परमेश्वर उन वचन
२ तीमुथियुस 3
आखरी दिन
लेकीन ईद याद ईट कि आखरी दिनगोळ दा कठिन समय बंदव. यतिकी मंळसा मतलबी, धन इन लालची, घमण्ड माळावाळेर, अभिमानी, अपमान माळावाळेर, मोय-आप्पुर्द आग्या कडावाळेर, एहसान मारावाळेर, अपवित्र, प्यार ईला माळावाळेर, माफ ईला माळावाळेर, अपमान माळावाळेर, असंयमी, कठोर, भलाई इन दुश्मन, विश्वासघात माळावाळेर, लापरवाह, घमण्ड माळावाळेर, अदिक परमेश्वर उन ईला उलटा सुखविलास इक चाहासावाळेर ईत्तार. आंदुर भक्ति इन भेष रा माळ्यार, लेकीन अदुर्द ताकत इक मान्सतिदिल; हिंग लॉकुर से दुर ईरेत. ईंदुर दा टु अच आ लॉकुर आर जो मान्नागोळ दा वत्त काल देल होक्कोमतार, अदिक आ दुर्बल आर्तेर इक वश दा माळ कोमतार जो पापगोळ देल वोतकु अदिक सप्पा प्रकार इंद अभिलाषागोळ्द वश दा आर, अदिक ईत्ता आर्तेर हमेशा कलुतेला रा ईरतार लेकीन सच्चाई इक जान्स सकालुर. ह्यांग यन्नेस अदिक यम्ब्रेस मूसा अन्द विरोध माळीदुर, हांग अच ईंदुर भी सच्चाई इन विरोध माळतार; ईंदुर हिंग मंळसा आर, यार्द दिमाक भ्रष्ट आगेग्याद अदिक ईंदुर विश्वास दा असफल आर. लेकीन ई लॉकुर ईदुर से मुंद वाळुस सकालुर, यतिकी सप्पा लॉकुर नोळ्यार कि आंदुर याट मूर्ख आर. हांग अच ह्यांग यन्नेस अदिक यम्ब्रेस उन सांगुळ आत.
तीमुथियुस उक विशेष निर्देश
लेकीन नी नान शिक्षा, नान जीवन इन आचरण, उद्देश विश्वास, धीरज, प्यार, सहनशीलता ई सप्पा मातगोळी वळ्लीद रीति देल जान्सत्या; 1नांद सताव अदिक नानव दुख, अदिक अन्ताकिया अदिक इकुनियुम अदिक लुस्त्रा दा जो भयंकर यातनागोळ नानी कोटकु आगीदव अदिक यदरी ना सहन माळदीन, ईद नी जान्सत्या, तरी भी प्रभु नानी ईव सप्पा दुखगोळ से बीळ्सदुन. लेकीन यास मसीह यीशु दा भक्ति इन सांगुळ जिन्दगी बितुसोद चाहासतार आंदुर सप्पा मुंदुर सतुस्कु आदार; लेकीन दुष्ट अदिक बयकुसावाळेर ध्वाका कोळतेला अदिक ध्वाका तिनतेला, बिगळुस्त होटोदार. लेकीन नी आ सच्चाई इन मातगोळ मा जो नी कलत्या अदिक विश्वास माळ्या, ईद जान्सकु मजबूत बन्सकु ईर कि नी अवरी याता लॉकुर से कलत्या, अदिक स्याणपन टु पवित्रशास्त्र अपमान अर्तकु आद, जो नीनी यीशु मसीह मा विश्वास माळदुर देल उद्धार हासिल माळोर साटी हुश्यार माळ सकतद. सम्पुर्ण पवित्रशास्त्र परमेश्वर उन प्रेरणा देल रचुसकु आग्याद अदिक उपदेश, अदिक समजुसोद, अदिक सुधारन माळोद, अदिक न्यायीपन इन शिक्षा साटी फायदेमंद आद, ताकी परमेश्वर उन जन सिद्ध आगुल, अदिक हर ऊंद वळ्लीद क्याल्सा साटी तयार आगेगुल.
Source notes (1)
- Cross-reference प्रेरितगोळ १३:१४-५२; प्रेरितगोळ १४:१-७; प्रेरितगोळ १४:८-२०
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.