प्रेरितगोळ 19

इफिसुस नगर दा पौलुस

1याग अपुल्लोस कुरिन्थुस दा ईरोन, रा पौलुस म्याकुच इन सप्पा प्रदेश टु यात्रा माळतेला इफिसुस दा बंदुन. अल आऊक थ्वाळासा चेलागोळ सिकदुर

2आव आंदुर से केळदुन, “येन नीव विश्वास माळावती पवित्र आत्मा अक नोळदीर?” आंदुर आऊन से अंदुर, “नाव रा पवित्र आत्मा अन्द चर्चा भी केळीदील.”

3आव आंदुर से अंदुन, “रा बाक नीव यार्द बपतिस्मा ताकोंडीर?” आंदुर अंदुर,

“यूहन्ना अन्द बपतिस्मा.” 41

पौलुस अंदुन, यूहन्ना आंदरी बपतिस्मा कोट्टुन कि आंदुर तान पापगोळ देल तिरगुल, कि जो नान बाद्दा बरावाळा आन, आऊन मा मतलब यीशु मा विश्वास माळेतीर.

5ईद केळकु आंदुर प्रभु यीशु उन हेसुर दा बपतिस्मा ताकोंडुर. 6याग पौलुस आंदुर मा कय ईटदुन, रा पवित्र आत्मा आंदुर मा ईळुत, अदिक आंदुर अलग-अलग भाषा माताळली अदिक भविष्यवाणी माळली कुरतुर. 7इंदुर सप्पा लगभग हन्नेळ मंळसा ईरोर.

8आव यहूदी सभागृह दा होगकु मुर तिंगुळ ताका निडर आगकु माताळतेला ईत्‍तुन, अदिक परमेश्वर उन राज्य अन्द बारा दा झगळा माळतेला अदिक समझुसतेला ईत्‍तुन. 9लेकीन याग येनारा लॉकुर कठोर आगकु आऊंद मान्सीदील उलटा लॉकुर मुंद ई हादी अक बेकार अनली कुरतुर, रा आव आंदरी बिट बुटुन अदिक चेलागोळी अलग माळ बुटुन, अदिक रोज तुरन्नुस उन शिक्षा अन मान्ना दा झगळा माळतोगोन. 10येढ्ढ वर्ष ताका ईदा आगतेला ईत्‍त, ईल ताका कि आसिया नोर ईरावाळेर येन यहूदी येन गैरयहूदी सप्पा प्रभु उन वचन केळ कोंडुर.

स्केवा अन पार

11परमेश्वर पौलुस उन कयगोळ देल सामर्थ्य अन्द अनोखा क्याल्सा तोर्सतोगोन. 12ईल ताका कि रूमाल अदिक गमछा आऊन मय देल स्पर्श माळसुसकु बिमारगोळ मा हाकतोगोर, अदिक आंदुर बिमारीगोळ होग्त ईरतोगोव; अदिक दुष्टआत्मागोळ आंदुर दा टु होट बुळतोगव. 13लेकीन येनारा यहूदी जो झाळ फुक माळ्त टेटाळोर, आंदुर प्रभु यीशु मसीह अन हेसुर इस्तेमाल माळली कुरतुर आंदुर दुष्टआत्मागोळी अनतोगोर, “या यीशु उन प्रचार पौलुस माळतान, ना नीमी आ यीशु उन हेसुर देल आग्या कोळतीन.” 14अदिक स्क्किवा हेसुर इन ऊंद यहूदी प्रधान याजक उन येळ चिकोर ईरोर, जो हिंग माळतोगोर.

15लेकीन दुष्टआत्मा आंदरी उत्‍तर कोळ्त, “यीशु उक ना अरूतीन, अदिक पौलुस उक भी अरूतीन, लेकीन नीव यार हुईर?”

16अदिक आ मंळसा यारदा दुष्टआत्मा ईरोद आंदुर मा हावी आगकु अदिक आंदरी वश दा तनकु, आंदरी हिंग बडुत कि आंदुर ऊगळा अदिक घायल आगकु आ मान्या टु होटकु ओळदुर. 17ईद मात इफिसुस इन ईरावाळेर सप्पा यहूदी अदिक गैरयहूदी भी जान्स कोंडुर, अदिक आ सप्पा मुंदुर दा अंज्क तुम्मेत; अदिक प्रभु यीशु उन हेसुर इन बळाई आत. 18यार विश्वास माळीदुर, आंदुर दा टु हापाळ मुंदुर बंदकु तान तान बेकार क्याल्सागोळी मान्स कोंडुर अदिक अल बंदुर. 19जादू माळावाळेर दा टु हापाळ मुंदुर तान तान पोथळीगोळी जमा माळकु सप्पा मुंदुर मुंद होताक बुटुर, अदिक याग अऊर्द दाम जोळ्सकु आत, रा पचास हजार बेळ्ली इन सिक्‍कागोळ बराबर होळ्त. 20ई प्रकार प्रभु उन वचन बलपूर्वक फैलुस्त अदिक मजबूत आगतेला होत.

