गिनती 8

दिंग्यागोळी होताकोद

1बाक यहोवा मूसा से अंदुन, 2“हारून उक समझुस्कु ईद अन कि याग याग नी दिंग्यागोळी होताक्या आग आग येळ दिंग्यागोळ्द ऊजुळ दीवट इन मुंद आगुल.” 3ईदुरसाटी हारून हांगा माळदुन, मतलब जो आग्या यहोवा मूसा अक कोटीदुन अदुर्दा अनुसार आव दिंग्यागोळ इक दीवट इन मुंद ईटदुन कि अव ऊजुळ कोळुल. 4अदिक दीवट इन बनावट हिंग ईरोद, मतलब ईद पायवा टु हुडुकु म्याकुच ताका व्हान्ना अन्द माळकु आगीत; जो नमुना यहोवा मूसा अक तोर्सीदुन अदुर्दा अनुसार आव दीवट इक बनुसदुन.

लेवीगोळ्द शुद्धीकरण अदिक अर्पण

5बाक यहोवा मूसा से अंदुन, 6इस्राएलीगोळ न्याड्या दा टु लेवीगोळी अलग हुडुकु शुद्ध माळ. 7आंदरी शुद्ध माळोर साटी नी हिंग माळ कि शुद्ध माळावाळा नीर आंदुर मा सिप्स बुळ, बाक आंदुर सप्पा मुंदुर मुंडन माळुल, अदिक कपळा ओगुल, अदिक आंदुर तान तान इक शुद्ध माळुल. 8आग आंदुर याण्णा देल हचकु वळ्लीद हीट्ट अन्नभेट सांगुळ ऊंद गोरा हुडुल, अदिक नी पापबलि इन साटी ऊंद दुसरा गोरा हुडेत. 9अदिक नी लेवीगोळ इक भेंट माळोद तम्बु उन मुंद पहुचुसेत, अदिक इस्राएलीगोळ्द पुरा मंडली जमा माळेत. 10आग नी लेवीगोळ इक यहोवा अन्द मुंद हात्ती तरेत, अदिक इस्राएली तान तान कय आंदुर मा ईटुल, 11आग हारून लेवी वंश इन लॉकुरी यहोवा अन्द मुंद तंदान इस्राएलीगोळ परमेश्वर उन साटी भेंट इन रूप दा ईत्तार. ई ढंग देल लेवी वंश इन लॉकुर यहोवा अन्द विशेष क्याल्सा माळोर साटी तयार ईत्तार. 12आग लेवीगोळ तान तान कय आ गोरागोळ्द ताल्लगोळ मा ईटुल; अदिक नी लेवीगोळ साटी प्रायश्चित माळोर साटी ऊंद गोरा पापबलि अदिक दुसरा होमबली माळकु यहोवा अन्द साटी येर्सेत. 13लेवी वंश इन लॉकुर से अनी कि आंदुर हारून अदिक आऊन पारगोळ मुंद नीदरूल. आग यहोवा अन्द मुंद लेवी वंश इन लॉकुरी आलगाळसोद भेंट इन रूप दा प्रस्तुत माळी.

14ईद लेवी वंश इन लॉकुरी पवित्र माळीत. ईद तोर्सीत कि आंदुर परमेश्वर उन साटी विशेष रीति देल इस्तेमाल आदार. आंदुर इस्राएल इन दुसरा लॉकुर से ब्यार्र आदार अदिक लेवी वंश इन लॉकुर नानोर ईत्तार. 15ईदुरसाटी लेवी वंश इन लॉकुरी शुद्ध माळी अदिक आंदरी यहोवा अन्द मुंद आलगाळसोद भेंट इन रूप दा प्रस्तुत माळी. याग ईद पुरा आगेगुल आग आंदुर बर सकतार अदिक भेंट माळोद तम्बू दा तान क्याल्सा माळ सकतार. 16इंदुर लेवी वंशीगोळ इस्राएल इन अव लॉकुर उर जो नानी कोटकु आग्यार. ना आंदरी तान लॉकुर रूप दा स्वीकार माळदीन. बितुस्द समय दा हर ऊंद इस्राएल इन परिवार दा धोळ पार नानी कोटकु आगोद लेकीन ना लेवी वंशी इन लॉकुरी इस्राएल इन दुसरा परिवार इन धोळ पार उन जागा मा स्वीकार माळदीन. 17इस्राएल इन हर ऊंद गंळ्स जो हर ऊंद परिवार दा धोळ पार हुन, नानव हुन. अगर ईव गंळ्स या जनावर हुन तरी भी नानव हुन. ना मिस्र दा सप्पा धोड्डेव चिकोरी अदिक जनावरगोळी कोंद बुटीदीन. इदुरसाटी ना धोळ पारगोळी ब्यार्र माळदीन अदुर देल आंदुर नानोर आग सकुल. 18अदिक ना इस्राएलिगोळ सप्पा धोळ पारगोळ बदला दा लेवीगोळी ताकोम कोंडीन. 19लेवीगोळ इक हुडुकु ना हारून अदिक आऊन पारगोळी इस्राएलिगोळ दा टु दान माळकु कोट बुट्टीन, कि आंदुर भेंट माळोद तम्बू दा इस्राएलिगोळ सप्पा लॉकुर साटी स्यावा माळ्यार अदिक आंदुर आ बलिदानगोळी माळदुर दा मदत माळ्यार जो इस्राएल इन लॉकुर पापगोळी होचकोमकु ईटदुर दा मदत माळीत. आग यातोदारा धोळ रोग या तकलीफ इस्राएल इन लॉकुरी आगतीदील याग आंदुर पवित्र जागा अन्द हाती बंदार.

20ईदुरसाटी मूसा, हारून अदिक इस्राएल इन सप्पा लॉकुर यहोवा अन्द आदेश मान्सदुर. आंदुर लेवीगोळ प्रति हांग अच माळदुर ह्यांग आंदुर प्रति माळोद यहोवा मूसा अक आदेश कोटीदुन. 21लेवीगोळ रा तान तान इक पाप देल शुद्ध माळदुर, अदिक तान फळक्यागोळी वगु कोंडुर; अदिक हारून आंदरी यहोवा अन्द मुंद आलगाळसोद भेंट इन निमित्त अर्पण माळदुन अदिक आंदरी शुद्ध माळली आंदुर साटी प्रायश्चित भी माळदुन. 22अदिक अदुर बाद्दा लेवी हारून अदिक आऊन पारगोळ मुंद भेंट माळोद तम्बु दा तान तान स्यावा कार्य माळली होदुर; अदिक जो आग्या यहोवा मूसा अक लेवीगोळ बारा दा कोटीदुन अदुर्दा अनुसार आंदुर से व्यवहार माळली कुरतुर.

23बाक यहोवा मूसा से अंदुन, 24“जो लेवीगोळी माळोद आद अद ईद हुन, कि पच्चीस साल इन ऊमर टु हुडुकु अदुर से यक्कुल ऊमर वाळेर आंदुर भेंट माळोद तम्बू दा क्याल्सा माळोर साटी उपस्थित आगुल; 25अदिक याग पचास साल इनोर ईरूल रा बाक आ स्यावा अन्द साटी बरबाळुल अदिक क्याल्सा माळबाळुल; 26लेकीन आंदुर तान भाईबंध सांगुळ भेंट माळोद तम्बू उन हात्ती देखभाल इन क्याल्सा माळुल, अदिक खुद यातोदु प्रकार इन क्याल्सा माळबाळुल. लेवीगोळी जो जो क्याल्सा सौप्सकु आगुल आंदुर बारा दा आंदुर से नी हिंग अच माळेत.”