परमेश्वर उन वचन
१ तीमुथियुस 4
तीमुथियुस उक निर्देश
पवित्र आत्मा स्पष्टता देल अनतद कि बरावाळा समयगोळ दा हापाळ सप्पा लॉकुर तान विश्वास इक त्याग्स बुट्टार अदिक भटकुसावाळा आत्मागोळ अदिक शैतान उन द्वारा कल्सद मातगोळ हींद आगेदार. ईद आ ख्वाटा पाखंडी मंळसागोळ्द कारण आदीन, यार्द विवेक मान्सी होततेला लोवा देल दाग्सकु आग्याद, जो मदा माळोर से रोकस्यार, अदिक ऊमोद येनारा वस्तुगोळ देल अलग ईरोद आग्या कोट्टार, यवरी परमेश्वर इदुरसाटी घळुस्यान कि विश्वासी अदिक सच्चाई इक अरावाळेर अवरी धन्यवाद इन सांगुळ तिनुल. यतिकी परमेश्वर उन माळ्द हर ऊंद वस्तु वळ्लीद आद, अदिक यातोदु वस्तु अस्वीकार माळोद लायक हैलेच; लेकीन ईद कि धन्यवाद इन सांगुळ तिनकु आगुल, यतिकी परमेश्वर उन वचन अदिक प्रार्थना अन द्वारा शुद्ध आगेगतद.
यीशु मसीह ऊंद वळ्लेव सेवक
अगर नी वार्टुर इक ई मातगोळ्द याद कोळतेला ईत्या, अदिक विश्वास इन सच्चाई अदिक आ वळ्लीद शिक्षा अन मातगोळ से, जो नी मान्सतेला बंद्या; रा मसीह यीशु उन वळ्लेव सेवक ठहरूस्या. परमेश्वर रहित कात्ता-कात्तागोळ देल जो सिर्फ हाळामुंडगोळ द्वारा केळ्सकु अशुध्द कात्तागोळ आव येनु संबंध ईटबाळ, लेकीन भक्ति इन साधना माळ. यतिकी मय इन साधना देल फायदा गोर्त आगतद, लेकीन भक्ति सप्पा मातगोळ साटी लाभदायक आद, यतिकी ई समय इन जीवन अदिक बरावाळा जीवन इन भी वादा इदुर्दा साटी आद. हिंग ऊंद विश्वास ईटा लायक कहावत आद, जो पुरा रीति देल स्वीकार माळा लायक आद. यतिकी नाव मयनत अदिक कोशिश इदुरसाटी माळतेव कि नाम आशा आ जित्ता परमेश्वर मा आद, जो सप्पा मंळसागोळ्द अदिक खास माळकु विश्वासीगोळव उद्धारकर्ता आन.
इव मातगोळ्द आग्या कोळ अदिक कल्सतेला ईर. याऊ नीन जवानी इक तुच्छ सम्सबाळुल; लेकीन वचन, माताळदुर दा, चाल-चलन, अदिक प्यार, अदिक विश्वास, अदिक पवित्रता दा विश्वासीगोळ साटी आदर्श बनसेग. यागासताका ना बरालीन, आगासताका लॉकुर न्याड्या प्रभु उन वचन वाचुसदुर दा अदिक उपदेश कोळदुर दा अदिक कल्सदुर दा तान इक मग्न ईट. आ वरदान इन प्रती जो नीन दा आद, अदिक भविष्यवाणी इन द्वारा स्याणागोळ्द कय दा ईटा होती नीनी सीकीत, अदरी अनदेखा माळबाळ. ई मातगोळ्द विचार माळ्त ईर अदिक ईऊर दा तान ध्यान हचकु ईट, ताकी नीन उन्नती सप्पा मुंदुर मा प्रगट आगुल. तान जीवन इन दी अदिक तान शिक्षागोळ सावधानी ईट. ई मातगोळ मा संची ईर, यतिकी अगर हिंग माळतेला ईत्या रा नी तान अदिक तान केळावाळेर साटी भी उद्धार इन कारण आद्या.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.