परमेश्वर उन वचन
यहेजकेल 11
यरूशलेम इन निन्दा
आग आत्मा नानी नेगुकु यहोवा अन भवन इन पूर्वी फाटक इन हाती यदुर्द बाय पूर्वी दिशा अन दी आद, पोहचुस बुळ्त; अदिक अल ना येन नोळदिन, कि फाटक अच दा पच्चीस मंळसा आर. ना आंदुर बीच अज्जुर उन पार याजन्याह अक अदिक बनायाह अन पार पलत्याह अक नोळदीन, जो प्रजा अन प्रधान ईरोर.
आग आव नान से अंदुन, “हे मंळसा अन सन्तान, जो मंळसा ई नगर दा अनर्थ कल्पना अदिक बुरा युक्ती माळतार आंदुर ईंदुर अच हुळ. ईंदुर अनतार, ‘मान्ना माळोद समय हाती हैलेच, ईद नगर स्वार्रा अदिक नाव अदुर दाकळोद मास हुयेव.’ ईदुरसाटी हे मंळसा अन सन्तान, ईंदुर खिलाप भविष्यवाणी माळ, भविष्यवाणी.”
आग यहोवा अन आत्मा नान मा ईळुत, अदिक नान से अन्त, “हिंग अन, यहोवा हिंग अनतान: हे इस्त्राएल उन घराना, नीव हिंग अच अंदीर; जो येनारा नीम मन दा बरतद, अदरी ना जान्सतीन. नीव रा ई नगर दा हापाळ मुंदरी कोंद बुटीर बल्की आऊन सळकगोळी लाशगोळ देल तुम कोंडीर.”
ई कारण प्रभु यहोवा ईद अनतान: जो मंळसा नीव कोंद बुट्टीर, आंदुर लाश अच ई नगर रूपी स्वार्रा दाकळोद मास हुव; अदिक नीव ईदुर बीच दा टु तेगुकु आदीर. नीव तलवार देल अंजतीर, अदिक ना नीम मा तलवार नळसाईन, प्रभु यहोवा अन ईद वाणी आद. ना नीमी ईदुर दा टु तेगुकु परदेशीगोळ कय दा माळ कोमाईन, अदिक नीमी दण्ड कोळसुसाईन. नीव तलवार देल सोतकु बिद्दीर, अदिक ना नीम्द मुकदमा इस्त्राएल इन द्याश इन सीमा मा चुकुसाईन; आग नीव जान्स कोंडीर कि ना यहोवा हुईन. ईद नगर नीम साटी स्वार्रा आगतीदील, अदिक न नीव ईदुर दाकळोद मास हुईर; ना नीम्द मुकदमा इस्त्राएल इन द्याश इन सीमा मा चुकुसाईन. आग नीव जान्स कोंडीर ना यहोवा हुईन; “नीव रा नान विधीगोळ मा नळदीदील, अदिक नान नियमगोळी नीव मान्सीदील; लेकीन तान नाकु दिकळव राज्यगोळ रीतिगोळ मा नळदीर.”
ना ई प्रकार इन भविष्यवाणी माळीन कि बनयाह अन पार पलत्याह सोतोदुन. आग ना बाय इन भार देल बिदकु धोळ आवाज देल चिळ्लास कुरतीन, अदिक अंदीन, “हाय प्रभु यहोवा, येन नी इस्त्राएल उन मिकदोर आंदुर सत्यानाश माळ कोंड्या?”
बंधुआई दा होग्द लॉकुर से परमेश्वर उन प्रतिग्या
आग यहोवा अन वचन नान हाती पोहचुस्त, हे मंळसा अन सन्तान, यरूशलेम इन निवासीगोळ नीन हात्तीगोळ वार्टुर से बल्की इस्त्राएल इन सप्पा घराना से अंदार कि नीव यहोवा अन हाती टु दुर आगेगी, ईद द्याश नाम्द अच अधिकार दा कोटकु आग्याद.
लेकीन नी आंदुर से अन, “प्रभु यहोवा ईद अनतान: ना नीमी दुर दुर इन राज्यगोळ दा कुर्सदीन अदिक द्याश द्याश दा तितर बितर माळ कोंडीन, तरी भी या द्याश दा नीव बंदकु आईर, अऊर ना खुद नीम साटी थ्वाळासा दीन ताका पवित्र जागा ठहरुसाईन.”
“ईदुरसाटी आंदुर अन, प्रभु यहोवा हिंग अनतान: ना नीमी राज्य राज्य अन लॉकुर बीच दा टु वाटसाईन, अदिक या द्याशगोळ दा नीव तितर बितर माळकु आगीर, अऊर दा टु नीमी जमा माळाईन, अदिक नीनी इस्त्राएल इन जागा कोळाईन. आंदुर अल पोहचुसक आ द्याश इन सप्पा बेकार मूर्तीगोळ अदिक बेकार क्याल्सा भी आंदुर से दुर माळ्यार. ना आंदुर दिल ऊंद माळ कोमाईन, अदिक आंदुर बुळ्क व्हासा आत्मा पैदा माळाईन, अदिक आंदुर शरीर दा टु कल्ल इन घाई दिल तेगुकु आंदरी मास इन दिल कोळाईन, यदुर देल आंदुर नान विधीगोळ मा नित नळुल अदिक नान नियमगोळी मान्सुल; अदिक आंदुर नान प्रजा ठहरूस्यार, अदिक ना आंदुरव परमेश्वर ठहरूसाईन. लेकीन आ लॉकुर जो तान बेकार मूर्तीगोळ अदिक बेकार क्याल्सा दा मन हचकु नळुतेला ईरतार, आंदरी ना हींग माळाईन कि आंदुर चाल आंदुर्दा ताल्ला मा बिद्दीत, प्रभु यहोवा अन ईदा वाणी आद.”
परमेश्वर उन सामर्थ इन यरूशलेम टु होळोद
ईदुर मा करूबगोळ पंख नेगदव, अदिक चक्का अऊर सांगुळ सांगुळ नळदव; अदिक इस्त्राएल उन परमेश्वर उन सामर्थ अऊर म्याकुच ईरोद. आग यहोवा अन सामर्थ नगर इन बीच दा टु यदकु आ पहाळी मा ठहरूसेत जो नगर इन पूर्व दी आद. बाक आत्मा नानी नेगुत, अदिक परमेश्वर उन आत्मा अन शक्ती देल दर्शन दा नानी कसदी अन द्याश दा बन्दीगोळ हाती पोहचुस बुट्टुन. जो दर्शन दा ना हासिल माळीदीन अद काळदोत. बाक यास मातगोळ यहोवा नानी तोर्सीदुन, अव ना बंदीगोळी हेळ बुट्टीन.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.