परमेश्वर उन वचन
१ यूहन्ना 3
परमेश्वर उन चिकोर
नोळी, आप्प नाम से ह्यांग प्यार माळकु कारदुन कि नाव परमेश्वर उन औलाद अंदकु आदेव; अदिक नाव आयेव भी. ईद कारण दुनिया नामी अराल, यतिकी आव आंदरी भी अरतीदिल. हे प्रिय संगीगोळा, ईग नाव परमेश्वर उन औलाद आयेव, अदिक ईगासताका ईद प्रगट आगीदील कि नाव अदिक येन आदेव! ईट जान्सतेव कि याग प्रगट आदीत रा नाव आऊन घाई आदेव, यतिकी आऊक हांग अच नोळेव ह्यांग आव आन. अदिक जो यावारा मसीह मा ईद आशा ईटतान, आव तान तान इक हांगा शुद्ध माळतान ह्यांग मसीह शुद्ध आन
जो यावारा पाप माळतान, आव व्यवस्था अन्द विरोध माळतान; अदिक पाप रा व्यवस्था अन्द विरोध हुन. 2नीव जान्सतीर कि आव इदुरसाटी प्रगट आदुन कि पापगोळी तेग्द बुळुल; अदिक आऊन स्वभाव दा पाप हैलेच. जो यावारा आऊन एकता दा बन्सकु ईरतान, आव पाप माळालुन: जो यावारा पाप माळतान, आव ना रा आऊक नोळ्यान अदिक ना आऊक जानस्यान.
हे चिकोरा, यारदारा बैकावा दा बरबाळेतीर. जो न्याय इन क्याल्सा माळतान, आव अच आऊन घाई आन. जो यावारा पाप माळतान आव शैतान दी टु आन, यतिकी शैतान पयले टु उच पाप माळ्त बंदान. परमेश्वर उन पार इदुरसाटी प्रगट आदुन कि शैतान उन क्याल्सागोळ्द नाश माळकु छुटकारा कोळुल.
जो यावारा परमेश्वर उन से पैदा आग्यान आव पाप माळालुन; यतिकी आऊन स्वभाव दा बन्सकु ईरतान, अदिक आव पाप माळ अच सकालुन यतिकी आव परमेश्वर देल पैदा आग्यान. इदुर देल अच परमेश्वर उन औलाद अदिक शैतान उन औलाद अरूकु आगतद; जो यावारा न्याय इन क्याल्सा माळालुन आव परमेश्वर देल पैदा आगीदील, अदिक ना आव जो तान मसीह वार्ट से प्यार ईटालुन.
आबुर दाबुर से प्यार ईटी
यतिकी जो समाचार नीव पयले टु केळीर, अद ईद आग्या हुन कि नाव आबुर दाबुर से प्यार ईट्टेव; अदिक कैन उन घाई बन्सबाळी जो आ दुष्टगोळ दा टु ईरोन, अदिक याव तान मसीह वार्ट उक कोंद बुट्टुन. अदिक आऊक याता कारण देल कोंद बुट्टुन? ई कारण कि ईऊन क्याल्सा बुरा ईरव, अदिक आऊन क्याल्सा न्याय इनव ईरव.
हे मसीह वार्ट अदिक आकतींगेरा, अगर दुनिया नीम से दुश्मनी माळतद रा अचम्भा माळबाळी. 4नाव जान्सतेव कि नाव मृत्यु टु पार आगकु जीवन दा प्रवेश माळेव; यतिकी नाव मसीह वार्टुर से प्यार ईटतेव. जो प्यार ईटालुन आव मृत्यु उन दशा दा ईरतान. जो यावारा तान मसीह वार्ट से दुश्मनी ईटतान, आव हत्यारा हुन; अदिक नीव जान्सतीर कि यावारा हत्यारा दा अनन्त जीवन ईराल्द. नाव प्यार ईदुर देल अच जान्सदेव कि आव नाम साटी तान जीव कोट बुट्टुन; अदिक नामी भी खुद मसीह वार्ट अदिक आकतींगेर साटी जीव कोळ पायजे. लेकीन जो यारदारा हात्ती दुनिया अन्द संपत्ती ईरूल अदिक आव तान मसीह वार्ट उक कंगाल नोळकु आऊन जरवत मा तरस तिनोद चाहासालुन, रा आऊन दा परमेश्वर उन प्यार ह्यांग बन्सकु ईर सकतद? हे चिकोरा, नाव वचन अदिक ल्यालग्या देल अच ईला, लेकीन क्याल्सा अदिक सच्चाई अन्द द्वारा भी प्यार ईट्टेव.
परमेश्वर उन हात्ती हिम्मत
इदुर देल अच नाव जान्सेव कि नाव सच्चाई नव हुयेव; अदिक याता मात दा नाम मन नामी दोष कोट्टीत, अदुर बारा दा नाव परमेश्वर उन मुंद आत्मविश्वास देल ईत्तेव; यतिकी परमेश्वर नाम मन देल हापाळ धोड्डेव आन, अदिक सप्पा येनारा जान्सतान. हे प्रिय संगीगोळा, अगर नाम मन नामी दोष कोळाल, रा नामी परमेश्वर उन मुंद हिम्मत ईरतद; नाव आऊन से जो येनारा बेळतेव, अद नामी आऊन हात्ती टु सिकतद, यतिकी नाव आऊन आग्यागोळ इक मान्सतेव अदिक जो आऊक वळ्लीद हततद अदा माळतेव. 5आऊन आग्या ईद आद कि नाव आऊन पार यीशु मसीह अन्द हेसुर मा विश्वास माळेव, अदिक ह्यांग आव नामी आग्या कोटान आऊंदा अनुसार आबुर दाबुर दा प्यार ईट्टेव. जो परमेश्वर उन आग्यागोळ इक मान्सतान, आव परमेश्वर दा अदिक परमेश्वर आंदुर दा बन्सकु ईरतान: अदिक इदुर देल अच, मतलब आ आत्मा देल जो परमेश्वर नामी कोटान, नाव जान्सतेव कि परमेश्वर नाम दा बन्सकु ईरतान.
Source notes (5)
- Cross-reference यूहन्ना १:१२
- Cross-reference यूहन्ना १:२९
- Cross-reference यूहन्ना १३:३४
- Cross-reference यूहन्ना ५:२४
- Cross-reference यूहन्ना १३:३४; १५:१२,१७
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.