परमेश्वर उन वचन
२ कुरिन्थि 5
यतिकी नाव जान्सतेव कि याग नाम पृथ्वी माकळोद ड्यारा घाई मान्ना केडुकु आदीत, रा नामी परमेश्वर उन दी टु स्वर्ग मा ऊंद हिंग भवन सिक्कीत जो मान्ना कय देल माळकु ईरतीदील, लेकीन अनन्तकालीन आद. ईदुर दा रा नाव यक्कुल श्वास ताकोमकु माताळतेव अदिक हापाळ लालसा ईटतेव कि तान स्वर्गीय मान्ना अक हाक्क कोंडेव कि ईदुर हाकदुर देल नाव दंगदंगा सीक बाळुल. अदिक नाव ई ड्यारा दा ईरतेला बोझ देल वोतकु श्वास ताकोमतेला माताळ्त ईरतेव, यतिकी नाव ईळसोद ईला बल्की हाक्कोद चाहासतेव, ताकी अद जो मरनहार आद जीवन दा मुळकेगुल. याव नामी ईदा मात इन साटी तयार माळ्यान आव परमेश्वर हुन, याव नामी बयाना दा आत्मा भी कोटान.
इदुरसाटी नाव हमेशा हिम्मत कटकु ईरतेव अदिक ईद जान्सतेव कि यागासताका नाव मय दा ईरतेव, आगासताका प्रभु से ब्यार्र आयेव. यतिकी नाव रूप इक नोळकु ईला, लेकीन विश्वास देल नळुतेव. इदुरसाटी नाव हिम्मत कटकु ईरतेव, अदिक मय टु ब्यार्र आगकु प्रभु उन सांगुळ ईरोद मात्त यक्कुल वळ्लीद सम्सतेव. ईदुर कारण नाम मन इन उमंग ईद आद कि चाहे सांगुळ ईत्तेव चाहे ब्यार्र ईत्तेव, लेकीन नाव आऊक भाऊस्त ईत्तेव. 1यतिकी जरूरी आद कि नाव सप्पा मुंदुर्द हाल मसीह अन्द न्याय आसन इन मुंद तेर्दोगुल, कि हर ऊंद मंळसा तान तान वळ्लीद बुरा क्याल्सागोळ्द बदला जो आव मय इन द्वारा माळ्यान सिकुल.
परमेश्वर से मेल-मिलाप
इदुरसाटी प्रभु उन अंज्क मान्सकु नाव लॉकुरी समझुसतेव; लेकीन परमेश्वर मा नाम हाल प्रगट आद, अदिक नान आशा ईद आद कि नीम विवेक मा भी प्रगट आगीदाद. नाव तरी भी तान बळाई नीम मुंद माळालेव, बल्की नाव तान बारा दा नीमी घमण्ड माळोद मवका कोळतेव कि नीव आंदरी उत्तर कोळ सकी, जो मन मा ईला बल्की दिखावटी मातगोळ मा घमण्ड माळतार. अगर नाव बेसुध आयेव रा परमेश्वर उन साटी, अदिक अगर चैतन्य आयेव रा नीम साटी आयेव. यतिकी मसीह अन प्यार नामी मजबुर माळ बुळतद; इदुरसाटी कि नाव ईद सम्सतेव कि याग ऊंद सप्पा मुंदुर साटी सोत्तुन रा सप्पा सोत्तुर. अदिक आव ई निमित्त सप्पा मुंदुर साटी सोत्तुन कि जो जित्ता आर, आंदुर मुंद इक तान साटी जित्ता ईरबाळुल लेकीन आऊन साटी जो आंदुर साटी सोत्तुन अदिक बाक जित्ता आदुन.
इदुरसाटी ईग टु नाव यारीकु मय इन अनुसार सम्सतीदील. यतिकी नाव मसीह अक भी मय इन अनुसार जान्सीदेव, तरी भी ईग टु आऊक हिंग जान्सतीदील. इदुरसाटी अगर यावारा मसीह दा आन रा आव व्हाशोद दुनिया आन: हाळोद मातगोळ बितसेग्याव; नोळी, सप्पा मातगोळ व्हाशेव आगेग्याव. ईव सप्पा मातगोळ परमेश्वर उन दी टु आव, याव मसीह अन द्वारा तान सांगुळ नाम मेल-मिलाप माळ कोंडुन, अदिक मेल-मिलाप इन स्यावा नामी सौप्सदुन. मतलब परमेश्वर मसीह अन द्वारा तान सांगुळ दुनिया अन मेल-मिलाप माळ कोंडुन, अदिक आंदुर्द अपराधगोळ्द दोष आंदुर मा हचीदिल, अदिक आव मेल-मिलाप इन वचन नामी सौप्सदुन.
इदुरसाटी, नाव मसीह अन राजस्वर्गदूत हुयेव; मान्सी परमेश्वर नाम द्वारा विनती माळेत्यान. नाव मसीह अन दी टु निवेदन माळतेव कि परमेश्वर उन सांगुळ मेल-मिलाप माळकोमी. जो पाप देल अग्यात ईरोन, आऊक अच आव नाम साटी पाप ठहरूसदुन कि नाव आऊन दा आगकु परमेश्वर उन मुंद नेक मंळसा बनसेगुल.
Source notes (1)
- Cross-reference रोमियों १४:१०
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.