परमेश्वर उन वचन
१ तीमुथियुस 5
विश्वासीगोळ प्रती जिम्मेदारीगोळ
यातारा बाट्ट उक कठोरता देल दनकुस बाळेत, लेकीन आऊक आप्प सम्सकु समझुसबुळ, अदिक हारोदोर मंळसागोळी वार्ट सम्सकु; हाळामुंड आर्तेर इक मोय सम्सकु; अदिक हारोदोर आर्तेर इक आकतींग सम्सकु पुरा पवित्रता देल समझुसबुळ.
आ रांड्यागोळ्द ध्यान ईट, जो सही दा जरवतमंद आर. अगर यातारा रांड्या अन चिकोर या नातु-नतरागोळ ईतीदार, रा आंदुर तान मोय-आप्प अदिक आजा-आजी इन पालन पोषण इन बदला चुकुसली अदिक तान परिवार इन चिन्ता माळोर द्वारा तान न्यायी मातगोळी जीवन कार्य दा तरोद पयले कलु पायजे, यतिकी ईद परमेश्वर उक पंसद आद. जो रांड्या सही दा जरवतमंद आर, अदिक आकिन यारू हैलेच, अदिक आक तान पुरा आशा परमेश्वर मा ईट्यार, अदिक ईळ्लक हागुल विनती अदिक प्रार्थना माळतेला परमेश्वर से मदत बेळतार; लेकीन जो रांड्या भोग विलास दा जीऊसतार, आक जित्ता हैलेच लेकीन जित्ता दा का सोतोग्यार. इव मातगोळ्द भी लॉकुरी निर्देश कोळतोग ताकी आंदुर निर्दोष ईरूल. लेकीन अगर यावारा तान रिश्तेदारगोळ दी, विशेष तान परिवार इन सदस्यगोळ्द मदत माळालुन, रा आव विश्वास देल तिरगेग्यान अदिक अविश्वासी देल भी हापाळ बुरा बनसेग्यान.
आ रांड्यागोळ्द विशेष सुची दा जो आर्थिक सहायता ताकोमेत्यार आका रांड्या अन हेसुर लिख्सकु आगुल जो साठ वर्ष से कमीनोर ईला ईतीदार, अदिक तान गंळ्स उन विश्वासलायक ईतीदार, अदिक भला क्याल्सा दा सुनाम ईतीदार, याक चिकोर्द पालन-पोषण माळीदार; पाऊनागोळ्द स्यावा माळीदार, पवित्र लॉकुर्द काल तोळदिदार, दुखीगोळ्द सहायता माळीदार, अदिक हर ऊंद भला क्याल्सा दा मन हचीदार.
लेकीन हारोदोर रांड्यागितेर्द ईद सुची सम्मिलीत माळबाळी यतिकी मसीह अन प्रती आंदुर्द समरपन मा याग आंदुर्द बारा दा वासना पुरा इच्छागोळ हावी आगताव रा आंदुर मात मदा माळोद चाहसतार, अदिक दोषी ठहरूस्तार, यतिकी आंदुर तान पयला वचन इक मुर्द बुट्टुर. ईदुर अलावा आंदुर बेकार आगतार अदिक मानोन-मान्नी वयाळकु आलसी आगोद कलुतार, अदिक सिर्फ आलसी ईला लेकीन ईत्त आत्त माळतार अदिक बिना मतलब इन अनुचित मातगोळ माताळतार. इदुरसाटी ना ईद चाहासतीन कि हारोदोर रांड्यागितेर मदा माळुल, अदिक चिकोर हाळुल अदिक मान्न मकान संभाळसुल, अदिक यातारा विरोध इक बदनाम माळोद मवका कोळबाळुल. यतिकी हापाळ रा बयकुस्कु शैतान उन हिंद आगेग्यार. अगर यातारा विश्वासीगीत इन मान्या रांड्यागोळ आर, रा आका आंदुर्द सहायता माळुल कि मंडली मा बोझ ईला आगुल, ताकी आंदुर आंदुर्द सहायता माळ सकुल जो रांड्यागोळ खराखुरा जरवतमंद आर.
जो हाळाबाट्टुर मंडली इन वळ्लीद स्यावा माळतार, खास माळकु आंदुर जो वचन केळसोर अदिक कल्सदुर दा मयनत माळतार, आंदुर येढ्ढ गुणा आदर इन लायक सम्सकु आगुल. 1यतिकी शास्त्र अनतद, “जो वस्ता दावन इन आद अदुर बाय कट बाळेतीर,” यतिकी “मजदूर तान मजदूरी इन हकदार आन.” यातारा दोष यातारा मंडली इन हाळाबाट्टुर मा हचकु आगुल रा येढ्ढ या मुर गवाहगोळ्द बिना अदरी केळबाळ. पाप माळावाळेर इक सप्पा मुंदुर मुंद दनकुस, ताकी दुसरा लॉकुर भी अंजुल.
परमेश्वर, अदिक मसीह यीशु अदिक निवळुस्द स्वर्गदूतगोळ इक उपस्थित जान्सकु ना नीनी चेतावनी कोळतीन कि ई निर्देशगोळी बिना मतभेद इन अदिक यावारा ऊंद इन पक्षपात ताकोमकु यातोदु क्याल्सा माळबाळ. मंडली इन स्यावा अन्द नियुक्ती इन साटी बिना सोच सम्सकु यारदारा मा तान कय राटनेरी ईट बाळेत, अदिक दुसरा अन पापगोळ दा भागी आगबाळेत; तान-तान इक पवित्र माळकु ईटेत.
सिर्फ नीर इक अच कुडावाळा ईरबाळ, लेकीन तान व्हाट्टा अन्द घळी-घळी बिमार आगोद कारण थ्वाळा-थ्वाळा अंगुर इन रास्सा भी क्याल्सा दा तरतोग.
थ्वाळासा मंळसागोळव पाप स्पष्ट रूप देल प्रगट आगेगताव, अदिक न्याय इन साटी प्रस्तुत माळकु आगेगताव, लेकीन दुसरा मंळसागोळव पाप बाद्दा प्रगट आगताव. ईदा प्रकार भला क्याल्सा भी स्पष्ट रूप देल प्रगट आगेगताव; लेकीन जो भला क्याल्सा प्रगट आगालव अव भी होचकु ईर सकालव.
Source notes (1)
- Cross-reference मत्ती १०:१०; लूका १०:७
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.