१ तीमुथियुस 3

मंडली नोर अध्यक्ष

1ईद मात सही आद अगर यावारा तान मन दा सोचतान कि स्याण्णा आगोद चाहासतान, आव भला क्याल्सा अन इच्छा माळतान. 212 ईद जरूरी आद कि स्याण्णा निर्दोष, अदिक ऊंदा हिंग्स उन गंळ्स, शालीन, आत्मसंयमी, आदरणीय, अतिथी-सत्कार माळावाळा, अदिक कलसोर दा निपुण ईरूल. 3कुडावाळा या बडाबडी माळावाळा ईला ईरूल; बल्‍की मुलायम ईरूल, अदिक ना झगळेलु, अदिक ना धन इन लालची ईरूल. 4तान मान्ना अन वळ्लीद व्यवस्था माळुल, अदिक तान चिकोर चिंळ्गेर अनुशासन दा ईटकु आंदुर से आदर ताकोमावाळा ईरूल. 5अगर यावारा तान मान्ना अन्द अच व्यवस्था माळोद ईला जान्सतीदान, रा परमेश्वर उन मंडली इन रखवाली ह्यांग माळ्यान? 6बाक ईद कि आव विश्वास दा परीपक्व ईरूल, ईदारा हिंग आगबाळुल कि अभिमान माळकु शैतान उन घाई दण्ड पाऊसुल. 7अदिक मंडली इन व्हार्या दा भी आऊन हेसुर आगुल, हिंग आगबाळुल कि अपमानीत आगकु शैतान उन फासा दा फसुसेगुल.

मंडली नोर सेवक

8हांग अच मंडली अन्द सेवकगोळी भी गंभीर आग पायजे, येढ्ढ रंगवाळेर, कुडावाळेर अदिक नीच कमाई इन लोभ माळावाळेर ईला ईरूल; 9लेकीन विश्वास इन भेद इन शुद्ध विवेक इक गहराई देल हुडुकु ईटुल. 10अदिक आंदुर पयले परख आगुल, आग अगर निर्दोष होट्टुर रा बाक मंडली इन सेवक उन क्याल्सा माळुल. 11ईदा प्रकार देल आंदुर हिंग्सुर भी आदर ताकोमा लायक आर्तेर ईरूल; अदिक अपमान इन मातगोळी माळावळतेर ईला ईरूल, लेकीन शालीन अदिक सप्पा मातगोळ दा विश्वास इन लायक ईरूल. 12मंडली इन सेवक ऊंदा हिंग्स उन गंळ्स ईरूल अदिक चिकोर चिण्ग अदिक तान मान्ना अन्द वळ्लीद व्यवस्था माळोद जानसुल. 13यतिकी जो मंडली इन सेवक वळ्लीद क्याल्सा माळतार, आंदुर तान साटी वळ्लीद पद अदिक मसीह यीशु दा जो आंदुर्द विश्वास आद, अदुर्दा महान साहस हासिल माळतार.

महान राज

14ना नीन हात्‍ती राटनेरी बरोद आशा ईटदुर मा भी ई चिट्ठी नीनी इदुरसाटी लिख्सतीन, 15कि अगर नान बंदुर दा समय आगुल, रा नी जान्स कोम कि परमेश्वर उन घराना दा जो जित्‍ता परमेश्वर उन मंडली आद अदिक जो सच्चाई इन खंबा अदिक पायवा आद, लॉकुर आपस दा ह्यांग बर्ताव माळ पायजे. 16ईदुर दा संदेह हैलेच कि भक्ति इन भेद गंभीर आद, मतलब

अद जो मय दा प्रगट आत,

आत्मा दा न्यायी ठहरूस्त,

स्वर्गदूतगोळ इक कांळ्सदुन,

गैरयहूदीगोळ दा आऊन प्रचार आत,

दुनिया दा आऊन मा विश्वास माळकु आत,

अदिक महिमा दा म्याकुच नेगुकु आदुन.