गिनती 10

बेळ्ली इन येढ्ढ तुरहीगोळ

1बाक यहोवा मूसा से अंदुन, 2“बेळ्ली नव येढ्ढ तुरहीगोळ गळुस्कु माळकु आगुल; नी अवरी मंडली इक कारूली, अदिक छावनीगोळ दा टु प्रस्थान माळोर साटी क्याल्सा दा तरेत. 3अदिक याग अव येढ्ढु ऊरकु आगुल, आग पुरा मंडली भेंट माळोद तम्बु उन द्वार मा नीन हात्ती जमा आगेगुल. 4लेकीन अगर ऊंद अच तुरही ऊरकु आगुल, रा प्रधान लॉकुर जो इस्राएल इन हजारगोळोर मुख्य गंळ्सुर आर नीन हात्ती जमा आगेगुल. 5याग नीव लॉकुर दम हुडुकु ऊयेतीर, रा पूर्व दिशा अन छावनीगोळ्द प्रस्थान आगुल. 6अदिक याग नीव दुसरा घन ऊयेतीर, आग दक्षिण दिशा नव छावनीगोळ्द प्रस्थान आगुल. आंदुर प्रस्थान माळोर साटी आंदुर ऊयुल. 7अदिक याग लॉकुरी जमा माळकु सभा माळोद आद आग अच तुरही ऊयेत, लेकीन प्रस्थान माळोद ईशारा कोळबाळेत. 8अदिक हारून उन पारगोळ जो याजक आर आंदुर आ तुरहीगोळी ऊयुतोगुल. ईद मात नीम पीढ़ी-पीढ़ी इन साटी हमेशा अन विधी ईरूल. 9अदिक याग नीव तान द्याश दा यातोवारा सतुसावाळा दुश्मन से लळाई माळली होट्टीर, आग चेतावनी इन तुरहीगोळी ऊयेतीर, आग नीम परमेश्वर यहोवा अक नीम याद बंदीत, अदिक नीव तान दुश्मनगोळ दा वाचुसकु आदीर. 10तान खुशी इन दिन दा, अदिक तान ठहरूस्द हाब्बगोळ दा, अदिक तिंगुळ इन सुरवात दा, तान होमबलीगोळ अदिक मेलबलिगोळ सांगुळ आ तुरहीगोळ इक ऊयेतीर; ईदुर देल नीम परमेश्वर उक नीम याद बंदीत; ना यहोवा नीमव परमेश्वर हुईन.”

