परमेश्वर उन वचन
१ यूहन्ना 5
दुनिया मा जय हासिल माळोद
यार्द ईद विश्वास आद कि यीशु अच मसीह हुन, आव परमेश्वर से पैदा आग्यान; अदिक जो यावारा पैदा माळावाळा से प्यार ईटतान, आव आऊन से भी प्यार ईटतान जो आऊन से पैदा आग्यान. याग नाव परमेश्वर से प्यार ईटतेव अदिक आऊन आग्यागोळ इक मान्सतेव, रा इदुर देल अच नाव जान्सतेव कि नाव परमेश्वर उन औलादगोळ से प्यार ईटतेव. 1यतिकी परमेश्वर से प्यार ईटोद ईद हुन कि नाव आऊन आग्या अक मान्सेव; अदिक आऊन आग्यागोळ कठिन हैलेच. यतिकी जो येनारा परमेश्वर देल पैदा आग्याद, अद दुनिया मा जय हासिल माळतद; अदिक अद विजय यदुर देल दुनिया मा जय हासिल आगतद अदा नाम विश्वास हुन. दुनिया मा जय हासिल माळावाळा याव हुन? सिर्फ आव यार्द ईद विश्वास आद कि यीशु, परमेश्वर उन पार हुन.
यीशु मसीह अन्द बारा दा गवाही
ईवा हुन आव जो नीर अदिक खुन अन द्वारा बंदीदुन, मतलब यीशु मसीह: आव सिर्फ नीर इन द्वारा ईला लेकीन नीर अदिक रक्ता येढ्ढु चिज इन द्वारा बंदीदुन ईद गवाही सच्चाई हुन. अदिक जो गवाही कोळतद, अद आत्मा हुन; यतिकी आत्मा सच्चाई आद. गवाही कोळावाळा मुर आव, आत्मा, अदिक नीर, अदिक रक्ता; अदिक मुरू ऊंदा मात मा सयमत आव. याग नाव मंळसागोळ्द गवाही मान्स कोमतेव, रा परमेश्वर उन गवाही रा अऊर से वाळुसकु आद; अदिक परमेश्वर उन गवाही ईद आद कि जो आव तान पार उन बारा दा कोटान. जो परमेश्वर उन पार मा विश्वास माळतान आव तान मन दा अच गवाही ईटतान. याव परमेश्वर मा विश्वास माळीदिल आव आऊक ख्वाटा ठहरूसदुन, यतिकी आव आ गवाही मा विश्वास माळीदिल जो परमेश्वर तान पार उन बारा दा कोटान. 2अदिक अद गवाही ईद हुन कि परमेश्वर नामी अनन्त जीवन कोटान, अदिक ईद जीवन आऊन पार उन दा आद. यार हात्ती पार आन, आऊन हात्ती जीवन आद, अदिक यार हात्ती परमेश्वर उन पार हैलेच, आऊन हात्ती जीवन भी हैलेच.
अनन्त जीवन
ना नीमी, जो परमेश्वर उन पार उन हेसुर मा विश्वास माळतीर, इदुरसाटी लिख्सतीन कि नीव अर्त कोमी कि अनन्त जीवन नीम्द आद. अदिक नामी आऊन मुंद जो हिम्मत सिकतद, अद ईद हुन; कि अगर नाव आऊन इच्छा अन्द अनुसार येनारा बेळतेव, रा आव नाम केळतान. याग नाव जो येनारा आऊन से बेळतेव आव नाम केळतान, रा ईद भी जान्सतेव कि जो येनारा नाव आऊन से बेळदेव, आव कोळतान.
अगर यावारा तान मसीह वार्ट उक हिंग पाप माळतेला नोळुल यदुर्द अंजाम मृत्यु आगाल, रा विनती माळकु बेळुल, अदिक परमेश्वर आऊक आंदुर साटी, यार हिंग पाप माळ्यार यदुर्द अंजाम मृत्यु आगाल, जीवन कोटान. पाप हिंग भी आगतद यदुर्द अंजाम मृत्यु आगतद; इदुर बारा दा ना विनती माळोर साटी हेळालीन. सप्पा प्रकार इन अन्याय रा पाप हुन, लेकीन हिंग पाप भी आद यदुर्द अंजाम मृत्यु आल्लच.
नाव जान्सतेव, कि जो यावारा परमेश्वर उन से पैदा आग्यान, आव पाप माळालुन; लेकीन जो परमेश्वर से पैदा आग्यान, आऊक आव ऊळ्सकु ईटतान, अदिक आ दुष्ट आऊक मुट सकाल.
नाव जान्सतेव कि नाव परमेश्वर से आयेव, अदिक सप्पा दुनिया आ दुष्ट उन वश दा बिदकु आद.
नाव ईद भी जान्सतेव कि परमेश्वर उन पार होट बंदान अदिक आव नामी समझ कोटान कि नाव आ सही परमेश्वर उक अरतेव; अदिक नाव अदुर दा जो सच्चाई आद, मतलब आऊन पार यीशु मसीह दा ईरतेव. खरा परमेश्वर अदिक अनन्त जीवन ईदा हुन.
हे चिकोरा, तान तान इक मूर्तीगोळ देल ऊळ्सकु ईटी.
Source notes (2)
- Cross-reference यूहन्ना १४:१५
- Cross-reference यूहन्ना ३:३६
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.