प्रेरितगोळ 20

मकिदुनिया अदिक अखाया दा पौलुस

1याग दंगा थामसेत रा पौलुस चेलागोळी कारसुसकु हिम्मत वाळुसदुन, अदिक आंदुर से सार आगकु मकिदुनिया अन्द दी होटोदुन. 2आ सप्पा प्रदेश दा टु आगकु अदिक चेलागोळी हापाळ उत्साहीत माळकु आव अखाया दा बंदुन. 3याग मुर तिंगुळ ईतकु आव अल टु जहाज मा सीरिया अन दी होगोन, रा यहूदी आऊक कोनली ताक दा हतकु ईरोर, इदुरसाटी आव ईद निश्चय माळदुन कि मकिदुनिया आगकु वापस आगेगुल. 4बिरीया अन्द पुर्रुस उन पार सोपत्रुस अदिक थिस्सलुनीके अन्द अरिस्तर्खुस अदिक सिकुन्दुस, अदिक दिरबे अन्द गयुस, अदिक तीमुथियुस, अदिक आसिया अन्द तुखिकुस अदिक त्रुफिमुस आसिया ताका आऊन सांगुळ ईरोर. 5आंदुर मुंद होटोदुर अदिक त्रोआस दा नाम हादी कायतेला ईत्‍तुर. 6अदिक नाव अखमीरी रोट्टी इन हाब्ब खतम आगदुर बाद्दा फिलिप्पी टु जहाज देल होटकु अईद दिन इन बाद्दा त्रोआस दा बंदकु आंदुर से मुलाकात माळदेव, अदिक ऊंद हप्ता अल्या ईत्‍तेव.

पौलुस उन त्रोआस दा आखरी मुलाकात

7बाक नाव शण्यार इन द्यावगा याग ऊमोर साटी आपस दा जमा आदेव, रा पौलुस आंदुर से मातचीत हेळली कुरतुन, आऊक दुसरा दिशी इच होगोद ईरोद, इदुरसाटी आव आर्धा ईळ्लक ताका मातगोळी हेळतेला ईत्‍तुन. 8या म्याकुच इन कमरा दा नाव जमा ईरेव, अदुर दा हापाळ दिंग्या होत्‍तव. 9अदिक यूतुखुस हेसुर इन ऊंद हारोदव खिळकी मा कुर्तकु भर जप्प देल डोलसोन. याग पौलुस हापाळ होत ताका मातगोळी हेळतेला ईत्‍तुन रा आव जप्प इन झ्वाका देल तिसरा मंजील मा टु ल्यालमा बिद्दुन, अदिक याग आंदुर आऊक नेगदुर रा आव सोतोगीदुन. 10लेकीन पौलुस ल्यालमा ईळदुन अदिक आऊन से लपटुसेदुन, अदिक कुतक्या हतकु अंदुन, “घबरूसबाळी; यतिकी आव जित्‍ता आन.” 11अदिक पौलुस म्याकुच होगकु ऊंडुन अदिक ईट होत ताका आंदुर से मातगोळी हेळतेला ईत्‍तुन कि व्हातुर आगेत. बाक आव होटोदुन. 12अदिक आंदुर आ हारोदव पार उक जित्‍ता तंदुर अदिक हापाळ शांती सिक्त.

त्रोआस टु मिलेतुस इक होगोद

13नाव पयले अच जहाज मा कुर्तकु अस्सुस इक ईद विचार देल मुंद होदेव कि अल टु नाव पौलुस उक सांगुळ हुडुकोंडेव, यतिकी आव ईद इदुरसाटी ठहरूसीदुन कि खुद अच पैदल बरोद चाहासोन. 14याग पौलुस अस्सुस दा नामी सिकदुन रा नाव आऊक जहाज दा कुर्सकु मितुलेने नगर दा वळेदेव. 15अल टु जहाज दा कुर्तकु नाव दुसरा दिशी खियुस नगर इन मुंद पोहचुसदेव, अदिक दुसरा दिशी सामुस नगर दा बंदेव; बाक अदुर दुसरा दिशी नाव मिलेतुस नगर दा बंदेव. 16यतिकी पौलुस इफिसुस उन हात्‍ती टु आगकु होगोद निश्चय माळीदुन कि येल्यारा हिंग आगबाळुल कि आऊक आसिया दा समय हतुल; यतिकी आव जल्दी दा ईरोन कि अगर आग सकुल रा आव पिन्तेकुस्त हाब्ब दिशी यरूशलेम दा ईरूल.

