परमेश्वर उन वचन
प्रेरितगोळ 12
अदिक छल
आ समय हेरोदेस राजा मंडली अन्द थ्वाळासा सदस्यगोळी सतुसोद सुरूवात माळदुन. आव यूहन्ना अन्द वार्ट याकूब उक तलवार देल कोन्सुस बुट्टुन. याग आव नोळदुन कि यहूदी लॉकुर आऊन से खुश आगतार, रा आव पतरस उक भी हुडुकोंडुन. अव दिन अखमीरी रोट्टी इन हाब्ब ईनव दिन ईरव. आव पतरस उक हुडुकु बंदीगृह दा हाकदुन, अदिक रखवाली माळोर साटी नाक नाक सिपाहीगोळ्द नाक समुह माळीदुन; ईद विचार देल कि फसह अन बाद्दा आऊक लॉकुर मुंद तरूल. बंदीगृह दा पतरस बंद ईरोन; लेकीन मंडली आऊन साटी मन हचकु परमेश्वर से प्रार्थना माळोद.
पतरस उन बंदीगृह दा टु बिळोद
याग हेरोदेस आऊक लॉकुर मुंद तरली ईरोन, अदा ईळ्लकी पतरस येढ्ढ शंकलीगोळ देल कटकु येढ्ढ सिपाहीगोळ्द बीच दा मिंगोन; अदिक पहरेदारगोळ दरवाजा मा बंदीगृह अन्द रखवाली माळोर. रा नोळी, प्रभु उन ऊंद स्वर्गदूत बंदकु निदुरदुन अदिक आ कोठरी दा ज्योति चमकुस्त, अदिक आव पतरस उन पासळी मा कय बळकु आऊक येद्दुन अदिक अंदुन, “येळ, जल्दी माळ.” अदिक आऊन कयगोळ दा टु शंकलीगोळ बिटकु बिदोदव. आग स्वर्गदूत आऊन से अंदुन, “नेळु कट, अदिक तान केरू हाक्क कोम.” आव हांगा माळदुन. बाक स्वर्गदूत आऊन से अंदुन, “तान कपळा हाक्कु नान हींद आगेग.” पतरस होटकु आऊन हींद नळुत नळुत बंदीगृह टु व्हार्या बंदुन; लेकीन ईद ईला जानसोन कि जो येनारा स्वर्गदूत माळेत्यान अद सही आद, लेकीन ईद सम्सदुन कि ना दर्शन नोळेतीन. आग आंदुर पयला अदिक दुसरा पहरा टु होटकु आ लोवा अन्द फाटक मा पोहचुसदुर, जो नगर दी हादी होगतद. अद फाटक आंदुर साटी तान ताना खुलसेत, अदिक आंदुर होटकु ऊंद अच गली टु आगकु ऊंद हादी मा बंदुर, अदिक तुरन्त अच स्वर्गदूत आऊक बिटकु होटोदुन.
आग पतरस सावधान आगकु अंदुन, “ईग ना जान्स कोंडीन कि प्रभु तान स्वर्गदूत कळुकु नानी हेरोदेस उन कय देल अदिक यहूदीगोळ्द सप्पा आशा टु बिळ्स बुट्टुन.”
ईद जान्सकु पतरस आ यूहन्ना अन्द मोय मरियम इन मान्या बंदुन, जो मरकुस कहलुसतान. अल हापाळ सा लॉकुर जमा आगकु प्रार्थना माळोर. याग आव फाटक इन खिळकी ठोक्सदुन, रा रूदे हेसुर इन ऊंद दासी दरवाजा तेरोर साटी बंदुर. पतरस उन शब्द केळकु आक खुशी अन मारा देल फाटक तेर्दिदील, लेकीन ओळकु बुळ्क होदुर अदिक हेळदुर कि पतरस दरवाजा मा निदुरकु आन. आंदुर आकिन से अंदुर, “नी यर्र आय.” लेकीन आक हिम्मत माळकु अंदुर कि हिंग अच आद, “आग आंदुर अंदुर आऊन स्वर्गदूत आगीदान.”
लेकीन पतरस ठोक्सतेला अच ईत्तुन: आखरी दा आंदुर खिळकी खोल्सदुर, अदिक आऊक नोळकु चकित ईतोदुर. आग आव आंदरी कय देल इशारा माळदुन कि चुप ईरूल; अदिक आंदरी हेळदुन कि प्रभु याता रीति देल आऊक बंदीगृह दा टु तेगुकु तंदान. बाक अंदुन, “याकूब अदिक बाकी विश्वासी वार्टुरी ईद मात हेळ बुळेतीर.” आग होटकु येल्यारा दुसरा जागा अक होटोदुन.
हुंजकुका अच सिपाहीगोळ दा बळा हलचल मचुसेत कि पतरस उन येन आत.
याग हेरोदेस सिपाहीगोळ से आऊन खोज माळोद आदेश कोट्टुन लेकीन पतरस सिक्कीदील, रा पहरेदारगोळ जाँच माळकु आग्या कोट्टुन कि आंदरी कोंदकु आगुल: अदिक आव यहूदिया अक बिटकु कैसरिया दा होगकु ईरली कुरतुन अदिक अल आव थ्वाळासा समय बितुसदुन.
हेरोदेस उन सायोद
हेरोदेस सूर अदिक सैदा अन्द लॉकुर से हापाळ सिट्ट दा ईरोन. इदुरसाटी आंदुर ऊंद समुह माळकु राजा से मिलुसली बंदुर, पयले आंदुर बलास्तुस उक जो राजा अन्द ऊंद सेवक ईरोन, समझुस्कु मेल माळोद चाहासदुर; यतिकी हेरोदेस राजा अन्द द्याश देल आंदुर्द द्याश इन पालन पोषण आगतोगोद.
ठहरूस्द दिशी हेरोदेस राजा अन कपळा हाक्कु सिंहासन मा कुरतुन, अदिक आंदरी भाषण कोळली कुरतुन. आग लॉकुर चिल्ळास कुरतुर, “ईद रा मंळसा अन्द ईला परमेश्वर उन आवाज हुन.” अदा घळी प्रभु उन ऊंद स्वर्गदूत तुरन्त आऊक बळदुन, यतिकी आव परमेश्वर उक महिमा कोटीदील; अदिक आव किळा हतकु सोतोदुन अदिक अव किळागोळ आऊक तिनली हतदव.
लेकीन परमेश्वर उन वचन लगातार वाळुस्त अदिक फैलुसतेला होत.
याग बरनबास अदिक शाऊल यरूशलेम दा तान क्याल्सा पुरा माळकु यूहन्ना अक जो मरकुस कहलुस्तान, सांगुळ हुडुकु अन्ताकिया वापस बंदुर.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.