प्रेरितगोळ 18

कुरिन्थुस नगर दा पौलुस

1इदुर बाद्दा पौलुस एथेंस नगर इक बिटकु कुरिन्थुस नगर दा बंदुन. 2अल आऊक अक्विला हेसुर इन ऊंद यहूदी सिकदुन, यार्द जनम पुन्तुस दा आगीत. आव तान हिंग्स प्रिसकिल्ला अन्द सांगुळ इटली टु ईग ईग अच बंदीदुन, यतिकी क्लौदियुस सप्पा यहूदीगोळी रोम टु होट्ट बुळोद आग्या कोटीदुन. इदुरसाटी आव आंदुर अल होदुन. 3आंदुर ऊंदा ऊज्या ईरतोगोर अदिक आंदुर क्याल्सा ऊंदा ईरोद आंदुर तान कमाई इन साटी तम्बू माळोद क्याल्सा माळतोगोर. 4आव हर ऊंद आराम इन दिन यहूदी लॉकुर्द सभागृह दा झगळा माळकु यहूदीगोळ अदिक गैरयहूदीगोळी भी समझुस तोगोन.

5याग सीलास अदिक तीमुथियुस मकिदुनिया टु बंदुर, रा पौलुस वचन केळ्सदुर दा पुरा समय कोट्टुन अदिक यहूदीगोळी गवाही कोळली कुरतुन कि यीशु उच मसीह हुन. 6लेकीन याग आंदुर विरोध अदिक अपमान माळली कुरतुर, रा आव तान कपळा झाळ्सकु आंदुर से अंदुन, “नीम सायोद कारण नीव खुद आईर! ना निर्दोष आईन. अदिक इदुर जिम्मेदार ना हैलेच, ईग टु ना गैरयहूदीगोळ्द हाती होगाईन.” 7अल टु होटकु आव तीतुस यूस्तुस हेसुर इन परमेश्वर उन आराधना माळावाळा ऊंद मंळसा अन्द मान्या बंदुन; यार्द मान्ना यहूदी सभागृह टु हतकु ईरोद. 8आग सभागृह अन सरदार क्रिसपुस तान सप्पा घराना समेत प्रभु मा विश्वास माळदुन; अदिक हापाळ सा कुरिन्थवासी ईद बातणी केळकु विश्वास माळदुर अदिक बपतिस्मा ताकोंडुर.

9प्रभु ऊंद ईळ्लकी दर्शन इन द्वारा पौलुस से अंदुन, “अंजबाळ, उलटा अनतेला ईर अदिक सुंगा ईरबाळ; 10यतिकी ना नीन सांगुळ आईन, अदिक याऊ नीन मा चढ़ाई माळकु अपमान हानि माळतीदील; यतिकी ई नगर दा नान हापाळ सा लॉकुर आर.” 11इदुरसाटी आव आंदुर्दा परमेश्वर उन वचन कल्सतेला दिळ वर्ष ताका ईत्‍तुन.

12याग गल्लियो अक अखाया द्याश इन शासक माळकु आत, आग यहूदी लॉकुर ऊंद आगकु पौलुस मा येरतेला बंदुर, अदिक आऊक न्याय आसन इन मुंद तंदुर, 13अदिक अनली कुरतुर, “ईव लॉकुरी समझुस्तान कि परमेश्वर उन उपासना हिंग रीति देल माळी, जो नाम्द व्यवस्था अन्द विपरीत आद.”

14याग पौलुस माताळदुर मा अच ईरोन, रा गल्लियो यहूदीगोळ से अंदुन, “हे यहूदीगोळा, अगर ईद येनारा अन्याय या दुष्टता अन्द मात आगाईत, रा उचित ईरोद कि ना नीम्द केळायदिन. 15लेकीन अगर ईद झगळा शब्दगोळ, अदिक हेसुरगोळ, अदिक नीम खुद इन व्यवस्था अन्द बारा दा आद, रा नीव अच खुद सुलझुसी; यतिकी ना ई मातगोळ्द न्यायी बनसोद चाहासालीन.” 16अदिक आव आंदरी न्याय आसन इन मुंद टु तेगसुसबुटुन. 17आग सप्पा लॉकुर सभागृह अन अध्यक्ष सोस्थिनेस उक हुळकु न्याय आसन इन मुंद बळदुर. लेकीन गल्लियो ई मातगोळ मा ध्यान कोटीदील.

