परमेश्वर उन वचन
प्रेरितगोळ 14
इकुनियुम दा पौलुस अदिक बरनबास
इकुनियुम दा हिंग आत कि पौलुस अदिक बरनबास यहूदीगोळ्द सभागृहगोळ दा सांगुळल्या होदुर, अदिक ई प्रकार देल मातगोळी हेळदुर कि यहूदीगोळ अदिक गैरयहूदीगोळ येढ्ढु दा टु हापाळ मुंदुर विश्वास माळदुर. लेकीन विश्वास ईला माळावाळेर यहूदीगोळ गैरयहूदी लॉकुर्द मन दा विश्वासी वार्टुर विरोध दा उकसुसदुर अदिक आंदुर मन दा कळवाहटपन पैदा माळ कोंडुर. पौलुस अदिक बरनबास हापाळ दिन ताका अल ईत्तुर, अदिक प्रभु उन बारा दा निर्भयता देल प्रचार माळ्त ईत्तुर आंदुर्द द्वारा प्रभु अदभुत चिन्ह अदिक आश्चर्यगोळी माळसुसतेला तान अनुग्रह अन्द बातणी ईद पुरा सच्चाई देल आद इदरी प्रगट माळतेला ईत्तुन. लेकीन नगर इन लॉकुर दा फूट बिदोत, इदुर देल यास रा यहूदीगोळ दी अदिक यास प्रेरितगोळ्द दी आगेदुर.
आग थ्वाळासा गैरयहूदी अदिक यहूदी तान अधिकारीगोळ सांगुळ मिलुसकु आंदुर सांगुळ बुरा व्यवहार माळली अदिक आंदुर मा कल्लगोळ भिळोद चाल नळदुर. आग पौलुस अदिक बरनबास उक ई मात इन पता नळुत आग आंदुर लुकाउनिया अन्द लुस्त्रा अदिक दिरबे घाई नगरगोळ दा अदिक अदुर्द आसपास इन क्षेत्रगोळ दा ओळदुर. अदिक आंदुर अल खुशखबरी केळ्सली कुरतुर.
लुस्त्रा अदिक दिरबे दा पौलुस अदिक बरनबास
लुस्त्रा दा ऊंद मंळसा कुर्तकु ईरोन, जो कालगोळ देल अपंग ईरोन. आव जनम टु अच लंगळा ईरोन अदिक यागलु नळु ईला सकोन. आव पौलुस उक मातगोळी माळ्त केळोन. पौलुस आऊंद दी तार हचकु नोळदुन कि आऊक वळ्लेव आगोद विश्वास आद, अदिक धोळ शब्द देल अंदुन, “तान कालगोळ बल देल सीधा निदुर.” आग आव हारकु नळुली टेटाळली कुरतुन. लॉकुर पौलुस उन ईद क्याल्सा नोळकु लुकाउनिया अन्द भाषा दा धोळ्द आवाज देल अंदुर, “द्यावगोळ मंळसागोळ्द रूप दा आगकु नाम हात्ती ईळुकु बंदार.” आंदुर बरनबास उक ज्यूस, अदिक पौलुस उक हिरमेस अंदुर, यतिकी पौलुस मातगोळ हेळदुर दा मुख्य ईरोन. ज्यूस द्याव उन आ मंदिर इन पुजारी जो आंदुर नगर इन मुंद ईरोन, वस्ता अदिक फूलगोळ हार फाटकगोळ मा तनकु लॉकुर सांगुळ बलिदान माळोद चाहासोन.
लेकीन बरनबास अदिक पौलुस प्रेरितगोळ याग ईद केळदुर, रा तान कपळा हरदुर अदिक भीळ दा होदुर, अदिक कारूकु अनली कुरतुर, “हे लॉकुरा, नीव ईद येती माळेतीर? नाव भी रा नीम घाई मंळसा हुयेव, अदिक नीमी परमेश्वर उन खुशखबरी केळसोर साटी नाव ईल आयेव, कि नीव ई बेकार वस्तुगोळ देल अलग आगकु जित्ता परमेश्वर उन दी तिर्गी, याव स्वर्ग अदिक पृथ्वी अदिक समुद्र अदिक जो येनारा अऊर्दा आद माळदुन. आव बितुस्द समयगोळ दा सप्पा लॉकुरी तान तान हादीगोळ दा नळु गोट्टुन. लेकीन आव हमेशा भला क्याल्सा माळदुर द्वारा तान अस्तित्व अक प्रमाणित माळदुन: आव नीमी आकाश टु माळ कोट्टुन अदिक मौसम इन अनुसार फसल कोट्टुन; आवा नीमी तिनली कोळतान अदिक नीम दिलगोळी खुशी देल तुम्म बुळतान.” ईद अनकु भी प्रेरितगोळ लॉकुरी धोळ्द परेशानी देल रोक्सदुर कि आंदुर साटी बलिदान माळबाळुल.
लेकीन येनारा यहूदीगोळ पिसिदिया अन्द अन्ताकिया अदिक इकुनियुम टु बंदकु लॉकुरी तान दी माळ कोंडुर, अदिक पौलुस मा कल्लगोळ देल बळदुर, अदिक सोतकु सम्सकु आऊक नगर इन व्हार्या जेडुकु ओतुर. पर याग चेलागोळ आऊन नाकु दी बंदकु निदुरदुर, रा आव यदकु मात्त नगर दा होदुन अदिक दुसरा दिशी बरनबास उन सांगुळ दिरबे अक होटोदुन.
सीरिया अन्द अन्ताकिया दा वापस बरोद
पौलुस अदिक बरनबास दिरबे नगर इन लॉकुरी खुशखबरी केळ्सकु, अदिक हापाळ सा चेलागोळी माळकु, लुस्त्रा अदिक इकुनियुम अदिक पिसिदिया अन्द अन्ताकिया अक वापस बंदुर, अदिक चेलागोळ मन इक संची माळ्त ईत्तुर अदिक ईद प्रोत्साहन कोळोर कि विश्वास दा सच्चाई देल बन्सकु ईरी; अदिक ईद शिक्षा कोळतोगोर, “नामी बळा दुख नेगुकु परमेश्वर उन राज्य दा प्रवेश माळोद आद.” अदिक आंदुर हर ऊंद मंडली दा आंदुर साटी स्याणा लॉकुरी नियुक्त माळदुर अदिक उपास सहित प्रार्थना माळकु आंदरी प्रभु उन कय दा सौप्सदुर यार मा आंदुर विश्वास माळतोगोर.
आग पिसिदिया टु आगतेला आंदुर पंफूलिया पोहचुसदुर; बाक पिरगा दा वचन केळ्सकु अत्तलिया दा बंदुर, अदिक अल टु आंदुर जहाज मा अन्ताकिया होदुर, यल आंदुर आ क्याल्सा अन्द साटी जो आंदुर पुरा माळीदुर परमेश्वर उन अनुग्रह दा कोटकु आगीदुर.
याग आंदुर अन्ताकिया बंदुर रा आंदुर मंडली अन लॉकुर जमा माळकु जो परमेश्वर आंदुर सांगुळ माळदुन अद केळ्सदुर अदिक हेळदुर कि ह्यांग परमेश्वर गैरयहूदीगोळ्द विश्वास माळोर साटी दरवाजा तेरदुन. अदिक आंदुर विश्वासीगोळ सांगुळ हापाळ दिन ताका अल ईत्तुर.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.