प्रेरितगोळ 13

बरनबास अदिक शाऊल उक निवळुसोद अदिक कळोद

1अन्ताकिया अन्द मंडली दा कई भविष्यवक्ता अदिक गुरु ईरोर; जसा: बरनबास, शमौन जो (नीगर) करेव कहलुसतान; अदिक लूकियुस कुरेनी, अदिक मनाहेम जो हेरोदेस शासक उन सांगुळ दा धोड्डेर आदुन, अदिक शाऊल. 2याग आंदुर उपास सहित प्रभु उन स्यावा माळोर, रा पवित्र आत्मा आंदुर से अन्त, “नान साटी बरनबास अदिक शाऊल उक आ क्याल्सा अन्द साटी अलग माळी यार साटी ना आंदरी कार्सीन.”

3आग आंदुर उपास अदिक प्रार्थना माळकु अदिक आंदुर मा कय ईटकु आंदरी सार माळदुर.

कुप्रा दा बरनबास अदिक शाऊल

4इदुरसाटी बरनबास अदिक शाऊल पवित्र आत्मा अन कळुद सिलूकिया अक होदुर; अदिक अल टु जहाज मा कुर्तकु साइप्रस इक होदुर; 5अदिक सलमीस दा पोहचुस्कु, परमेश्वर उन वचन यहूदीगोळ्द सभागृहगोळ दा केळ्सदुर. यूहन्ना जो मरकुस कहलुसोन, मदत माळावाळा अन रूप दा आंदुर सांगुळ ईरोन.

6आंदुर आ सप्पा टापू दा आगतेला पाफुस ताका पोहचुसदुर. अल आंदरी बार-यीशु हेसुर इन ऊंद यहूदी जादूगर अदिक ख्वाटा भविष्यवक्ता सिकदुन. 7आव शासक सिरगियुस पौलुस उन संगी ईरोन, जो बुद्धिमान मंळसा ईरोन. आव बरनबास अदिक शाऊल उक तान हात्‍ती कारूकु परमेश्वर उन वचन केळोद चाहासदुन. 8लेकीन इलीमास जादूगर, यतिकी गैरयहूदीगोळ दा ईदा आऊन हेसुर इन मतलब आद, आंदुर विरोध माळकु शासक उक विश्वास माळोर से रोकसोद चाहासदुन. 9आग शाऊल यार्द हेसुर पौलुस भी आद, पवित्र आत्मा देल परिपुर्ण आगकु इलीमास जादुगर उन दी टकटकी हचकु नोळदुन अदिक अंदुन, 10“हे सप्पा कपट अदिक सप्पा चतुराई देल तुमकु शैतान उन औलाद, सप्पा न्यायीपन अन्द दुश्मन, येन नी प्रभु उन सरका हादीगोळी वाकळा माळोद बिळतीदील? 11ईग नोळ, प्रभु उन कय नीन विरोध दा येदोग्याद; अदिक नी थ्वाळासा समय ताका कुढ्ढ ईत्या अदिक सुर्य अन्द उजुळ नोळतीदिल.”

आग तुरन्त धुंधरापन अदिक अंधार आऊन कण्णगोळ मा छासेत, अदिक आव ईत्‍त आत्‍त ताळु कुरतुन ताकी यावारा आऊन कय हुडुकु आऊक संभाळसुल. 12आग शासक जो येनारा अल आगीत अदरी नोळकु अदिक प्रभु उन उपदेश देल चकित आगकु विश्वास माळदुन.

पिसिदिया अन्द अन्ताकिया दा

13पौलुस अदिक आऊन संगी पाफुस टु जहाज इन द्वारा पंफूलिया प्रदेश इन पिरगा नगर दा बंदुर; अदिक यूहन्ना आंदरी बिटकु यरूशलेम इक होटोदुन. 14पिरगा नगर टु मुंद वाळुसकु आंदुर पिसिदिया अन्द अन्ताकिया दा पोहचुसदुर; अदिक आराम इन दिन यहूदी लॉकुर्द सभागृह दा होगकु कुरतोदुर. 15मूसा अन्द व्यवस्था अदिक भविष्यवक्तागोळ किताब देल वाचुसदुर बाद्दा यहूदी लॉकुर्द सभागृह अन्द अधिकारीगोळ आंदुर हात्‍ती बातणी कळुदुर, “हे वार्टुरा अदिक आकतींगेरा, नाव चाहासतेव कि लॉकुरी प्रोत्साहित माळोर साटी नीम मन दा येनारा मात आद रा अनी.”

