परमेश्वर उन वचन
१ यूहन्ना 4
आत्मागोळ्द परख माळी
हे प्रिय संगीगोळा, हर ऊंद आत्मा अन्द विश्वास माळबाळी, उलटा आत्मागोळ्द परख माळी कि अव परमेश्वर दी टु हुव का आल्लच; यतिकी हापाळ सा ख्वाटा भविष्यवक्तागोळ दुनिया दा होटकु निदुरकु आर. परमेश्वर उन आत्मा नीव ईदा रीति देल जान्स सकतीर: जो आत्मा मान्स कोमतद कि यीशु मसीह मय दा टु आगकु बंदान आव परमेश्वर उन दी टु हुन, अदिक जो आत्मा यीशु मसीह इक मानसाल, अद परमेश्वर उन दी टु आल्लच; अदिक अदा रा मसीह अन विरोधी इन आत्मा हुन, यदुर्द चर्चा नीव केळ कोंडीर कि आव बरावाळा आन, अदिक ईग भी दुनिया दा आन. हे चिकोरा, नीव परमेश्वर नोर हुईर, अदिक नीव आ आत्मागोळ मा जय हासिल माळीर; यतिकी जो नीम दा आद अद आऊन से जो दुनिया दा आन, महान आन. आंदुर दुनिया नोर आर, ई कारण आंदुर दुनिया अन मातगोळ माताळतार, अदिक दुनिया आंदुर्द केळतद. नाव परमेश्वर उन हुयेव. जो परमेश्वर उक जान्सतान, आव नाम्द केळतान; जो परमेश्वर उक जान्सालुन आव नाम्द केळालुन. ई प्रकार नाव सच्चाई इन आत्मा अदिक भरम इंद आत्मा अक अर्त कोमतेव.
परमेश्वर प्यार हुन
हे प्रिय, नाव आबुर दाबुर दा प्यार ईट्टेव, यतिकी प्यार परमेश्वर से आद, जो यावारा प्यार माळतान, आव परमेश्वर से पैदा आग्यान अदिक परमेश्वर उक जान्सतान. जो प्यार ईटालुन आव परमेश्वर उक जान्सालुन, यतिकी परमेश्वर प्यार हुन. जो प्यार परमेश्वर नाम से ईटतान, अद ईदुर देल प्रगट आग्याद कि परमेश्वर तान ऊंद ठैसा पार उक दुनिया दा कळ्यान कि नाव आऊन द्वारा जीवन प्राप्त माळेव. प्यार इदुर दा हैलेच कि नाव परमेश्वर से प्यार माळदेव, लेकीन इदुर दा आद कि आव नाम से प्यार माळदुन अदिक नाम पापगोळ्द माफ अन साटी तान पार उक कळुदुन.
हे प्रिय, याग परमेश्वर नाम से हिंग प्यार माळदुन, रा नामी भी आबुर दाबुर दा प्यार ईट पायजे. 1परमेश्वर उक याऊ यागलु नोळीदील; अगर नाव आबुर दाबुर दा प्यार ईट्टेव, रा परमेश्वर नाम दा बन्सकु ईरतान अदिक आऊन प्यार नाम दा सिद्ध आग्याद.
इदुर देल अच नाव जान्सतेव कि नाव आऊन दा बन्सकु ईरतेव, अदिक आव नाम दा; यतिकी आव तान आत्मा नामी कोटान. नाव नोळ भी कोण्डेव अदिक गवाही कोळतेव कि आप्प पार उक दुनिया दा उद्धारकर्ता माळकु कळ्यान. जो यावारा ईद मान्स कोमतान कि यीशु परमेश्वर उन पार हुन, परमेश्वर आऊन दा बन्सकु ईरतान, अदिक आव परमेश्वर दा
जो प्यार परमेश्वर नाम से ईटतान, अदरी नाव जान्स कोंडेव अदिक नामी आऊन विश्वास आद. परमेश्वर प्यार हुन, अदिक जो प्यार दा बन्सकु ईरतान आव परमेश्वर दा बन्सकु ईरतान, अदिक परमेश्वर आऊन दा बन्सकु ईरतान. इदुर देल अच प्यार नाम दा सिद्ध आग्याद कि नामी न्याय इन दिशी हिम्मत ईरूल; यतिकी ह्यांग मसीह आन हांग अच दुनिया दा नाव भी आयेव. प्यार दा अंज्क ईराल, उलटा सिद्ध प्यार अंज्क इक दुर माळ बुळतद; यतिकी अंज्क इन संबंध दण्ड देल ईरतद, अदिक जो अंज्क ईटतान आव प्यार दा सिद्ध आगीदील.
नाव इदुरसाटी प्यार माळतेव, कि पयले आव नाम से प्यार माळदुन. अगर यावारा अंदान, “ना परमेश्वर से प्यार ईटतीन,” अदिक तान मसीह वार्ट से दुश्मनी ईटुल रा आव ख्वाटा आन; यतिकी जो तान वार्ट से यारी आव नोळ्यान प्यार ईटालुन, रा आव परमेश्वर से भी यारी आव नोळीदील प्यार माळालुन. आऊन से नामी ईद आग्या सिक्याद, कि जो यावारा परमेश्वर से प्यार ईटतान आव तान मसीह वार्ट से भी प्यार ईटुल.
Source notes (1)
- Cross-reference यूहन्ना १:१८
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.