परमेश्वर उन वचन
निर्गमन 5
फिरौन उन मुंद मूसा अदिक हारून
आग मूसा अदिक हारून होगकु फिरौन से अंदुर, “इस्त्राएल इन परमेश्वर यहोवा ईद अनतान: ‘नान प्रजा अन लॉकुरी होगगोळ कि आंदुर आळी दा नान साटी हाब्ब मनुस्यार.’” फिरौन अंदुन, “यहोवा याव हुन कि ना आऊन वचन मान्सकु इस्त्राएलीगोळी होगगोळाईन? ना यहोवा अक अरालीन, अदिक ना इस्त्राएलीगोळी होगगोळतीदील.” आंदुर अंदुर, “इब्रीगोळ परमेश्वर नाम से मुलाकात माळ्यान; इदुरसाटी नामी आळी दा मुर दिन इन हादी मा होगगोळ, कि तान परमेश्वर यहोवा अन साटी बलिदान माळेव, हींग आगबाळुल कि आव नाम दा मरी फैलुस्यान या तलवार नळसुस्यान.”
मिस्त्र अन राजा आंदुर से अंदुन, “हे मूसा, हे हारून, नीव येती लॉकुर से क्याल्सा बिळसुसोद चाहासतीर? नीव होगकु तान तान ओझा नेगी.” अदिक फिरौन अंदुन, “केळी, ई द्याश दा आ लॉकुर हापाळ आगेग्यार, बाक नीव आंदरी मयनत देल आराम कोळोद चाहासतीर!” फिरौन अदा दिशी आ मयनत माळसुसावाळेर इक जो आ लॉकुर म्याकुच ईरोर, अदिक आंदुर स्याणा अक ईद आग्या कोट्टुन, “नीव जो ईगासताका ईटागोळ माळोर साटी लॉकुरी भुसा कोळतोगीर, अद मुंदु टु कोळ बाळेतीर; आंदुर खुद अच होगकु तान साटी भुसा जमा माळुल. तरी भी यास ईटागोळ ईगासताका आंदरी माळव बिळव आसा मुंद भी आंदुर से माळसुसेतीर, ईटागोळ्द गिनती येनु गोर्त माळबाळेतीर; यतिकी आंदुर आलसी आर, ई कारण ईद अंदकु चिळ्लासतार, ‘नाव होगकु तान परमेश्वर उन साटी बलिदान माळेव.’ आ मंळसागोळ से मात्त यक्कुल क्याल्सा माळसुसकु आगुल कि आंदुर अदुर दा मयनत माळतेला ईरूल अदिक ख्वाटा मातगोळ मा ध्यान कोळबाळुल.”
आग लॉकुर मयनत माळसुसावाळेर अदिक मुखियागोळ व्हार्या होगकु आंदुर से अंदुर, “फिरौन हींग अनतान, ‘ना नीमी भुसा कोळालीन. नीवा खुद होगकु भुसा ढुंढ्सकु तरी; लेकीन नीम क्याल्सा येनु अच गोर्त माळकु आगतीदील.’” इदुरसाटी आ लॉकुर पुरा मिस्त्र द्याश दा तितर बितर आदुर कि भुसा अन बदला लेल्ल इन छळी तंदुर. मयनत माळसुसावाळेर ईद अंद अंदकु आंदुर से जल्दी माळसुस्त ईत्तुर, कि याता प्रकार देल नीव काड्डा ताकोमकु माळतोगीर अदा प्रकार देल तान हर दिन इन क्याल्सा ईग भी पुरा माळी. अदिक इस्त्राएलीगोळ दा टु याता मुखियागोळी फिरौन उन मयनत माळसुसावाळेर आंदुर अधिकारी ठहरूसीदुर, आंदुर बळ्सकोंडुर अदिक आंदुर से केळकु आत, “येन कारण आद कि नीव तान ठहरूस्द ईटागोळ गिनती इन अनुसार पयला अन घाई नाळ अदिक ईंद पुरा माळसुसीदील?”
आग इस्त्राएलीगोळ्द मुखियागोळ होगकु फिरौन उन दुहाई ईद अंदकु कोट्टुर, “नी तान दासगोळ से हींग बर्ताव येती माळत्या? नीन दासगोळी भुसा रा कोटकु अच आगाल अदिक आंदुर नाम से अनतोगतार, ‘ईटागोळ माळी, ईटागोळ माळी, ’ अदिक नीन दासगोळ भी बळ्सकोंडार; लेकीन दोष नींदा लॉकुर्द आद.” फिरौन अंदुन, “नीव आलसी अदिक कोळी आईर; ईदा कारण अनतीर कि नामी यहोवा अन साटी बलिदान माळली होगगोळ. ईग होगकु तान क्याल्सा माळी; अदिक भुसा नीमी सिकतीदील, लेकीन ईटागोळ्द गिनती आट अच पुरा माळोद बिद्दीत.” याग इस्त्राएलीगोळ्द सरदारगोळ ई मात केळदुर कि आंदुर ईटागोळ्द गिनती गोर्त आगतीदील, अदिक हर दिशी आटा क्याल्सा पुरा माळोद बिद्दीत, आग आंदुर अर्त कोंडुर कि आंदुर संकट इन दिन होट बंदाव. याग आंदुर फिरौन उन हात्ती टु व्हार्या होट बुट्टुर आग मूसा अदिक हारून, जो आंदुर से मुलाकात माळली निदुरकु ईरोर, आंदरी सिकदुर; अदिक आंदुर मूसा अदिक हारून से अंदुर, “यहोवा नीम मा दृष्टी माळकु न्याय माळुल, यतिकी नीव नामी फिरौन अदिक आऊन कर्मचारीगोळ नजर दा घृणित ठहरूसकु नामी घात माळोर साटी आंदुर कय दा तलवार कोट बुटीर,”
मूसा अन्द परमेश्वर से शिकायत
आग मूसा यहोवा अन हात्ती होगकु अंदुन, “हे प्रभु, नी ई प्रजा अक तकलीफ येती कोट्ट? अदिक नी नानी ईल येती कळुद? यागी टु ना नीन हेसुर देल फिरौन उन हात्ती मात हेळोर साटी होदीन आगी टु आव ई प्रजा अन सांगुळ बुरा अच दुरव्यवहार माळ्यान, अदिक नी तान प्रजा अन येनु अच छुटकारा माळीदील.”
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.