पौलुस उन इफिसुस उन स्याणागोळी आखरी भाषण

17पौलुस मिलेतुस नगर टु इफिसुस नगर दा बातणी कळुदुन, अदिक मंडली अन्द स्याणागोळी कार्सुसदुन. 18याग आंदुर आऊन हात्‍ती बंदुर, रा आव अंदुन: नीव जान्सतीर कि पयला अच दिशी टु याग ना आसिया दा पहुचुसदीन, ना हर समय नीम सांगुळ याता प्रकार देल ईत्‍तीन. 19मतलब बळा नम्रता देल, अदिक वर्ल वर्लकु, अदिक आ परीक्षागोळ दा जो यहूदीगोळ्द साजीश इन कारण नान मा बंदकु बित्‍त, ना प्रभु उन स्यावा माळतेला अच ईत्‍तीन; 20अदिक जो जो मातगोळ नीम फायदा नव ईरव, आंदरी हेळली अदिक लॉकुर्द मुंद अदिक मानोन मान्नी कलसोर से यागलु हिंद आगीदील, 21उलटा यहूदीगोळ अदिक गैरयहूदीगोळ्द मुंद गवाही कोळ्त ईत्‍तुन कि परमेश्वर उन दी मन तिर्गुसोद अदिक नाम प्रभु यीशु मसीह मा विश्वास माळ पायजे. 22ईग नोळी, ना पवित्र आत्मा अन आग्या अन अनुसार यरूशलेम इक होगतीन, अदिक जान्सालीन कि अल नान मा येन येन बितसीत; 23ना रा बस ईट चाहासतीन कि हर ऊंद नगर दा पवित्र आत्मा नानी चेतावनी कोळतद कि बंदीगृह अदिक मुश्किल घळीगोळ नान हादी कायताव. 241लेकीन ना तान जीव इक येनु समसालीन, सिर्फ ईट चाहासतीन कि प्रभु यीशु उन कोळ्द क्याल्सा अक पुरा माळाईन, जो क्याल्सा आव नानी कोटान, अदिक अद क्याल्सा ईद कि परमेश्वर उन अनुग्रह अन्द खुशखबरी इन घोषणा माळाईन.

25ना परमेश्वर उन राज्य अन प्रचार नीम सप्पा मुंदुर दा माळ्त ओयाळदिन, अदिक ना जान्सतीन कि नीम दा टु नानी यावारा भी यागलु नोळ सकतीदिल. 26इदुरसाटी ना ईंद इन दिशी पुरा रीति अदिक सफाई देल नीम से अनतीन, कि नीम नाश इन जिम्मेदार ना आल्लच ना निर्दोष आईन. 27यतिकी ना परमेश्वर उन पुरा योजना जो नीम साटी आव, पुरा रीति देल हेळोर साटी हिंद आगीदील. 28तान अदिक तान लॉकुर्द पुरा गुट इन देखभाल माळावाळेर बन्सी यतिकी पवित्र आत्मा आंदुर दा टु नीमी आंदुर्द चिंता माळावाळा माळ्यान, कि नीव परमेश्वर उन मंडली अन्द रखवाली माळी, यारी आव तान खुन देल कोंडीदुन. 29ना जान्सतीन कि नान होगदुर बाद्दा भयंकर लांडग्यागोळ नीम लॉकुर न्याड्या होक्‍केव अदिक अव ई भोला भाला लॉकुर गुट इक बिळतीदील. 30हिंग समय बंदीत कि नीम्द अच न्याड्या दा टु भी हिंग-हिंग लॉकुर येद्दार जो चेलागोळी तान हींद जेडुली उलटा सिधा मातगोळी हेळ्यार. 31इदुरसाटी सावधान ईरी, अदिक याद ईटेतीर कि ना मुर वर्ष ताका ईळ्ल हागुल वर्ल वर्लकु हर ऊंद मंळसा अक कलसीन.

32अदिक ईग ना नीमी परमेश्वर उक, अदिक आऊन अनुग्रह अन्द बातणी इन कय दा सोप्स बुळतीन; जो नीमी पवित्र माळ सकतान अदिक सप्पा लॉकुर दा सप्पा आशीष कोळ सकतान. 33ना यारदारा बेळ्ली, व्हान्ना या कपळा अन लालच माळीदील. 34नीव खुद अच जान्सतीर कि ईवा कयगोळ नान अदिक नान संगीगोळ्द जरवत पुरा माळदव. 35ना नीमी सप्पा येनारा माळकु तोर्सदीन कि ईद रीति देल मेहनत माळतेला निर्बलगोळी संभालसोद अदिक प्रभु यीशु उन वचन याद ईटोद जरूरी आद, जो आव खुद अच अंदिदुन: ताकोमोर से कोळोद वळ्लीद आद.

36ईद अनकु पौलुस आंदुर सांगुळ ट्वांगरा टेक्सदुन प्रार्थना माळदुन. 37आग आंदुर सप्पा मुंदुर हापाळ वर्लदुर अदिक पौलुस उन कुतक्या हुडुकु आऊन चुम्मा ताकोमली कुरतुर अदिक सार माळदुर. 38आंदुर खास माळकु ई मात देल शोक दा ईरोर जो आव अंदिदुन कि नीव नान मार्रा बाक नोळतीदिल. आग आंदुर आऊक जहाज ताका पोहचुसदुर.