परमेश्वर उन वचन
२ कुरिन्थि 4
मुण्ण इन गळग्यागोळ दा धन
इदुरसाटी याग नाम मा हिंग दया आत कि नामी ईद स्यावा सिक्त, रा नाव हिम्मत बिळालेव. लेकीन नाव शरम इन होचकु क्याल्सागोळ्द त्याग माळ बुटेव, अदिक ना चतुराई देल नळुतेव, अदिक ना परमेश्वर उन वचन दा मिलावट माळतेव; लेकीन सच्चाई इक प्रगट माळकु, परमेश्वर उन मुंद हर ऊंद मंळसा अन्द अंतर मन दा तान भलाई कुर्सतेव. लेकीन ईद खुशखबरी जो नाव केळ्सतेव इदुर मा पळदा बिदकु आद, रा ईद नाश आगावाळेर दा साटी बिदकु आद. अदिक आ अविश्वासीगोळ्द साटी, यार्द बुद्धी ई दुनिया अन मय कुढ्ढ माळ बुटान, ताकी मसीह जो परमेश्वर उन प्रतिरूप हुन, आऊन चमकदार खुशखबरी इन उजुळ आंदुर नोळ सकबाळुल. यतिकी नाव तान तान इक ईला, लेकीन मसीह यीशु उक प्रचार माळतेव कि आव प्रभु हुन; अदिक तान बारा दा ईद अनतेव कि नाव खुद यीशु मसीह नव सेवक हुयेव. इदुरसाटी कि परमेश्वर अच हुन, याव अंदुन, “अंधार दा टु ज्योति चमकुसुल,” अदिक अदा नाम दिलगोळ दा चमकुस्त कि परमेश्वर उन महिमा अन्द पयचान इन ज्योति यीशु मसीह अन्द मार्रा मा टु प्रकाशमान आगुल.
लेकीन नाव जो मुण्ण इन गळग्यागोळ घाई आयेव यदुर दा अद आत्मिक धन ईटकु आद कि ईद तोरसोर साटी कि ईद असीम सामर्थ्य नाम दी टु ईला, बल्की परमेश्वर उन दी टु अच हुन. नाव नाकु दी टु क्लेश रा भोग्सतेव, लेकीन मुसीबत दा बिळालेव; नीर उपाय रा आयेव, पर निराश आगालेव; सतुस्कु रा आगतेव, पर त्यागस्कु आगालेव; केडुकु रा आगतेव; लेकीन नाश आगालेव. नाव यीशु उन मृत्यु उक तान मय मा हर समय हुडुकु वयाळतेव कि यीशु उन जीवन भी नाम मय दा प्रगट आगुल. यतिकी नाव जित्ता जी हमेशा यीशु उन कारण मृत्यु उन कय दा सोपस्कु आगतेव कि यीशु उन जीवन भी नाम मरनहार मय दा प्रगट आगुल. ई प्रकार सायोद कार्य नाम मा प्रभाव हाकतद अदिक जीवन नीम मा.
इदुरसाटी कि नाम दा अदा विश्वास इन आत्मा आद, यदुर बारा दा शास्त्र दा लिख्सकु आद, “ना विश्वास माळदीन, इदुरसाटी ना माताळदिन.” इदुरसाटी नाव भी विश्वास माळतेव, इदुरसाटी माताळतेव. यतिकी नाव जान्सतेव कि याव प्रभु यीशु मसीह अक जित्ता माळदुन, आवा नामी भी मसीह दा भागी जान्सकु जित्ता माळ्यान, अदिक नीमी तान मुंद उपस्थित माळ्यान. यतिकी सप्पा वस्तुगोळ नीम साटी हुव, ताकी अनुग्रह हापाळ मुंदुर द्वारा यक्कुल आगकु परमेश्वर उन महिमा साटी धन्यवाद कोळोद यक्कुल वाळुसित.
विश्वास देल जिन्दगी माळोद
इदुरसाटी नाव हिम्मत बिळालेव; यतिकी नाम मय इन नाश आग्त ईरतद, तरी भी नाम बुळ्क इन मंळसातत्व दिन रोज व्हाशोद आग्त होगतद. यतिकी नाम घळी तिमुर्द स्यांळ्दतुसा क्लेश नाम साटी हापाळ महत्वपुर्ण अदिक अनन्त महिमा उत्पन्न माळ्त होगतद; अदिक नाव रा नोळ्द वस्तुगोळी ईला लेकीन अनदेखा वस्तुगोळी नोळ्त ईरतेव; यतिकी नोळ्द वस्तुगोळ थ्वाळासा अच दिन साटी आव, लेकीन अनदेखा वस्तुगोळ अनन्त काल ताका बन्सकु ईरताव.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.