इस्राएलिगोळ्द सीनै आळी मा टु प्रस्थान

11दुसरा वर्ष इन दुसरा तिंगुळ इन ईप्पतवा दिशी बादल वाचा अन तम्बु मा टु येदोत, 12आग इस्राएली लॉकुर सीनै अन आळी दा टु प्रस्थान माळकु होट्टुर; अदिक बादल पारान हेसुर इन आळी दा ठहरूसेत. 13आंदुर्द प्रस्थान यहोवा अन्द आ आग्या अन्द अनुसार जो आव मूसा अक कोटीदुन शुरू आत. 14अदिक सबसे पयला यहूदीगोळ्द छावनी इन झंडागोळ्द प्रस्थान आत, अदिक आंदुर दल कटकु नळदुर, अदिक आंदुर सेनापति अम्मीनादाब उन पार नहशोन ईरोन. 15अदिक इस्साकारिगोळ्द कुल अन सेनापति सूआर उन पार नतनेल ईरोन. 16अदिक जबूलून कुल अन सेनापति हेलोन उन पार एलीआब ईरोन. 17आग निवास इन ड्यारा अक ईळ्सकु आत, अदिक गेर्शोनिगोळ अदिक मरारीगोळ जो निवास इक नेगुतोगोर प्रस्थान माळदुर. 18बाक रूबेन उन छावनी इन झंडा अन्द कूच आत, अदिक आंदुर भी दल माळकु नळदुर; अदिक आंदुर सेनापति शदेऊर उन पार एलीसूर ईरोन. 19अदिक शिमोनिगोळ्द कुल अन सेनापति सूरीशद्दे अन पार शलूमीएल ईरोन. 20अदिक गादीगोळ्द कुल अन सेनापति दूएल उन पार एल्यासाप ईरोन. 21आग कहातिगोळ कुल पवित्र वस्तुगोळी नेगुकु प्रस्थान माळदुर, अदिक आंदुर पोहचुसोर ताका गेर्शोनिगोळ अदिक मरारीगोळ निवास इक निदरूसदुर. 22बाक एप्रैमिगोळ्द छावनी इन झंडा अन्द कूच आत, अदिक आंदुर भी दल माळकु नळदुर; अदिक आंदुर्द सेनापति अम्मीहूद उन पार एलीशामा ईरोन. 23अदिक मनश्शेइगोळ्द कुल अन सेनापति पदासूर उन पार गम्लीएल ईरोन. 24अदिक बिन्यामीनिगोळ्द कुल अन सेनापति गिदोनी इन पार अबीदान ईरोन. 25बाक दानीगोळ्द छावनी जो सब छावनीगोळ्द हिंद ईरोद, अदुर्द झंडागोळ्द प्रस्थान आत, अदिक आंदुर भी दल माळकु नळदुर; अदिक आंदुरव सेनापति अम्मीशद्दे अन्द पार अहीएजेर ईरोन. 26अदिक आशेरीगोळ्द कुल अन सेनापति ओक्रान उन पार पगीएल ईरोन. 27अदिक नप्तालिगोळ्द कुल अन सेनापति एनान उन पार अहीरा ईरोन. 28इस्राएली ईदा प्रकार देल तान तान दलगोळ्द अनुसार प्रस्थान माळोर, अदिक मुंद वाळुस्तेला ईरतोगोर.

29मूसा तान मॉव रूएल मिद्दानी इन पार होबाब से अंदुन, “नाव लॉकुर आ जागा अन्द यात्रा माळतेव यदुर बारा दा यहोवा अंदान कि ना अदरी नीमी कोळाईन; ईदुरसाटी नी भी नाम सांगुळ नळु, अदिक नाव नीन भलाई माळेव; यतिकी यहोवा इस्राएल इन बारा दा भला अच अंदान.” 30होबाब आऊक उत्तर कोट्टुन, “ना होगतिदील; ना तान द्याश अदिक कुटुम्बिगोळ दा वापस होगाईन.” 31बाक मूसा अंदुन, “नामी बिळबाळ, यतिकी नामी आळी दा येल येल ड्यारा निदरूस पायजे, ईद नीनी का खबुर आद, नी नाम साटी कण्णगोळ्द क्याल्सा कोळेत. 32अदिक अगर नी नाम सांगुळ नळद्या, रा निश्चय जो भलाई यहोवा नाम से माळ्यान अदुर्दा अनुसार नाव भी नीन से हांग अच माळेव.”

लॉकुर्द प्रस्थान

33बाक इस्राएलिगोळ यहोवा अन्द पहाळी टु प्रस्थान माळकु मुर दिन इन यात्रा माळदुर; अदिक आ मुरू दिन इन हादी दा यहोवा अन्द वाचा अन सन्दुक आंदुर साटी आराम इन जागा ढुंढ्सतेला आंदुर मुंद मुंद नळुतेला ईत्त. 34अदिक याग आंदुर छावनी इन जागा टु प्रस्थान माळतोगोर आग हागुल तीम यहोवा अन्द बादल आंदुर म्याकुच छाऊसकु ईरतोगोद. 35अदिक याग याग सन्दुक इन प्रस्थान आगतोगोद आग आग मूसा ईद अनतेला ईरतोगोन, “हे यहोवा, येळ, अदिक नीन दुश्मनगोळ तितर-बितर आगेगुल, अदिक नीन दुश्मनगोळ नीन मुंद टु ओळेगुल.” 36अदिक याग संदुक ठहरूसतोगोद आग मूसा अनतोगोन, “हे यहोवा, हजारो इस्राएलिगोळ दा वापस होटबर.”