प्रेरितगोळ 15

यरूशलेम इन सभा

1बाक थ्वाळासा लॉकुर यहूदिया टु अन्ताकिया बंदकु विश्वासी वार्टुरी कल्सली हतदुर: “अगर मूसा अन्द व्यवस्था अन अनुसार नीम्द खतना ईला आगाईत रा नीमी उद्धार सिक सकाल.” 2इदुर बारा दा पौलुस अदिक बरनबास आंदुर से सहमत ईला ईरोर ईदा कारण देल आंदुर सांगुळ आंदुर्द हापाळ धोळ्द झगळा आत रा ईद ठहरूस्कु आत कि पौलुस अदिक बरनबास अदिक आंदुर दा टु थ्वाळासा संगीगोळ ई मात इन समाधान माळोर साटी प्रेरितगोळ अदिक मंडली नोर स्याणा मंळसागोळ हात्‍ती यरूशलेम इक कळुकु आगुल.

3इदुरसाटी मंडली आंदरी येनारा दुर ताका सफर माळोर साटी पोहचुसदुर; अदिक आंदुर फिनीकी अदिक सामरीया टु आगतेला गैरयहूदी लॉकुर ह्यांग परमेश्वर उन दी तिर्गदुर इदुर्द जानकारी केळ्सतेला होदुर, अदिक ई जानकारी देल विश्वासी वार्टुर हापाळ खुश आदुर. 4याग आंदुर यरूशलेम पोहचुसदुर, रा मंडली अदिक प्रेरित अदिक मंडली नोर स्याणा लॉकुर आंदुर स्वागत माळदुर, अदिक आंदुर हेळदुर कि परमेश्वर आंदुर सांगुळ आगकु येन-येन क्याल्सा माळीदुन. 5लेकीन फरीसीगोळ समुह दा टु थ्वाळासा लॉकुर जो यार विश्वास माळीदुर, आंदुर यदकु अंदुर, “गैरयहूदीगोळ्द खतना आग अच पायजे अदिक आंदुर मूसा अन्द व्यवस्था अन पालन माळ पायजे.”

6आग प्रेरित अदिक मंडली अन स्याणा लॉकुर ई मात इन बारा दा विचार माळोर साटी जमा आदुर. 71आग पतरस हापाळ झगळा आगदुर बाद्दा निदुरकु आंदुर से अंदुन, “हे वार्टुरा, नीव जान्सतीर कि हापाळ दिन पयले परमेश्वर नीम दा टु नानी नीवळुस कोंडुन कि नान बाय देल गैरयहूदीगोळी खुशखबरी इन वचन केळसुसुल ताकी आंदुर केळकु विश्वास माळुल. 82सप्पा मुंदुर्द मन अरावाळा परमेश्वर आंदरी भी नाम घाई पवित्र आत्मा कोटकु आंदुर गवाही कोटकु आंदुर्द संबंध दा तान समर्थन दर्शुसिदुन; 9अदिक विश्वास इन द्वारा आंदुर पापगोळी माफ माळदुन आंदुर्द अदिक नाम्द न्याड्या येनु भेदभाव ईटीदिल. 10रा ईग नीव येती परमेश्वर उन परीक्षा माळतीर कि विश्वासीगोळ कुतक्या मा हिंग जुआळी ईटी, यारी ना नाम आप्प दादागोळ नेगु सकीदुर अदिक ना नाव नेगु सकतेव? 11ईला, नाम्द ईद विश्वास आद कि जसा ह्यांग नाम प्रभु यीशु उन अनुग्रह देल उद्धार आग्याद; हांगा आंदुर्द भी आग्याद.”

12आग सप्पा सभा चुपचाप बरनबास अदिक पौलुस उन केळली कुरतुर, कि परमेश्वर आंदुर द्वारा गैरयहूदीगोळ दा ह्यांग धोळ धोळ चमत्कार अदिक अदभुत क्याल्सा तोर्सदुन. 13याग आंदुर चुप आदुर रा याकूब अनली कुरतुन, हे वार्टुरा, अदिक आकतींगेरा, नांद केळी. 14शमौन ईगल्या हेळदुन कि परमेश्वर पयले गैरयहूदीगोळ मा ह्यांग कृपा दृष्टी माळदुन, कि आंदुर दा टु तान हेसुर इन साटी ऊंद लॉकुर माळ कोमुल. 15इदुर देल भविष्यवक्तागोळ वचन भी समर्थन माळताव, जसा कि शास्त्र दा लिख्सकु आद,

16इदुर बाद्दा ना मात्‍त बंदकु दाऊद उन

बिदकु राज्य मात्‍त स्थापित माळाईन,

अदिक आऊन खंडरगोळी मात्‍त

मजबूत कटाईन,

17इदुरसाटी कि मिग्द मंळसागोळ, मतलब सप्पा

गैरयहूदी जो नान हेसुर इन कहलुस्तार, प्रभु अक ढुंढसुल,

18ईद आवा प्रभु अनतान जो दुनिया अन उत्पत्ति देल ई मातगोळी प्रगट माळतेला बंदान.

19“इदुरसाटी नान विचार ईद आद कि गैरयहूदीगोळ दा टु जो लॉकुर परमेश्वर उन दी तिर्गतार, नाव आंदरी दुख कोळतीदील; 20बल्‍की नामी आंदुर हात्‍ती चिट्ठी लिख्सकु कळु पायजे: कि आंदुर भोजन तिनबाळुल जो प्रथा अन अनुसार अशुध्द आद यतिकी अद मूर्तीगोळ मा येर्सद हुन, व्यभिचार देल आंदुर दुर ईरूल अदिक कुतक्या ओतकु कोंद यातोदु पशु उन मास अदिक खुन तिनबाळुल. 21यतिकी स्याणा लॉकुर काल टु नगर नगर मूसा अन्द व्यवस्था अन्द प्रचार माळावाळेर आग्त बंदार, अदिक अद हर आराम इन दिन सभागृह दा वाचुसकु आगतद.”

