परमेश्वर उन वचन
२ तीमुथियुस 4
ना परमेश्वर अदिक मसीह यीशु उन मुंद जो जित्ता अदिक सोतकु मंळसागोळ्द न्याय माळ्यान, अदिक राजा आगकु शासन माळोर साटी बंदान, आंदरी गवाह मान्सकु ना विनती माळतीन, कि नी वचन इन प्रचार माळ, समय बेसमय तयार ईर, सप्पा प्रकार इन सहनशीलता अदिक शिक्षा अन्द सांगुळ निर्देश कोळ, दनकुस अदिक समजुस. यतिकी हिंग समय बंदीत याग लॉकुर सच्चाई इन शिक्षा केळतीदिल, लेकीन आंदुर खुद इक समाधान सीकुल ईत्ता मातगोळ केळोर साटी तान अभिलाषागोळ्द अनुसार तान साटी हापाळ सा शिक्षा कोळावाळेर जमा माळ कोंडार, अदिक तान किव सच्चाई इन हादी दी टु तिर्गुसकु काल्पनिक कात्तागोळ मा हच्यार. लेकीन नी सप्पा मातगोळ दा नियंत्रण ईट, दुख नेगु, खुशखबरी प्रचार इन क्याल्सा माळ, अदिक तान स्यावा अक पुरा माळ.
यतिकी ईग नांद अर्पण इन घळी होट बंदाद, अदिक नान ईद जीवन इक त्यागसोद समय होट बंदाद. ना वळ्लीद कुस्ती आळ कोंडीन, ना तान दवळ पुरा माळ कोंडीन, ना विश्वास इन रखवाली माळीन. भविष्य दा नान साटी विजयी ईनाम इन मुकुट ईटकु आद, यदरी प्रभु, जो आसान हादी देल नळसावाळा हुन, नानी आ दिशी कोट्टान, अदिक नानी इच ईला उलटा आ सप्पा मुंदुर इक भी जो आऊन प्रगट आगोद प्रिय जान्सतार
व्यक्तिगत वचन
नान हात्ती राटनेरी बरोद कोशिश माळ. 1यतिकी देमास ई दुनिया अक प्रिय जान्सकु नानी बिट बुटान अदिक थिस्सलुनीके अक होटोग्यान. क्रेसकेंस गलातिया अक अदिक तीतुस दलमतिया अक होटोग्यान. 2सिर्फ लूका नान सांगुळ आन. मरकुस उक हुडुकु होटबर; यतिकी स्यावा अन्द साटी आव हापाळ उपयोगी आन. 3तुखिकुस उक ना इफिसुस कळीन. 4याग नी बंद्या रा झागा अक यदरी ना त्रोआस दा करपुस उन मान्या बिटकु बंदिदीन तरेत; अदिक नानव किताबगोळ विशेष माळकु तोगुल इन चिट्ठी गोळी हुडुत बरेत. 5
धातु उन क्याल्सा माळावाळा सिकन्दर नानी हापाळ नुकसान पोहचुस्यान; प्रभु आऊक आऊन क्याल्सागोळ अनुसार बदला कोट्टान. नी भी आऊन से सावधान ईर, यतिकी आव नाम उपदेशगोळ्द हापाळ अच विरोध माळ्यान.
नान पयले पक्ष इन समय याऊ भी नान साथ कोटीदील, उलटा सप्पा मुंदुर नानी बिट बुटीदुर. लेकीन प्रभु नान सांगुळ नीदुरकु ईत्तुन अदिक नानी सामर्थ्य कोट्टुन, ताकी नान द्वारा पुरा पुरा प्रचार आगुल अदिक सप्पा गैरयहूदी लॉकुर केळ कोमुल. ना हुल्ल इन बाय देल बिळ्सकु आगीन. अदिक प्रभु नानी हर ऊंद बुरा क्याल्सा देल बिळस्यान, अदिक तान स्वर्गीय राज्य दा उद्धार माळकु पोहचुस्यान. आऊन महिमा हमेशा हमेशा आगतेला ईरूल. आमीन.
आखरी अभिवादन
प्रिस्का अदिक अक्विला अक अदिक उनेसिफुरूस इन घराना अक नमस्कार. 7इरास्तुस कुरिन्थुस दा ईतोदुन, अदिक त्रुफिमुस उक ना मिलेतुस दा बिमार आगा कारण बिटीन. सोळीन दिन से पयले बरोद कोशिश माळ. यूबूलुस, अदिक पूदेस, अदिक लीनुस अदिक क्लौदिया, अदिक सप्पा विश्वासी वार्टुर्द नीनी नमस्कार.
प्रभु नीन आत्मा अन सांगुळ ईरूल.
नीम मा अनुग्रह आगतेला ईरूल.
Source notes (7)
- Cross-reference कुलुस्सिगोळ ४:१४; फिलेमोन १:२४; २ कुरिन्थि ८:२३; गलातिगोळ २:३; तीतुस १:४
- Cross-reference कुलुस्सिगोळ ४:१४; फिलेमोन १:२४; प्रेरितगोळ १२:१२,२५; १३:१३; १५:३७-३९; कुलुस्सिगोळ ४:१०; फिलेमोन १:२४
- Cross-reference प्रेरितगोळ २०:४; इफिसिगोळ ६:२१,२२; कुलुस्सिगोळ ४:७,८
- Cross-reference प्रेरितगोळ २०:६
- Cross-reference १ तीमुथियुस १:२०; रोमियों २:६
- Cross-reference प्रेरितगोळ १८:२; २ तीमुथियुस १:१६,१७
- Cross-reference प्रेरितगोळ १९:२२; रोमियों १६:२३; प्रेरितगोळ २०:४; २१:२९
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.