जागा दा मजनू हेसुर इन मार्र इन घाई हचदुन. अद बेळ्दकु श्यांण्द बगरूसोदवाला अंगुर इन बेली आगेत यदुर डगालगोळ आऊन दी बांगदव, अदिक अदुर जळी आऊन ल्यालमा फैलुस्त, ई प्रकार अद अंगुर इन बेली आगकु कनखा वडा अदिक पत्तागोळ से तुमली कुर्त.
“बाक अदिक ऊंद लम्बा पंखवाळा अदिक परगोळ से तुमकु धोळ्द गिधाळ पक्षी ईरोद; अदिक अद अंगुर इन बेली आ जागा टु येल अद हचकु आगीत, आ दुसरा गिधाळ इन दी तान जळी फैलुसली अदिक तान डगालगोळ बांग्सली कुर्त कि अद अदरी वाळुसुल. लेकीन अद रा ईदुरसाटी वळ्लीद जागा मा हापाळ नीर इन हाती हचकु आगीत, कि कनखागोळ वडुल, अदिक फलसुल, अदिक वळ्लीद अंगुर इन बेली बनसुल. ईदुरसाटी नी ईद अन, प्रभु यहोवा ईद केळतान: येन अद फुलसीत? येन आव अदरी जळ देल कितदीदील, अदिक अदुर कायगोळी झाळ्सतीदील कि अद तान सप्पा हिवरा व्हासा पत्तागोळ सांगुळ वंळ्गेगुल? अदरी जळ देल कितली येक्कुल ताकत अदिक हापाळ सा मंळसागोळ्द जरवत ईरतीदील. बाक अद हतकु भी ईरूल, तरी भी अद फलसीत? याग पुरवाई अदरी हत्तीत, आग येन बिलकुल वंळ्गतीदील? अद येन हतकु आद अदा जागा मा वंळ्गेदीत.”
दृष्टान इन मतलब
बाक यहोवा अन ईद वचन नान हाती पोहचुस्त: “आ विद्रोह माळावाळा घराना से अन, येन नीव ई मातगोळ्द मतलब जान्सालीर? बाक आव अंदुन, बेबीलोन उन राजा यरूशलेम इक होगकु आऊन राजा अदिक अन्य प्रधानगोळ इक हुडुकु तान मान्या बेबीलोन दा पोहचुसदुन. आग राजवंश दा टु ऊंद मंळसा अक हुडुकु आऊन से वादा कटदुन, अदिक आऊक वश दा ईरोद किर्या तीन्सदुन, अदिक द्याश इन सामर्थी मंळसागोळी वोतुन. कि आ राज्य निर्बल ईरूल अदिक ताल्ला नेगु सकबाळुल, बल्की वादा अन पालन माळदुर दा स्थिर ईरूल. तरी भी ईव घ्वाळा अदिक धोळ सेना बेळोर साटी तान दूत मिस्त्र दा कळुकु आऊन से विद्रोह माळदुन. ये आव फलस्यान? येन ईत्ता क्याल्सागोळ माळावाळा ऊळदान? येन आव तान वादा मुरदुर मा भी ऊळदोदान? प्रभु यहोवा ईद अनतान, नान जीवन इन किर्या, या राजा अन तिन्सद किर्या आव बेकार सम्सदुन, अदिक यार्द वादा आव मुरदुन, आऊन मान्या याव आऊक राजा माळीदुन, मतलब बेबीलोन दा अच आऊन हाती अच सोत्तान. याग आंदुर हापाळ सा प्राणीगोळी नाश माळोर साटी दमदमा कटदुर, अदिक गढ़ माळदुर, आग फिरौन तान धोळ सेना अदिक हापाळ मंडली ईरतेला भी युध्द दा आऊन मदत माळतीदील. यतिकी आव किर्या अक बेकार जान्सदुन, अदिक वादा अक मुरदुन; नोळी, आव वचन कोळदुर मा भी ईत्ता ईत्ता क्याल्सा माळ्यान, ईदुरसाटी आव ऊळु सकतीदील. प्रभु यहोवा ईद अनतान: नान जीवन इन किर्या, आव नान किर्या बेकार जान्सदुन, अदिक नांद वादा मुरदान; ईद पाप ना आऊन दा ताल्ला मा हाकाईन. ना तान जाल आऊन मा फैलुसाईन अदिक आव नान फंदा दा फसुस्यान; अदिक आऊक बेबीलोन दा पोहचुस्कु आ विश्वासघात इन मुकदमा आऊन से आळाईन, जो आव नान से माळ्यान. आऊन दलगोळ दा टु यास वोळ्यार आंदुर सप्पा तलवार देल कोंदकु आदार, अदिक जो ईतोदार आंदुर नाकु दिशागोळ दा तितर बितर आगेदार, आग नीव लॉकुर जान्स कोंडीर कि ना यहोवा अच हींग अंदीन.”
परमेश्वर उन प्रतिग्या
बाक प्रभु यहोवा ईद अनतान:
“ना भी देवदार इन ऊचा फुगनी दा टु हुडुकु येनारा हचाईन,
अदिक अदुर सबसे म्याकोळोद कनखागोळ दा टु
ऊंद कोमल कनखा मुरकु
ऊंद हापाळ ऊचा पहाळी मा हचाईन,
मतलब इस्त्राएल इन ऊचा पहाळी मा हचाईन;
आग अव डगालगोळ वोडुकु ताकतवर अदिक वळ्लीद देवदार बन्सेदव,
अदिक अदुर ल्यालमा मतलब अदुर डगालगोळ्द सावली दा
अलग अलग इन पक्षीगोळ बसेरा माळेव.
आग मैदान इन सप्पा मार्र जान्स कोंडोव
कि ना यहोवा अच ऊचा मार्र इक नीचा अदिक नीचा मर्र इक ऊचा माळीन,
हिवरा मार्र इक वंळगास बु़ट्टीन, अदिक वंळगींद मार्र इक फलुसदीन.
ना यहोवा अच ईद अंदीन अदिक हांग अच माळ भी कोडींन.”
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.