इफिसुस नगर दा दंगा

21याग ई मातगोळ आगेदव रा पौलुस मन दा ठान्सदुन कि मकिदुनिया अदिक अखाया टु आगकु यरूशलेम इक होगाईन, अदिक अंदुन, “अल होगदुर बाद्दा नानी रोम इक भी नोळोद जरूरी आद.” 22इदुरसाटी तान स्यावा माळावाळेर दा टु तीमुथियुस अदिक इरास्तुस उक मकिदुनिया कळुकु खुद थ्वाळासा दिन आसिया दा ईतोदुन.

23आ समय इफिसुस दा प्रभु उन हादी इन बारा दा बळा हंगामा आत. 24अल बेळ्ली इन क्याल्सा माळावाळा देमेत्रियुस हेसुर इनव ऊंद सोनार ईरतोगोन आव देवी अरतिमिस इन बेळ्ली इन मंदिर माळतोगोन, यदुर देल कारीगरगोळी हापाळ फायदा सिकतोगोद. 25आव आंदरी अदिक हिंग अच वस्तुगोळ्द कारीगरगोळी जमा माळकु अंदुन, “हे मंळसागोळा, नीव जान्सतीर कि ई क्याल्सा देल नामी याट धन सिकतद. 26नीव नोळतीर अदिक केळतीर कि सिर्फ इफिसुस अच दा ईला, उलटा सप्पा आसिया क्षेत्र दा ईद अन अनकु ई पौलुस हापाळ सा लॉकुरी समझुसदुन, कि जो कय इन कारीगरी आद, आंदुर परमेश्वर आल्लच. 27इदुर देल ईग सिर्फ ईदा मात इन अच अंज्क हैलेच कि नाम ई धंदा अन्द महत्व होग्त ईत्‍तीत, उलटा ईद कि महान देवी अरतिमिस इन मंदिर तुच्छ सम्सकु आदीत, अदिक यारी सप्पा आसिया अदिक दुनिया पुजा माळतद आकिन महत्व भी होग्त ईत्‍तीत.”

28आंदुर ईद केळकु सिट्ट देल तुम्मेदुर अदिक चिल्ळास चिळ्लासकु अनली कुरतुर, इफिसिगोळ अरतिमिस देवी, महान आर! 29अदिक सप्पा नगर दा धोळ्द हंगामा मचुसेत, अदिक लॉकुर गयुस अदिक अरिस्तर्खुस उक जो पौलुस उन संगी यात्री ईरोर जो मकिदुनिया टु बंदीदुर, आंदरी हुळ्द बुटुर, अदिक नाटक घर दा ओतुर. 30याग पौलुस लॉकुर्द हात्‍ती बुळ्क होगोद चाहासदुन रा चेलागोळ आऊक होग गोटीदील. 31आसिया नोर शासकगोळ दा टु भी आऊन कई संगीगोळ आऊन हात्‍ती बातणी कळुदुर अदिक विनती माळदुर कि नाटक घर दा होगकु जोखिम नेगुबाळेत. 32अल यावारा येनारा चिल्ळासोन रा यावारा येनारा, यतिकी सभा दा बळा गळबळी आगोद, अदिक हापाळ सा लॉकुर रा ईद जानसोर भी ईला कि नाव यदुर साटी जमा आगेव. 33आग आंदुर सिकन्दर उक, यारी यहूदीगोळ निदरूसिदुर, भीळ दा टु मुंद वाळुसदुर. सिकन्दर कय देल इशारा माळकु लॉकुर मुंद खुद इन बचाव इन साटी भाषण कोळोद चाहासोन. 34लेकीन याग आंदुर जान्स कोंडुर कि आव यहूदी हुन, रा सप्पा च्या सप्पा ऊंद आवाज देल कम से कम येढ्ढ तास ताका चिल्ळासतेला ईत्‍तुर, “इफिसिगोळ अरतिमिस, महान आर.”

35आग नगर इन लेखा जोखा ईटावाळा लॉकुरी शांत माळकु अंदुन, “हे इफिसुस इन लॉकुरा, येन दुनिया दा हिंग यावारा मंळसा आन जो जान्सालुन कि इफिसिगोळ नगर इन महान देवी अरतिमिस, मंदिर इन अदिक स्वर्ग टु बिळावाळा पवित्र कल्ल इन रक्षा माळावळ्त उर. 36इदुरसाटी जब कि ई मातगोळ्द खंडन अच आगसकाल, रा उचित आद कि नीव शांत ईरी अदिक बिना सोच्द सम्द येनु माळबाळी. 37यतिकी नीव ई मंळसागोळी तंदीर जो ना मंदिर इन लुटसावाळेर आर ना नाम देवी इन अपमान माळावाळेर उर. 38अगर देमेत्रियुस अदिक आऊन संगी कारीगरगोळी यारदारा से शिकायत आद रा कचेरी खुला आद अदिक शासक भी आन; अल होगकु आंदुर आबुर दाबुर मा आरोप हचुल. 39लेकीन अगर नीव यातोदारा दुसरा मात इन बारा दा येनारा केळोद चाहास्तीर, रा कानूनी सभा दा फैसला माळकु आदीत. 40यतिकी ईंद इन दंगा अन्द कारण नाम मा दोष हच्चोद अंज्क आद, इदुरसाटी कि इदुर येनु कारण हैलेच, अदिक नाव ई भीळ इन जमा आगोद येनु उत्‍तर कोळ सकालेव.” 41ईद अनकु नगर इन लेखा जोखा कोळावाळा सभा अक सार माळदुन.