२ कुरिन्थि 10

पौलुस उन अधिकार

1ना आवा पौलुस हुईन जो नीम मुंद गरीब आईन लेकीन बेन हिंद नीम दी साहस माळतीन, नीमी मसीह अन्द नम्रता अदिक कोमलता अन्द कारण समझुसतीन. 2ना ईद विनती माळतीन कि नीम मुंद नानी निर्भय आगकु साहस माळोद बिळबाळुल, ह्यांग ना थ्वाळासा लॉकुर मा जो नामी मय इन अनुसार नळावाळेर सम्सतार, आंदरी साहस तोरसोद विचार माळतीन. 3यतिकी नाव मय इन अनुसार नळुतेव अदिक वयाळतेव, तरी भी नाव मय इन अनुसार लळाई माळालेव. 4यतिकी नाम लळाई इन हथियार शारीरिक ईला, लेकीन किल्लागोळ्द नाश माळोर साटी परमेश्वर उन सामर्थ्य देल परिपुर्ण आद. 5इदुरसाटी नाव कल्पनागोळ्द अदिक हर ऊंद धोळ्द मात इन, जो परमेश्वर उन पयचान इन विरोध दा येळतद, खंडन माळतेव; अदिक हर ऊंद भावना अक कैद माळकु मसीह अन्द आग्याकारी माळ बुळतेव, 6अदिक तयार ईरतेव कि याग नीम आग्या पालन पुरा आगेगुल, रा हर ऊंद प्रकार इन आग्या अन्द उल्लंघन माळावाळेर इक दण्डित माळेव.

7नीव अवा मातगोळी नोळी, जो कण्णगोळ्द मुंद आव. अगर यारीकारा तान मा ईद भरोसा आद कि ना मसीह नव हुईन, रा आव ईद भी जान्स कोमुल कि ह्यांग आव मसीह नव हुन हांग अच नाव भी हुयेव. 8यतिकी अगर ना आ अधिकार इन बारा दा मात्‍त यक्कुल घमण्ड तोरसाईन, जो प्रभु नीम बीगळुसोर साटी ईला लेकीन सुधरूसोद साटी नामी कोटान, रा ना लज्जित ईला आगाईन. 9ईद ना इदुरसाटी अनतीन कि चिट्ठी गोळ्द द्वारा नीमी अंजक्या तोरसावाळा ठहरूसतीदील. 10यतिकी आंदुर अनतार, “आऊन चिट्ठी गोळ रा गंभीर अदिक प्रभावशाली आव; लेकीन याग आव मुंद इरतान, रा आव मय देल कमजोर अदिक माताळदुर दा हल्का अरूकु आगतान.” 11जो हिंग अनतान, आव ईद ऊमसुल कि ह्यांग बेन हिंद चिट्ठी गोळ दा नामव वचन आव, हांग अच नीम मुंद नामव क्याल्सा भी ईत्‍ताव.

12यतिकी नामी ईद साहस हैलेच कि नाव तान तान इक आंदुर दा टु येनारा सांगुळ आळुल या आंदुर से खुद इक मीलुसुल, जो तान प्रशंसा खुद माळतार, अदिक तान तान इक आपस दा आळ्‍दकु तौलुस्कु आबुर दाबुर से मिलान माळतार, आ लॉकुर खुद मूर्ख ठहरूस्तार. 13नाव रा सीमा टु व्हार्या घमण्ड यागलु भी माळतीदील, लेकीन अदा सीमा ताका जो परमेश्वर नाम साटी ठहरूस्यान, अदिक अदुर्दा नीव भी होट बंदीर, अदिक आऊंदा अनुसार घमण्ड भी माळ्यार. 14यतिकी नाव तान मर्यादा अन्द व्हार्या होगालेव, जसा कि नीम ताका पोहचुसोद दशा दा ईला ईराईत, उलटा मसीह अन्द खुशखबरी केळ्सतेला नीम ताका पोहचुसेग्याव. 15नाव मर्यादा टु व्हार्या दुसरा अन मेहनत मा घमण्ड माळालेव; लेकीन नामी आशा आद कि याग-याग नीम विश्वास वाढुस्तेला होदीत आग-आग नाव तान मर्यादा अन्द अनुसार नीम कारण मात्‍त वाढ़ुस्त होदेव, 16ताकी नाव नीम मर्यादा से मुंद वाढ़ुस्कु खुशखबरी केळसेव, अदिक ईद ईला कि नाव दुसरा अन मर्यादा अन्द बुळ्क माळदव क्याल्सा मा घमण्ड माळेव.

17ह्यांग शास्त्र अनतद, घमण्ड माळोद आद, आव प्रभु मा घमण्ड माळुल. 18यतिकी जो तान बळाई माळतान आव ईला, लेकीन यार्द बळाई प्रभु माळतान, आवा ग्रहण माळकु आगतान.