अन्ताकिया अक वापस होगोद

18पौलुस हापाळ दिन ताका कुरिन्थुस दा ईत्‍तुन. बाक विश्वासी वार्टुर से विदा ताकोमकु जहाज देल सीरिया होदुन आग आऊन सांगुळ प्रिसकिल्ला अदिक अक्विला भी ईरोर. पौलुस किंख्रिया दा तान मुंडन माळदुन, यतिकी आव ऊंद मन्नत बेळीदुन. 19आव इफिसुस पोहचुस्कु प्रिसकिल्ला अदिक अक्विला अक अल बिट्टुन, अदिक खुद सभागृह दा होगकु यहूदीगोळ से झगळा माळली कुरतुन. 20याग अलेर लॉकुर आऊन से विनती माळदुर, “नाम सांगुळ अदिक थ्वाळासा दिन ईर.” रा आव स्वीकार माळीदील; 21लेकीन ईद अनकु आंदुर से सार आदुन, “अगर परमेश्वर चाहास्यान रा ना नीम हात्‍ती मात्‍त बराईन.” आग आव इफिसुस टु जहाज मा कुर्तकु होटोदुन;

22अदिक कैसरिया दा ईळुकु यरूशलेम इक होदुन अदिक मंडली अक मुलाकात माळकु अन्ताकिया दा बंदुन. 23बाक येनारा दिन अन्ताकिया दा ईतकु गलातिया अदिक फ्रूगिया क्षेत्र टु आगतेला होट्टुन, अदिक सप्पा चेलागोळी विश्वास दा संची माळतेला तिर्गदुन.

इफिसुस अदिक कुरिन्थुस दा अपुल्लोस

24अपुल्लोस हेसुर इन ऊंद यहूदी ईरोन, यार्द जनम सिकन्दरिया दा आगीत, जो अक्‍कलवाळा मंळसा ईरोन अदिक शास्त्र अक वळ्लीद तरीका देल जानसोन, इफिसुस दा बंदुन. 25आव प्रभु उन हादी इन शिक्षा ताकोंडिदुन, अदिक मन हचकु अदिक पुरा उत्साह देल यीशु उन बारा दा वळ्लीद-वळ्लीद केळसोन अदिक कलसोन, लेकीन आव सिर्फ यूहन्ना अन्द बपतिस्मा अन्द मात जानसोन. 26आव सभागृह दा निडर आगकु माताळली कुरतुन, लेकीन प्रिसकिल्ला अदिक अक्विला आऊंद मातगोळी केळकु आऊक तान मान्या ओतुर अदिक परमेश्वर उन हादी आऊक मात्‍त वळ्लीद-वळ्लीद हेळदुन. 27याग अपुल्लोस निश्चय माळदुन कि आप्पारी ईळुकु अखाया अक होदेव इफिसुस उन विश्वासी वार्टुर आऊन हिम्मत वाळुसदुर अदिक अखाया अन अनुयायीगोळी आऊन स्वागत माळोर साटी ऊंद चिट्ठी कळुदुर; अदिक आव अल पोहचुस्कु आ लॉकुर्द बळा सहायता माळदुन जो परमेश्वर उन अनुग्रह अन कारण विश्वास दा बंदीदुर. 28यतिकी आव शास्त्र देल प्रमाण कोट कोटकु कि यीशु उच मसीह हुन, धोळ प्रबलता देल यहूदीगोळ्द सप्पा मुंदुर मुंद बोलती बंद माळ्त ईत्‍तुन.