परमेश्वर उन वचन
२ कुरिन्थि 9
संगी-मसीहगोळ्द साटी सहायता
ईग आ स्यावा अन्द बारा दा जो पवित्र लॉकुर्द साटी माळकु आगतद, नानी नीमी लिखसोद जरूरी हैलेच. यतिकी ना नीम मन इन तयारी इक अरूतीन, यदुर कारण ना नीम बारा दा मकिदुनिया नगर इन ईरावाळेर्द मुंद घमण्ड तोर्सतिन कि अखाया नगर इन लॉकुर ऊंद साल टु तयार आग्यार, अदिक नीम उत्साह मात्त हापाळ मुंदुर इक भी तयार माळ्याद. लेकीन ना वार्टुर इक इदुरसाटी कळीन कि नाव जो घमण्ड नीम बारा दा तोर्सदेव, अद ई मात दा व्यर्थ ईरबाळुल; लेकीन ह्यांग ना अंदीन हांग अच नीव तयार ईरी, हिंग आगबाळुल कि अगर यावारा मकिदुनिया नोर ईरावाळेर नान सांगुळ बरूल अदिक नीमी तयार ईला नोळुल, रा आग सकतद कि ई भरोसा अन्द कारण नाव ईद अनालेव कि नीव लज्जित आदेव. इदुरसाटी ना वार्टुर से ईद विनती माळोद जरूरी सम्सदीन कि आंदुर पयले टु नीम हात्ती होगुल, अदिक नीम उदारता अन्द काय यदुर बारा दा पयले टु वचन कोटकु आगीत, तयार माळकु ईटुल कि ई दबाव देल ईला लेकीन उदारता अन्द काय इन घाई तयार आगुल.
लेकीन मात ईद आद: जो थ्वाळासा बोऊसतान, आव थ्वाळा अच कळदान; अदिक जो हापाळ बोऊसतान, आव हापाळ कळदान. हर ऊंद मंळसा ह्यांग मन दा ठानस्यान हांग अच दान माळुल; ना कुळकुळ्स तेला अदिक ना दबाव देल, यतिकी परमेश्वर खुशी देल जो कोळतान आऊन से अच प्यार ईटतान. परमेश्वर सप्पा प्रकार इन अनुग्रह नीमी हापाळ तरीका देल कोळ सकतान यदुर देल हर मात दा अदिक हर समय, सप्पा येनारा, जो नीमी जरूरी आद, नीम हात्ती ईरूल; अदिक हर ऊंद वळ्लीद क्याल्सा अन्द साटी नीम हात्ती हापाळ येनारा ईरूल. ह्यांग शास्त्र दा लिख्सकु आद,
“आव सळग्यान माळदुन, आव कंगालगोळी दान कोट्टुन,
आऊन न्याय हमेशा बन्सकु ईत्तीत.”
इदुरसाटी जो बोऊसावाळा अक बींजा अदिक ऊमोर साटी रोट्टी कोळतान, आव नीमी बींजा कोट्टान, अदिक आऊक फलवन्त माळ्यान; अदिक नीम न्याय इन कायगोळी वाळुस्यान. नीव हर मात दा सप्पा प्रकार इन उदारता अन्द साटी जो नाम द्वारा परमेश्वर उन धन्यवाद माळसुसतद, धनवान माळकु आदीर. यतिकी ई स्यावा अक पुरा माळदुर देल ना सिर्फ पवित्र लॉकुर्द जरवतगोळ पुरा आगताव, लेकीन लॉकुर दी टु परमेश्वर उन भी हापाळ धन्यवाद आगतद. यतिकी ई स्यावा अक प्रमाण स्वीकार माळकु आंदुर परमेश्वर उन महिमा प्रगट माळतार कि नीव मसीह अन्द खुशखबरी इक मान्सकु आऊन हात्ती ईरतीर, अदिक आंदुर्द अदिक सप्पा मुंदुर्द सहायता माळदुर दा उदारता प्रगट माळतेला ईरतीर. अदिक आंदुर नीम साटी प्रार्थना माळतार; अदिक इदुरसाटी कि नीम मा परमेश्वर उन हापाळ अच अनुग्रह आद, नीम लालसा माळतेला ईरतार. परमेश्वर उन, आऊन आ दान इन साटी जो वर्णन टु व्हार्या आद, धन्यवाद आगुल.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.