निर्गमन 15

मूसा अन हाळ

11

आग मूसा अदिक इस्त्राएलीगोळ यहोवा अन साटी ईद हाळ हाळदुर. आंदुर अंदुर, ना यहोवा अन हाळ हाळाईन, यतिकी आव महाप्रतापी ठहरूस्यान;

आव घ्वाळागोळ सांगुळ घुळसवारगोळी समुद्र दा वाहुस बुट्टुन. 22

यहोवा नान बल अदिक भजन इन विषय हुन,

अदिक आवा नान उद्धार भी ठहरूस्यान;

नान परमेश्वर आवा हुन, ना आऊंदा स्तुति माळाईन, ना आऊन साटी निवासस्थान माळाईन,

नान पुर्वजगोळ्द परमेश्वर आवा हुन, ना आऊन सराहना माळाईन.

3यहोवा योद्धा आन;

आऊन हेसुर प्रभु आद.

4आव फिरौन उन रथगोळ अदिक सेनागोळी आव समुद्र दा भिट बुट्टुन;

अदिक आऊन वळ्लेव से वळ्लेव रथगोळ क्याचाँद समुद्र दा मुळकेदव.

5गयरा नीर आंदरी मुचबुळ्त; आंदुर कल्ल घाई गयरा जागागोळ दा मुळकेदुर.

6हे यहोवा, नीन ऊजवा कय शक्ति दा महाप्रतापी आत;

हे यहोवा, नीन ऊजवा कय दुश्मन उक केचकांदा माळ बुळतद.

7नी तान विरोधीगोळी तान महाप्रताप से केळ्द बुळत्या;

नी तान क्रोध भळकुसत्या, अदिक आंदुर भूसा अन घाई भस्म आगेगतार;

8नीन मुग्ग इन श्वास देल नीर ऊंदाओजी आगेत,

धारागोळ ढेर इन घाई रूक्सदव;

समुद्र अन बीच दा गयरा नीर जम्सेत.

9दुश्मन अंदिदुन,

“ना पीछा माळाईन, ना होगकु हुडाईन,

ना लुट इन माल इक वाट्स कोमाईन,

अऊर देल नान जीव तुम्मेदीत.

ना तान तलवार जेडुतेला अच तान कय देल आंदरी नष्ट माळ बुळाईन.”

10नी तान श्वास इन पवन नळ्सद,

आग समुद्र आंदरी मुचबुळ्त;

आंदुर भयानक नीर दा काच इन घाई मुळकेदुर.

11हे यहोवा, देवतागोळ दा नीन तुल्य यार आर?

नी रा पवित्रता अन कारण महाप्रतापी,

अदिक तान स्तुति माळावाळेर्द अंज्क इन योग्य,

अदिक आश्चर्यकर्म इन कर्ता हुय.

12नी तान ऊजवा कय वाळुस्द,

अदिक धरती दुश्मनगोळ इक नुंगबुटाद.

13तान करूणा देल नी तान बिळ्सद प्रजा अन अगुवाई माळ्या,

तान ताकद देल नी अदरी तान पवित्र निवासस्थान इक ओयेत्या.

14द्याश द्याश इन लॉकुर केळकु नळग्यार;

पलिश्तीगोळ्द जीवा अन हाल बेहाल आगेदव.

15एदोम उन अधिपति व्याकुल आदार;

मोआब उन पयलवान नळ्गतेला यद्दार;

सप्पा कनान दा ईरावाळेर्द मन पिघलुसेदाव.

16आंदुर दा अंज्क अदिक घबराहट तुम्मेदीत;

नीन खांदागोळ प्रताप देल आंदुर कल्ल इन घाई निर्जीव आगेदार.

यागासताका, हे यहोवा, नीन प्रजा अन लॉकुर होटबुळालुर,

यागासताका नीन प्रजा अन लॉकुर यारी नी कोंड्या आप्पाटी होटबुळालुर.

17नी आंदरी पोहचुस्कु तान खुद इन भागवाळा पहाळी मा बसुस्या, ईद अदा जागा हुन, हे यहोवा,

यदरी नी तान निवास इन साटी बनुस्या,

अदिक अदा पवित्रस्थान हुन यदरी, हे प्रभु,

नी खुद अच स्थिर माळ्या.

18यहोवा हमेशा हमेशा राज्य माळ्त ईत्‍तान.

मरियम इन हाळ

19ईद हाळ हाळोद कारण ईद आद, कि फिरौन उन घ्वाळागोळ, रथगोळ अदिक सवारगोळ समेत समुद्र अन न्याड्या दा होटोदुर, अदिक यहोवा आंदुर म्याकुच समुद्र अन नीर वाहुसदुन; लेकीन इस्त्राएलीगोळ समुद्र अन न्याड्या वळ्गींद जागा मा टु आगतेला होटोदुर. 203आग हारून उन आकतींग मरियम हेसुर नबिया कय दा टापटी हुळदुर; अदिक सप्पा आर्तेर टापटी हुडुकु कुणुतेला आकिन हींद आगेदुर. 21अदिक मरियम आंदुर सांगुळ ईद हाळ हाळ्त होदुर:

“यहोवा अन हाळ हाळी, यतिकी आव महाप्रतापी ठहरूस्यान;

घ्वाळागोळ समेत सवारगोळी आव समुद्र दा भिट बुटान.”

केय नीर

22आग मूसा इस्त्राएली लॉकुरी क्याचाँद समुद्र अन मुंद ओतुन, अदिक आंदुर शूर हेसुर इन आळी दा बंदुर; अदिक आळी दा होगतेला मुर दिन ताका नीर इन सोता सिकीदिल. 23बाक मारा हेसुर इन ऊंद जागा मा पोहचुसदुर, अलेव नीर खर्ट ईरोव, अदरी आंदुर कुडु सकीदील; ई कारण आ जागा अन हेसुर 4मारा बित्त. 24आग आंदुर ईद अंदकु मूसा अन विरोध दा बकबक माळली हतदुर, “नाव येन कुळदेव?” 25आग मूसा यहोवा अन दोहाई कोट्टुन, अदिक यहोवा आऊक ऊंद मार्र हेळ बुट्टुन, यदरी याग आव नीर दा हाकदुन, आग अद नीर सय आगेत.

अल्या यहोवा आंदुर साटी ऊंद विधि अदिक नियम माळदुन, अदिक अल्या आव ईद अंदकु आंदुर्द परीक्षा माळदुन, 26“अगर नी तान परमेश्वर यहोवा अन वचन तन मन देल केळ्या, अदिक आऊन आग्यागोळ मा कीव हच्या, अदिक आऊन सप्पा विधिगोळी मानस्या, रा यास रोग ना मिस्त्रीगोळ मा कळीन अऊर दा टु ऊंद भी नीन मा कळुतीदील; यतिकी ना नीमव चंगा माळावाळा यहोवा हुईन.”

27आग आंदुर एलीम इक बंदुर, यल नीर इनव हन्नेळ सोतागोळ अदिक सत्तर खजूर इन मार्रगोळ ईरव; अदिक अल आंदुर नीर इन हात्ती ड्यारागोळ नीदरूसदुर.