यहेजकेल 19

दुख इन ऊंद गाना

1इस्त्राएल इन प्रधानगोळ बारा दा नी ईद दुख इन गाना केळ्स;

2नीन मोय ऊंद ह्यांग हुल्लगीत ईरोर!

आक हुलगोळ बीच दा कुरतोगोर अदिक तान चिकोर इक हारोद हुल्लगोळ बीच पाल्सतोगोर.

3तान चिकोर दा टु आक ऊंद उक पाल्सदुर अदिक आव हारोद हुल्ल आगेदुन,

अदिक अहेर हुडोद कलतोदुन; आव मंळसागोळी भी हरूकु तिंदुन.

4राज्य राज्य अन लॉकुर आऊन चर्चा केळदुर,

अदिक आऊक तान अगुळ्द गड्डा दा फसुसदुर,

अदिक आऊन नकेल हाक्कु आऊक मिस्त्र द्याश दा ओतुर.

5याग आऊन मोय नोळदुर

अदिक आक धीरज ताकोमकु ईत्तुर तरी भी आकिन आशा मुरदोत,

आग आक तान ऊंद चिग्द उक हुडुकु आऊक हारोद हुल्ल माळ बुट्टुर.

6आग आव हारोद हुल्ल आगकु हुल्लगोळ बीच नळुली वयाळली कुरतुन,

अदिक आव अहेर हुडोद कलतोदुन;

अदिक मंळसागोळी भी हरूकु तिंदुन.

7आव आंदुरव भवनगोळी बिगळुसदुन,

अदिक आंदुर नगरगोळी ऊजाळ्सदुन बल्की आऊन गरजुसोद अंज्क इन कारण द्याश

अदिक अल जो येनारा भी ईरोद सप्पा ऊजुळुसेत.

8आग नाकु दीकळव राज्य राज्य अन लॉकुर तान तान प्रान्त टु आऊन विरूद्ध होटकु बंदुर,

अदिक आऊन साटी जाल हचदुर;

अदिक आव आंदुर अगुळकु गड्डागोळ दा फसुसेदुन.

9आग आंदुर आऊन नकेल हाक्कु अदिक कठघरा दा बन्द माळकु बेबीलोन इन राजा अन हाती ओतुर,

अदिक गढ़ दा बन्द माळदुर,

कि आऊन बोल इस्त्राएल इन पहाळी द्याश मा बाक केळ बर बाळुल.

10नीन मोय यार से नी पैदा आद,

आक किनारा मा हच्द अंगुर इन बेली घाई ईरोर,

अदिक गहरा नीर इन कारण कायगोळ अदिक खांदागोळ से तुमकु ईरोर.

11प्रभुता माळावाळा अन राजदण्डगोळ साटी अदुर दा मोटा मोटा डगालगोळ ईरव;

अदिक अदुर ऊचाई ईट आत कि अद बादलगोळ बीच ताका पोहचुस्त;

अदिक तान हापाळ सा डगालगोळ सांगुळ हापाळ अच लम्बा कांळ्सली कुर्त.

12तरी जलजलाहट इन सांगुळ ऊखळुसकु जमीन मा भिटकु आत,

अदिक अदुर फुल पुरवाई हवा अन हत्तुर देल वंळ्गेत;

अदिक अदुर मोटा डगालगोळ वंळ्गेदव;

अदिक अव बेक्की देल भस्म आगेदव.

13ईग आव आळी दा,

बल्की निर्जल द्याश दा हचकु आग्याद.

14अदुर खांदागोळ्द डगालगोळ दा टु बेक्की होळ्त,

यदुर अदुर काय भस्म आगेदव,

अदिक प्रभुता माळा लायक राजदण्ड इन साटी अदुर दा ईग यातोदारा मोदा डगाल ईतीदील.

ईदा दुख इन गाना हुन, अदिक दुख इन गाना बन्सकु ईत्तीत.