16आग पौलुस निदुरकु अदिक कय देल इशारा माळकु अंदुन, “हे इस्त्राएलगोळा, अदिक सप्पा गैरयहूदीगोळा जो परमेश्वर उन आराधना माळतीर, केळी: 17ई इस्त्राएली लॉकुर्द परमेश्वर नाम आप्प दादागोळी नीवळुस कोंडीदुन, अदिक याग ई लॉकुर मिस्त्र द्याश दा परदेशी आगकु ईरतोगोर, रा आंदुर्द उन्नती माळदुन; अदिक धोळ्द सामर्थ्य देल आंदरी इजिप्त टु तेगुकु तंदुन. 18आव येनारा चालीस वर्ष ताका रेगिस्तान दा आंदुर्द सहन माळतेला ईत्‍तुन, 19अदिक कनान द्याश दा येळ राष्ट्रगोळ्द नाश माळकु परमेश्वर अद पृथ्वी इस्त्राएल इन लॉकुरी अत्‍तरधिकारी इन रूप दा कोट बुट्टुन. 20इदुर बाद्दा आव शमूएल भविष्यवक्ता ताका आंदुर दा न्यायी ठहरूसदुन. 21अदुर बाद्दा आंदुर ऊंद राजा बेळदुर: आग परमेश्वर चालीस वर्ष इन साटी बिन्यामीन इन जाती दा टु ऊंद मंळसा; मतलब कीश उन पार शाऊल उक आंदुर मा राजा ठहरूसदुन. 22बाक आऊक अलग माळकु दाऊद उक आंदुर राजा माळदुन; यार बारा दा आव गवाही कोट्टुन, ‘नानी ऊंद मंळसा, यिशै उन पार दाऊद, नान मन इन अनुसार सिक्‍केदुन; आवा नांद सप्पा इच्छा पुरा माळ्यान.’ 23दाऊद उन वंश दा टु परमेश्वर तान वादा अन्द अनुसार इस्त्राएल इन हात्‍ती ऊंद उद्धारकर्ता, मतलब यीशु उक कळुदुन. 241यीशु तान कार्यगोळ्द सुरूवात माळोर से पयले यूहन्ना सप्पा इस्त्राएलगोळ दा मन तिर्गुसोद प्रचार माळदुन अदिक बपतिस्मा माळदुन. 252याग बपतिस्मा कोळावाळा यूहन्ना तांद स्यावा पुरा माळदुर मा ईरोन, रा आव अंदुन, ‘नीव नानी येन सम्सतीर? ना आव आल्लच यार हादी नीव कायेतीर. उलटा नोळी, नान बाद्दा ऊंद बरावाळा आन, आऊन कालगोळ केरू उन बंध भी ना खोल्सा लायक हैलेच.’

26“हे इस्त्राएली वार्टुरा, नीव जो अब्राहम उन औलाद हुईर; अदिक सप्पा गैरयहूदी जो परमेश्वर उन आराधना माळतार, नीम हात्‍ती ई उद्धार इन वचन कळुकु आग्याद. 27यतिकी यरूशलेम इन ईरावाळेर अदिक आंदुर अधिकारीगोळ ना उद्धारकर्ता अक अरतुर अदिक ना भविष्यवक्तागोळ्द अव मातगोळ जो हर ऊंद आराम इन दिन वाचुसकु आगतद आऊक सम्सत. अदिक यीशु उक दोषी ठहरूसदुर द्वारा भविष्यवक्तागोळ्द मातगोळी सही साबित माळ्द. 283आंदरी कोंद बुळोद लायक येनु दोष आऊन दा सिक्‍कीदील, तरी भी पिलातुस से विनती माळदुर कि आव कोंदकु आगुल. 294याग शास्त्र दा आऊन बारा दा लिख्सद सप्पा मातगोळ आंदुर पुरा माळदुर, रा आऊक क्रूस मा टु ईळ्सकु कब्र दा ईटदुर.” 30लेकीन परमेश्वर आऊक सोत्‍तुर दा टु जित्‍ता माळदुन, 315अदिक आव आंदरी जो आऊन सांगुळ गलील टु यरूशलेम बंदीदुर, हापाळ दिनगोळ ताका कांळ्सतेला ईत्‍तुन; इस्त्राएल लॉकुर्द मुंद ईग आंदुर अच आऊन गवाह आर. 32नाव नीमी आ वादा अन्द बारा दा जो नाम आप्प दादागोळ से माळकु आगीत, ईद खुशखबरी केळ्सतेव, 33कि परमेश्वर यीशु उक जित्‍ता माळकु, अदा वादा नाम औलाद इन साटी पुरा माळदुन; ह्यांग भजन संहिता दा भी लिख्सकु आद,

नी नान पार हुय;

ईंद ना अच नीनी पैदा माळीन.

