Holiya Bible
गिनती 9
दुसरा घन फसह हाब्ब मान्सकु आगोद
इस्राएलिगोळ मिस्र द्याश टु होळदुर्द दुसरा वर्ष इन पयला तिंगुळ दा यहोवा सीनै अन आळी दा मूसा से अंदुन, “इस्राएली फसह अन हाब्ब इक अदुर्द ठहरूस्कु समय मा मानसुल. मतलब ईदा तिंगुळ इन चौदावा दिशी द्यावगा अन होती नीव लॉकुर अदरी सप्पा विधीगोळ अदिक नियमगोळ अनुसार मान्सेतीर.” आग मूसा इस्राएलीगोळी फसह मानसोर साटी अंद बुट्टुन. अदिक आंदुर पयला तिंगुळ इन चौदावा दिशी द्यावगा अन होती सीनै अन आळी दा फसह अक मान्सदुर; अदिक जो जो आग्यागोळ यहोवा मूसा अक कोटीदुन अदुर्दा अनुसार इस्राएलीगोळ माळदुर. लेकीन थ्वाळासा लॉकुर ऊंद मंळसा अन्द लाश इन द्वारा अशुद्ध आगोद कारण आ दिशी फसह अक मनुस सकीदील, आंदुर अदा दिशी मूसा अदिक हारून उन हात्ती होगकु, “मूसा से अनली कुरतुर, नाव लॉकुर ऊंद मंळसा अन लाश इन कारण अशुद्ध आयेव; लेकीन नाव येती ऊंजेरकु ईत्तेव, अदिक इस्राएलीगोळ सांगुळ यहोवा अन्द चढ़ावा ठहरूस्कु समय मा येती येर्सतीदील?” मूसा आंदुर से अंदुन, ऊंजेरी, ना केळ कोमतीन कि यहोवा नीम बारा दा येन आग्या कोळतान.
यहोवा मूसा से अंदुन, “इस्राएलीगोळ से अन कि चाहे नीव लॉकुर चाहे नीम वंश दा टु यावारा भी यातोदारा लाश इन कारण अशुद्ध आगुल, या दुर इन यात्रा मा ईरूल तरी भी आव यहोवा अन्द साटी फसह अक मानसुल. आंदुर अदरी दुसरा तिंगुळ इन चौदावा दिशी द्यावगा अन होती मानसुल; अदिक फसह अन्द बलिपशु उन मास इक अखमीरी रोट्टी अदिक केय काण्णोद कसींद सांगुळ तिनुल. अदिक अदुर दा टु येनारा भी व्हातुर ताका मिक्सकु ईट बाळुल, अदिक न अदुर्द यातोदारा येलु मुरूल; आंदुर आ हाब्बा अक फसह अन्द पुरा विधीगोळ्द अनुसार मानसुल. लेकीन जो मंळसा शुद्ध ईरूल अदिक यात्रा मा ईरबाळुल, लेकीन फसह अन्द हाब्बा अक ईला मानसुल आव मंळसा तान लॉकुर दा टु ब्यार्र माळकु आगुल, आ मंळसा अक यहोवा अन्द चढ़ावा ठहरूस्द समय मा ईला तंदुर कारण तान पाप इन बोझ नेगोद बिद्दीत. अगर यावारा परदेशी नीम सांगुळ ईतकु चाहसुल कि यहोवा अन्द साटी फसह मानसुल रा आव अदा विधी अदिक नियम इन अनुसार अदरी मानसुल; देशी अदिक परदेशी येढ्ढु मुंदुर साटी नीम्द ऊंद अच विधी ईरूल.”
निवास इन जागा मा अग्निमय बादल
(निर्गमन ४०:३४-३८)
याता दिशी निवास यदरी गवाही इन तम्बू भी अनकु आगतद निदरूसकु आत, आ दिशी बादल अदुर मा छाऊसेत; अदिक द्यावगा आ निवास मा बेक्की घाई कांळ्स कुर्त अदिक व्हातुर ताका कांळस्तेला ईत्त. हमेशा हिंग अच आगतेला ईरतोगोद; हागुल बादल छाऊस्कु ईरतोगोद, अदिक ईळ्ल्की बेक्की कांळ्सोतोगोद. अदिक याग याग अद बादल तम्बु मा टु येळतोगोद आग इस्राएलीगोळ मुंद वाळुसतोगोर; अदिक या जागा मा बादल ठहरूसकु ईरतोगोद अल्या इस्राएली तान ड्यारा निद्रुसतोगोर. यहोवा अन्द आग्या देल इस्राएली मुंद वाळुसतोगोर, अदिक यहोवा अन्द आग्या देला आंदुर ड्यारा भी निद्रुसतोगोर; अदिक यास दिन ताका आ बादल निवास मा ठहरूसकु ईरतोगोद आस दिन ताका आंदुर ड्यारा हाक्कु ईरतोगोर. याग बादल हापाळ दिन ताका निवास मा छाऊस्कु ईरतोगोद आग भी इस्राएली यहोवा अन आग्या मान्सतोगोर, अदिक मुंद ईला वाळुसतोगोर. यागल्यारा-यागल्यारा अद बादल थ्वाळासा अच दिन ताका निवास मा ईरतोगोद, अदिक आग भी आंदुर यहोवा अन्द आग्या देल ड्यारा हाक्कु ईरतोगोर; अदिक यहोवा अन्द आग्या देला आंदुर मुंद वाळुसतोगोर. अदिक यागल्यारा-यागल्यारा बादल सिर्फ द्यावगा टु व्हातुर ताका ईरतोगोद; अदिक याग अद व्हातर्या का येळतोगोद आग आंदुर मुंद वाळुसतोगोर, अदिक अगर अद ईळ्ल्क हागुल बराबर ईरतोगोद रा याग बादल येळतोगोद आग अच आंदुर मुंद वाळुसतोगोर. अद बादल चाहे येढ्ढ दिन, चाहे ऊंद तिंगुळ, चाहे साल तीम, यागासताका निवास मा ठहरूसकु ईरतोगोद आगासताका इस्राएली तान ड्यारागोळ दा ईरतोगोर अदिक मुंद ईला वाळुसतोगोर; लेकीन याग अद येळतोगोद आग आंदुर मुंद वाळुसतोगोर. यहोवा अन्द आग्या देल आंदुर तान ड्यारा निदरूसोर, अदिक यहोवा अन आग्या देला आंदुर मुंद वाळुसतोगोर; जो आग्या यहोवा मूसा अन्द द्वारा कोळतोगोन अदरी आंदुर मान्सतोगोर.
Holiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.