गैरयहूदी विश्वासीगोळी चिट्ठी

22आग सप्पा मंडली सहित प्रेरितगोळ अदिक मंडली अन्द स्याणागोळ निश्चय माळदुर कि नाम दा टु येनारा येढ्ढ मंळसागोळी नीवळुसुल, मतलब यहूदा जो बरसब्बा कहलुस्तान, अदिक सीलास उक जो वार्टुर दा स्याणा ईरोन; अदिक आंदरी पौलुस अदिक बरनबास उन सांगुळ अन्ताकिया कळुल.

23आंदुर आंदुर्द कय दा ईद चिट्ठी लिख्सकु कळुदुर: “अन्ताकिया अदिक सीरिया अदिक किलिकिया अन्द ईरावाळेर वार्टुर इक जो गैरयहूदीगोळ दा टु आर, प्रेरितगोळ अदिक स्याणा लॉकुर वार्टुर्द नमस्कार. 24नाव ईद केळदेव कि नाम दा टु यावारा आदेश हासिल माळ्द बिना अच नाम दा टु थ्वाळासा लॉकुर होगकु, तान शब्दगोळ देल नीमी परेशानी अदिक दुख पोहुचुस्यान. 25नाव सप्पा मुंदुर आपस दा सहमत आगकु ईद निश्चय माळदेव कि नाम दा टु निवळुस्द मंळसागोळी तान प्रिय बरनबास अदिक पौलुस उन सांगुळ नीम हात्‍ती कळेव. 26ई हिंग मंळसा आर यार तान जीव नाम प्रभु यीशु मसीह अन्द क्याल्सागोळ साटी जोखिम दा हाक्यार. 27इदुरसाटी नाव यहूदा अदिक सीलास उक कळेव, जो मातगोळ नाव लिख्सेतेव, आंदुर ऊंद आगकु नीमी ईवा मातगोळ हेळ्यार. 28पवित्र आत्मा अक अदिक नामी उचित जान्सकु बित्‍त कि ई जरूरी मातगोळी बिटकु, नीम मा बोझ हाकबाळुल; 29कि नीव मूर्तीगोळ मा बली माळावाळेर से अदिक खुन देल, अदिक कुतक्या वत्‍त पशुगोळ्द मास देल, अदिक व्यभिचार देल दुर ईरी. ईऊर से दुर ईरी रा नीम्द भला आदीत. नाम शुभकामनागोळ मुंद नीम सांगुळ ईरूल.”

30बाक आंदुर सार आगकु अन्ताकिया पोहचुसदुर, अदिक विश्वासीगोळ्द सभा अक जमा माळकु अद चिट्ठी आंदरी कोट्ट बुटुर. 31आ लॉकुर चिट्ठी जोर देल वाचुसकु अद प्रोत्साहन सिक्‍कावाळा बातणी इन द्वारा हापाळ खुश आगेदुर. 32यहूदा अदिक सीलास जो खुद भी भविष्यवक्ता ईरोर, हापाळ मातगोळ देल वार्टुरी शिक्षा कोटकु प्रोत्साहित अदिक संची माळदुर. 33आंदुर येनारा दिन ईतकु, विश्वासी वार्टुर आंदरी शांती देल आंदुर दा हात्‍ती वापस होगली विदा माळदुर जो आंदरी कळीदुर. 343 लेकीन सीलास उक अल ईरोद वळ्लीद हत.

35लेकीन पौलुस अदिक बरनबास अन्ताकिया दा ईतोदुर: अदिक अन्य हापाळ सा लॉकुर्द सांगुळ प्रभु उन वचन केळ्सतेला ईत्‍तुर.

पौलुस अदिक बरनबास उन अलग आगोद

36थ्वाळासा दिन बाद्दा पौलुस बरनबास से अंदुन, “या नगर दा नाव प्रभु उन वचन केळसीदेव, बरी, बाक आंदुर दा नळुकु तान वार्टुरी अदिक आकतींगेरी नोळाता कि आंदुर ह्यांग आर.” 37आग बरनबास यूहन्ना अक जो मरकुस कहलुस्तान, सांगुळ हुडोद विचार माळदुन. 384लेकीन पौलुस ईद वळ्लीद समसीदील कि आऊक तान सांगुळ हुळदेव, यतिकी यूहन्ना जो मरकुस कहलुसतान, पंफूलिया टु आंदुर हात्‍ती वापस हिंद तिर्गेगिदुन अदिक आंदुर स्यावा कार्य पुरा आगासताका आंदुर सांगुळ ईला ईरोन. 39इदुर मा बरनबास अदिक पौलुस उन दा धोळ्द विरोध पैदा आगेत अदिक परिणाम ईद सिक्त कि आंदुर आपस दा आबुर दाबुर से अलग आगेदुर; बरनबास, मरकुस उक हुडुकु जहाज मा साइप्रस होटोदुन. 40लेकीन पौलुस सीलास उक निवळुस कोंडुन, अदिक विश्वासी वार्टुर से परमेश्वर उन अनुग्रह दा कोटकु अल टु होटोदुन; 41अदिक आव मंडलीगोळी संची माळतेला सीरिया अदिक किलिकिया टु आगतेला होट्टुन.