निर्गमन 6

1बाक यहोवा मूसा से अंदुन, “ ना फिरौन उन सांगुळ माळाईन, ईग नी अदरी नोळ्‍या, आव नान महान शक्ती इन कारण तान द्याश टु आंदरी कळाईन बिना संकोच देल नान महान शक्ती इन कारण आव आंदरी तेग्द बुट्टान.”

परमेश्वर उन द्वारा मूसा अन कारूकु आगोद

21

परमेश्वर मूसा से अंदुन, “ना यहोवा हुईन. 32ना सर्वशक्तिमान ईश्‍वर उन हेसुर देल अब्राहम, इसहाक, अदिक याकूब उक दर्शन कोळीन, लेकीन यहोवा अन हेसुर देल ना आंदुर मा प्रगट आगीदील. 43अदिक ना आंदुर सांगुळ तान वाचा मजबुत माळीन, मतलब कनान द्‍याश यदुर दा आंदुर परदेशी आगकु ईरतोगोर, आऊक आंदरी कोट बुळाईन. 5इस्त्राएली यारी मिस्त्री लॉकुर दासत्‍व दा ईटतार, आंदुर कन्नासोद भी केळकु ना तान वाचा अक याद माळीन. 6ई कारण नी इस्त्राएलीगोळ से अन, ‘ना यहोवा हुईन, अदिक नीमी मिस्त्रीगोळ बोझ इन ल्‍यालमा टु तेगाईन, अदिक आंदुर स्‍यावा दा टु नीमी बिळसाईन, अदिक तान भुजागोळ वाळुसकु अदिक भारी दण्‍ड कोटकु नीमी बिळ्‍स बुळाईन, 7अदिक ना नीमी तान प्रजा माळोर साटी अपनुस कोमाईन, अदिक ना नीम परमेश्वर ठहरुसाईन; अदिक नीव जान्‍स कोंडीर कि ना नीम परमेश्वर यहोवा हुईन जो नीमी मिस्त्रीगोळ्द बोझ इन ल्‍यालमा टु तेगुकु तंदीन, 8अदिक याता द्‍याश इन कोळोद किर्‍या ना अब्राहम, इसहाक, अदिक याकूब से तिंदीदीन अदुर दा नीमी पोहचुस्कु अदरी नीम्‍द अधिकार माळ बुळाईन. ना रा यहोवा हुईन.’”

9ई मातगोळ मूसा इस्त्राएलीगोळी केळ्‍सदुन, लेकीन आंदुर मन इन बेचैनी अदिक स्यावा अन क्रुरता अन कारण आऊन केळीदील.

10आग यहोवा मूसा से अंदुन, 11“नी होगकु मिस्त्र अन राजा फिरौन से अन कि इस्त्राएलीगोळी तान द्‍याश दा टु होगगोळ.” 12लेकीन मूसा यहोवा से अंदुन, “नोळ, इस्त्राएलीगोळ नान केळीदील; बाक फिरौन नान तोतळा माताळावाळा अन ह्‍यांग केळ्‍यान?” 13आग यहोवा मूसा अदिक हारून उक इस्त्राएलीगोळ अदिक मिस्त्र अन राजा फिरौन उन साटी ई अभिप्राय देल आग्‍या कोट्‍टुन कि आंदुर इस्त्राएलीगोळी मिस्त्र द्‍याश टु तेगुकु ओयुल.

मूसा अदिक हारून उन वंशावली

14आंदुर पुर्वजगोळ्‍द घराना नोर मुख्‍य मंळसा ईंदुर उर: इस्त्राएल उन धोळ पार, रूबेन उन पारगोळ: हनोक, पल्लू, हेस्त्रोन अदिक कर्मी; ईंदुर देल अच रूबेन उन वंश होट्‍टव. 154शिमोन उन पारगोळ: यमूएल, यामीन, ओहद, याकीन अदिक सोहर, अदिक ऊंद कनानी आर्त इन पार शाऊल; ईंदुर देल अच शिमोन उन कुल होट्‍टव. 165लेवी इन पारगोळ यार देल आंदुर्द वंशावली नळदाव, आंदुर हेसुर ईव हुव: मतलब गेर्शोन, कहात अदिक मरारी; अदिक लेवी इन पुरा अवस्‍था ऊंद सौ सदतीस साल इन आत. 17गेर्शोन उन पार यार देल आंदुर कुल नळदाद: लिबनी अदिक शिमी. 186कहात उन पारगोळ: अम्राम, यिसहार, हेब्रोन अदिक उज्जीएल; अदिक कहात उन पुरा अवस्‍था ऊंद सौ सदतीस साल उन आत. 19मरारी इन पारगोळ: महली अदिक मूशी. लेवीगोळ्‍द कुल यार देल आंदुर वंशावली नळदाद ईंदुरा हुर. 20अम्राम तान फुय योकेबेद से मदा माळदुन अदिक आकिन से हारून अदिक मूसा पैदा आदुर; अदिक अम्राम उन पुरा अवस्‍था ऊंद सौ सदतीस साल इन आत. 21यिसहार उन पारगोळ: कोरह, नेपेग अदिक जिक्री ईरोर. 22उज्जीएल उन पारगोळ: मीशाएल, एलसाफान अदिक सित्री. 23हारून अम्‍मीनादाब उन पोर, अदिक नहशोन उन आकतींग एलीशेबा से मदा माळदुन; अदिक आकिन से नादाब, अबीहू, एलीआजर अदिक ईतामार पैदा आदुर. 24कोरह अन पारगोळ: अस्‍सीर, एलकाना अदिक अबीआसाप; अदिक ईंदुर देल अच कोरह वंश इन कुल टु होट्‍टुर. 25हारून उन पार एलीआजर पूतीएल उन पोर इन से मदा माळदुन; अदिक आकिन से पीनहास पैदा आदुन. ईंदुर देल अच आंदुर कुल नळुत. लेवीगोळ्‍द पुर्वजगोळ घराना नोर मुख्‍य मंळसागोळ ईंदुरा उर.

26हारून अदिक मूसा ईंदुरा हुर यारी यहोवा ईद आग्‍या कोट्टान: “इस्त्राएलीगोळी दल दल माळकु आंदरी जमा माळकु मिस्त्र द्‍याश टु तेगुकु तरी.” 27ईंदुर आंदुरा मूसा अदिक हारून हुर यार मिस्त्र द्‍याश इन राजा फिरौन से अंदुर कि नाव इस्त्राएलीगोळी मिस्त्र द्‍याश टु तेगुकु वोतेव.

मूसा अदिक हारून उक परमेश्वर उन आदेश

28याग यहोवा मिस्त्र द्‍याश दा मूसा से ईद मात अंदुन, 29“ आव मूसा से अंदुन, ना यहोवा हुईन; इदुरसाटी जो येनारा ना नीन से अनाईन अद सप्‍पा मिस्त्र अन राजा फिरौन से अनेत.” 30लेकीन मूसा यहोवा अक उत्‍तर कोट्‍टुन, “ना रा माताळदुर दा तोतळा आईन; अदिक फिरौन ह्‍यांग नांद केळ्‍यान?”