34अदिक परमेश्वर आऊक सोत्‍तुर दा टु जित्‍ता माळकु येब्सदुन ताकी सळुसोर साटी कब्र दा बिदकु ईला ईरूल, इदुरसाटी आव ईद अंदुन,

ना नीनी पवित्र अदिक अटल आशीष कोळाईन

जो ना दाऊद उन सांगुळ वादा माळीन.

35इदुरसाटी आव भजन संहिता दा भी अंदान,

नी तान विश्वासयोग्य सेवक उक कब्र दा सळुस गोळतीदील.

36यतिकी दाऊद रा परमेश्वर उन इच्छा अन्द अनुसार तान समय दा स्यावा माळकु सोतोदुन, अदिक तान आप्प दादागोळ सांगुळ दा नळ्सकु आदुन, अदिक आऊन मय कब्र दा सळुसेत. 37लेकीन यारी परमेश्वर सोत्‍तुर दा टु जित्‍ता माळदुन, आव सळुसीदील. 38इदुरसाटी, हे नान इस्त्राएली संगीगोळा, नीव जान्स कोमी कि यीशु उन द्वारा पापगोळ्द माफ अन्द बातणी नीमी कोटकु आगतद; 39अदिक याता मातगोळ दा नीव मूसा अन्द व्यवस्था अन्द द्वारा पापगोळ देल मुक्त आग सकालीर, अवा सप्पा दा हर ऊंद यीशु मा विश्वास माळावाळा पापगोळ देल मुक्त आगतान. 40इदुरसाटी सावधान ईरी, हिंग आगबाळुल कि जो भविष्यवक्तागोळ किताब दा बंदाद, नीम मा भी अद घटुस बाळुल:

41हे अपमान माळावाळेरा, नोळी, चकित आगी, अदिक सोतोगी;

यतिकी ना नीम दिनगोळ दा ऊंद क्याल्सा माळतीन,

हिंग क्याल्सा कि अगर यावारा नीम से आऊन बारा दा मातचीत माळुल,

रा नीव यागलु विश्वास माळतीदील.

42पौलुस अदिक बरनबास उन यहूदी सभागृह टु व्हार्या होळा समय लॉकुर आंदुर से विनती माळली कुरतुर कि अगला आराम इन दिन नामी ई मातगोळी बाक केळ्सकु आगुल. 43याग सभा येदोत रा यहूदीगोळ अदिक गैरयहूदी मत दा बरावाळेर भक्तगोळ दा टु हापाळ सा पौलुस अदिक बरनबास इन हिंद आगेदुर; अदिक प्रेरितगोळ आंदुर से मातगोळी हेळकु प्रोत्साहित माळदुर कि परमेश्वर उन अनुग्रह दा जीवन बन्सकु ईटी.

44अगला आराम इन दिन नगर इन सप्पा लॉकुर परमेश्वर उन वचन केळोर साटी जमा आगेदुर. 45लेकीन यहूदी भीळ इक नोळकु जलन देल तुम्मेदुर, अदिक अपमान माळतेला पौलुस उन मातगोळ्द विरोध दा अपशब्द अनली कुरतुर. 46आग पौलुस अदिक बरनबास निडर आगकु अंदुर, जरूरी ईरोद कि परमेश्वर उन वचन पयले नीमी केळ्सकु आगाईत; लेकीन याग नीव अदरी ठुकरूस बुळतीर, अदिक खुद इक अनन्त जीवन इन योग्य ठहरूसालीर, रा नोळी, नाव नीमी बिटकु गैरयहूदी लॉकुर दी तिर्गतेव. 47यतिकी प्रभु नामी ईद आग्या कोटान,

ना नीनी गैरयहूदीगोळ साटी ज्योति ठहरूसीन,

ताकी पुरा संसार ऊळ्सकु आगुल.

48ईद केळकु गैरयहूदीगोळ खुश आदुर, अदिक परमेश्वर उन वचन इन बळाई माळली कुरतुर; अदिक यास अनन्त जीवन इन साटी ठहरूसकु आगीदुर, आंदुर विश्वास माळदुर.

49आग प्रभु उन वचन आ सप्पा द्याश दा फैलुसली कुर्त. 50लेकीन यहूदीगोळ परमेश्वर उन आराधना माळावाळेर अदिक प्रसिद्ध गैरयहूदी आर्तेर इक अदिक नगर इन प्रमुख लॉकुरी उकसुसदुर, अदिक पौलुस अदिक बरनबास इन विरूद्ध उपद्रव माळसुसकु आंदरी तान सीमा दा टु तेग्द बुटुर. 516आग प्रेरित आंदुर मुंद आंदुर विरोध दा तान कालगोळ धुळा झाळ्सकु इकुनियुम नगर इक होटोदुर. 52अदिक अन्ताकिया नोर विश्वासी पुरा खुशी देल अदिक पवित्र आत्मा देल परिपुर्ण आगतेला होदुर.