१ तीमुथियुस 6

1यास दासगोळ जुआळी इन ल्यालमा आर, आंदुर तान-तान स्वामी इक धोळ्द आदर इन लायक जानसुल, ताकी परमेश्वर उन हेसुर अदिक शिक्षा अन्द अपमान आगबाळुल.

ख्वाटा शिक्षा अदिक धन इन लोभ

2यार स्वामी विश्वासी आर आंदरी आंदुर कम आदर कोळबाळुल यतिकी आंदुर वार्टुर उर, बल्‍की आंदुर्द मात्‍त यक्कुल स्यावा माळी, यतिकी यारी स्यावा अन लाभ सीकतद आंदुर विश्वासी अदिक आंदुर प्रिय आर. ई मातगोळ शिक्षा कोळी अदिक हांग अच माळोर साटी प्रोत्साहित माळतेला ईरी. 3अगर यावारा दुसरा अच प्रकार इन शिक्षा कोळतान अदिक सही मातगोळी, मतलब नाम प्रभु यीशु मसीह अन्द निर्देशगोळ इक अदिक आ शिक्षा इक मान्सालुन, जो देवी शिक्षा अन अनुसार आद, 4रा आव अभिमानी आगेदुन, अदिक येनु जान्सालुन; बल्‍की आऊक विवाद अदिक शब्दगोळ मा तर्क हचोद बिमारी आद, यदुर देल ह्यावा, अदिक झगळा, अदिक अपमान नव मातगोळ, अदिक बेकार-बेकार संक्या, 5अदिक आ मंळसागोळ दा फालतु लळाई-झगळा पैदा आगताव यार्द दिमाक भ्रष्ट आगेग्याद, अदिक आंदुर सच्चाई इन हादी देल अलग आगेग्यार, जो सम्सतार कि भक्ति कमाई इंद जरया हुन.

6लेकीन सन्तोष इन सांगुळ भक्ति माळोद धोळ्द कमाई आद. 7यतिकी नाव रा ना दुनिया दा येनारा हुडुकु बंदेव अदिक ना येनारा वय सकतेव. 8अगर नाम हात्‍ती तिनली अदिक हाकली आद, रा ईऊर्दा का सन्तोष ईर पायजे. 9लेकीन जो धनी आगोद चाहासतार, आंदुर ईत्‍ता परीक्षा अदिक फासा अदिक हापाळ सा मूर्खतापुर्ण अदिक हानिकारक लालसागोळ दा फसुसतार, जो मंळसागोळी बिगळुस बुळतद अदिक विनाश इन खाई दा ढकलुस बुळतद. 10यतिकी पैस्या अन्द लोभ हर प्रकार इन बुराईगोळ्द जळ हुन, यदरी हासिल माळोद कोशिश माळतेला हापाळ मुंदुर विश्वास देल भटकुसकु तान-तान इक कई प्रकार इन दुखगोळ देल छल्ली माळ कोंडार.

तीमुथियुस उन व्यक्तिगत निर्देश

11लेकीन हे परमेश्वर उन विश्वासी जन, नी ई मातगोळ हात्‍ती टु ओळ, अदिक न्याय, भक्ति, विश्वास, प्यार, धीरज अदिक नम्रता अन्द हिंद हत. 12विश्वास इन वळ्लीद कुस्ती आळ; अदिक तान साटी आ अनन्त जीवन इक हासिल माळकोम, यदुर साटी नी कारूकु आग्या अदिक हापाळ सा गवाहगोळ मुंद वळ्लीद अंगीकार माळीद. 131ना नीनी ईद आग्या परमेश्वर उन मुंद जो सप्पा मुंदुरी जीवन कोळतान, अदिक मसीह यीशु उक गवाह माळकु याव पुन्तियुस पिलातुस उन मुंद वळ्लीद गवाही कोट्टुन. कोळतीन, 14कि नी नाम प्रभु यीशु मसीह अन्द प्रगट आगासताका ई आग्या अक निष्कलंक अदिक निर्दोष ईट, 15परमेश्वर जो परमधन्य अदिक ऊंद मात्र शासक अदिक राजागोळ राजा अदिक प्रभुगोळ प्रभु हुन, आऊन द्वारा यारी आव ठीक समय मा प्रगट माळ्यान. 16अदिक अमरता सिर्फ आऊंदा हुन, अदिक आव ज्योति दा ईरतान, येल ताका याऊ पोहचुस सकालुन, अदिक ना आऊक यावारा मंळसा नोळ्यान अदिक ना नोळ सकतान. आऊन प्रतिष्ठा अदिक सामर्थ्य हमेशा हमेशा ईत्‍तीत. आमीन.

17ई दुनिया अन धनवानगोळी आग्या कोळ कि आंदुर अभिमानी आगबाळुल अदिक चंचल धन मा आशा ईट बाळुल, लेकीन परमेश्वर मा जो नाम सुख इन साटी सप्पा येनारा बहुतायत देल कोळतान. 18आंदरी आग्या कोळ कि आंदुर भलाई माळुल, अदिक भला क्याल्सागोळ दा धनी आगुल. अदिक उदारता देल सहायता कोळदुर दा तयार ईरूल, 19अदिक मुंदळोद साटी ऊंद वळ्लीद पायवा हाक्‍कु ईटुल कि खरा जीवन इक वश दा माळ कोमुल.

20हे तीमुथियुस, ई धरोवर इन रखवाली माळ; अदिक यदरी येनारा लॉकुर गलती देल ग्यान अनतार, अदुर्द बेकार मातगोळ अदिक विरोध इन मातगोळ देल अलग ईर. 21यास मुंदुर ई ग्यान इक मान्सकु विश्वास देल भटकुसेग्यार.

नीम मा अनुग्रह आग्त ईरूल.