यहेजकेल 10

परमेश्वर उन सामर्थ्य अन यरूशलेम इन मंदिर टु होळोद

1ईदुर बाद्दा ना नोळदीन कि करूबगोळ ताल्लागोळ म्याकुच जो आकाश मण्डल आद, अदुर दा नीलमणि इन सिंहासन घाई येनारा कांळ्सकु बिळतद.

2आग यहोवा आ सन इन कपळा हाक्द मंळसा से अंदुन, “तिर्गावाळा चक्का अन बीच करूबगोळ ल्यालमा होग अदिक तान येढ्ढु मुठ्ठीगोळी करूबगोळ बीच इन अंगारगोळ देल तुमकु नगर मा बगरूसबुळ.” अत: आव नान नोळतेला अच बीच दा होदुन. 3याग आव मंळसा बुळ्क होदुन, आग अव करूब भवन इन दक्षिण दी निदुरकु ईरव; अदिक बादल बुळ्कळोद आंगुळ दा तुमकु ईरोद. 4आग यहोवा अन सामर्थ करूबगोळ म्याकुच टु यदकु भवन इन हांद्रा मा होट्ट बत्त; अदिक बादल भवन दा तुम्मेत; अदिक अद आंगुळ यहोवा अन सामर्थ इन ऊजुळ देल तुम्मेत. 5करूबगोळ्द पंखगोळ्द शब्द व्हार्या अन आंगुळ ताका केळ बरतोगोद, अद सर्व सर्वशक्तिमान परमेश्वर उन माताळोद शब्द घाई ईरोद.

6याग आव सन इन कपळा हाक्द मंळसा अन तिर्गावाळा चक्कागोळ बुळ्क करूबगोळ बीच दा टु बेक्की तरोद आग्या कोट्टुन, आग आव आंदुर बीच दा होगकु ऊंद चक्का अन हाती निदुरदुन. 7आग करूबगोळ दा टु ऊंद करूब तान कय वाळुसकु, आ बेक्की दा टु जो करूबगोळ बीच दा ईरोद, येनारा नेगुकु सन इन कपळा हाक्द मंळसा अन मुठ्ठी दा कोळ्त; अदिक आव अदरी हुडुकु व्हार्या होटोदुन.

8करूबगोळ पंख अन ल्यालमा रा मंळसा अन कय घाई येनारा कांळ्सोद. 9आग ना नोळदीन, कि करूबगोळ हाती नाक चक्का आव; मतलब ऊंद ऊंद करूब इन हाती ऊंद ऊंद चक्का आद, अदिक चक्कागोळ्द रूप किमती चमकिला कल्ल घाई आद. 10अऊर्द हिंग रूप आद कि नाकु ऊंद घाई कांळ्सताव, ह्यांग कि ऊंद चक्का अन बीच दुसरा चक्का ईरूल. 11नळाहोती अव तान नाकु अलंगगोळ ताकत देल नळुताव; अदिक नळाहोती तिर्गालव, बल्की यात अऊर ताल्ला ईरतद अव आतल्या अदुर हिंद नळुताव अदिक नळाहोती अव तिर्गालव. 12बेन कय अदिक पंखगोळ सांगुळ करूबगोळ पुरा शरीर अदिक जो चक्का अऊरव आव, अव भी सप्पा च्या सप्पा नाकु दी कण्णगोळ देल तुमकु आव. 13नान केळतेला आ चक्कागोळी चक्कर अनकु आत, मतलब तिर्गावाळा चक्का.

14ऊंद ऊंद इन नाक नाक चेहरा ईरव: ऊंद चेहरा रा करूबगोळ घाई, दुसरा मंळसा अन घाई, तिसरा हुल्ल इन घाई, अदिक नाकवा गिधाळ पक्षी इन घाई. 15करूब जमीन मा टु येदोदव. ईव अव अच जीवधारी हुव, जो ना कबार गांगा अन हाती नोळीदिन. 16याग याग आव करूब नळुतोगोव आग आग अव चक्कागोळ अऊर हाती नळुतोगोव; अदिक याग याग करूब पृथ्वी मा टु येळोर साटी तान पंख नेगोव आग आग चक्कागोळ अऊर हाती टु तिर्गोव ईला. 17याग अव निदरव आग ईव भी अऊर सांगुळ निदरव; अदिक याग अव येळव आग ईव भी अऊर सांगुळ येळव; यतिकी जीवधारीगोळ्द आत्मा ईऊर दा ईरतोगोद.

18यहोवा अन सामर्थ भवन इन डेवळी मा टु येदकु करूबगोळ म्याकुच ठहरूसेत. 19आग करूब तान पंख नेगुकु नान नोळतेला अच पृथ्वी मा टु येदकु होट्ट बुट्टव; अदिक चक्कागोळ भी अऊर सांगुळ सांगुळ होदव, अदिक अव सप्पा यहोवा अन भवन इन पूर्वी फाटक दा नीदरेदव; अदिक इस्त्राएल उन परमेश्वर उन सामर्थ अऊर म्याकुच ठहरूस्कु ईत्त. 20ईव अवा जीवधारी हुव जो ना कबार गांगा अन हाती इस्त्राएल इन परमेश्वर उन ल्यालमा नोळीदीन, अदिक ना जान्स कोंडीन कि अव भी करूब हुव.

21हर ऊंद इन नाक चेहरा अदिक नाक पंख अदिक पंखगोळ ल्यालमा मंळसा अन घाई कयगोळ भी ईरव. 22अऊर बायगोळ रूप अदा आद जो ना कबार गांगा अन तट मा नोळीदीन. अऊर बाय अच येन बल्की अऊर सप्पा शरीर भी हांग अच ईरोद. अव सीधा तान तान मुंद अच नळोव.