यहेजकेल 9

यरूशलेम इक दण्ड

1बाक आव नान किवगोळ दा ऊँचा शब्द देल कारकु अंदुन, “नगर इन अधिकारीगोळी तान तान कय दा नाश माळोद हतियार हुडुकु हाती तरी.” 2ईदुर मा आर मंळसा, उत्तर दी ऊपरी फाटक इन हादी देल तान तान कय दा घात माळोद हतियार हुडुकु बंदुर; अदिक आंदुर बीच दा सन इन कपळा हाक्कु, नेळु मा लिखसोद दवात कटकु ऊंद अदिक मंळसा ईरोन; अदिक आंदुर सप्पा भवन इन बुळ्क होगकु पीतल इन वेदी इन हाती नीदुरदुर.

3आग इस्त्राएल इन परमेश्वर उन तेज करूबगोळ मा टु, यार मा म्याकुच ईर तोगोन, भवन इन हांद्रा मा येदकु बंदीदुन; अदिक आव आ सन इन कपळा हाक्कु मंळसा अक जो नेळु मा दवात कटकु ईरोन, कारदुन. 4अदिक यहोवा आऊन से अंदुन, “ई यरूशलेम नगर इन बुळ्क ईत्त आत्त होगकु यास मंळसा आ सप्पा बेकार क्याल्सा अन कारण जो अदुर दा माळकु आगताव, शोक माळतेला अदिक दुखगोळ मारा चिळ्लाळसतार, आंदुर ह्याणा मा चिन्ह हचबुळ.”

5आग नान केळतेला दुसरा अंदुर, “नगर दा आंदुर हिंद हिंद नळुकु कोनतेला होगी; यारदु मा दया माळबाळेतीर अदिक न यारदारा मा तरस तिनेतीर. 6बाट्टुर, हारोदोर, कुवारा पोरगोळ, चिकोर-चिण्गेर, आर्तेर, सप्पा अक कोंदकु नष्ट माळी, लेकीन यातोवारा मंळसा अन ह्याणा मा चिन्ह ईतीदाद, आऊन हाती होगबाळेतीर. नान पवित्र जागा मा टु सुरवात माळी.” अत: आंदुर आ पुराना मंळसा गोळ से सुरवात माळदुर जो भवन इन मुंद ईरोर.

7बाक आव आंदुर से अंदुन, “भवन इक अशुध्द माळी, अदिक आंगुळगोळी लाशगोळ देल तुमकोमी. नळी व्हार्या होळी.” आग आंदुर नगर दा कोनली कुरतुर.

8याग आंदुर कोन्नोर, अदिक ना आबना ईतोदीन, आग ना बाय इन भार देल बीद्दीन अदिक चिल्ळासकु अंदीन, “हाय प्रभु यहोवा! येन नी तान जलजलाहट यरूशलेम मा भळकुसकु इस्त्राएल इन सप्पा मीगदोर इक भी नष्ट माळ्या?”

9आग आव नान से अंदुन, “इस्त्राएल अदिक यहूदा अन घरानागोळ्द अधर्म हापाळ अच यक्कुल आद, ईल ताका कि द्याश हत्या देल अदिक नगर अन्याय देल तुम्मेग्याद; यतिकी आंदुर अनतार, ‘यहोवा पृथ्वी इक त्याग्स बुटान अदिक यहोवा येनु नोळालुन.’ 10ईदुरसाटी आंदुर मा दया आगतीदील, न ना तरस तिनाईन, उलटा आंदुर चाल आंदुर्दा ताल्ला वापस माळाईन.”

11आग ना येन नोळदीन, कि जो मंळसा सन इन कपळा हाक्कु अदिक नेळु मा दवात कटकु ईरोन, आव ईद अनकु समाचार कोट्टुन, “ह्यांग नी आग्या कोट्ट, ना हांग अच माळदीन.”