गिनती 11

इस्राएलिगोळ्द कुळकुळुसोद, अदिक इदुर्द दण्ड भोगसोद

1बाक आ लॉकुर तान कष्ट इन कारण बळबुळस्ली अदिक यहोवा अन केळतेला बुरा अनली कुरतुर; अत: यहोवा केळदुन, अदिक आऊन गुस्सा भळकुसतेला येळ्त, अदिक यहोवा अन्द बेक्‍की आंदुर्द बीच दा होतली कुर्त, अदिक छावनी इन ऊंद किनारा टु भस्म माळली कुर्त. 2आग लॉकुर मूसा अन्द हात्ती बनकु चिल्लासदुर; अदिक मूसा यहोवा से प्रार्थना माळदुन, आग अद बेक्‍की नुनुत, 3अदिक आ जागा अन्द हेसुर तबेरा बित्त, यतिकी यहोवा अन्द बेक्‍की आंदुर्दा होतली कुरतीत.

भोजन इन बारा दा सिकायत

4बाक जो मिला-जुला भीळ आंदुर सांगुळ ईरोद अद इच्छा माळली कुर्त; अदिक इस्राएली भी बाक वर्लली अदिक अनली कुरतुर, “नामी चिच्ची तिनली याव कोट्टान. 5नामी अव मेनगोळ याद आव जो नाव मिस्र दा सेंतमेंत तिनतेला ईरतोगेव, अदिक अव काकळीगोळ, अदिक तरबुजगोळ, अदिक कंदमूल, अदिक ऊलीगाडा, अदिक लसुन भी; 6लेकीन ईग नाम हसु सोतोग्याद, ईल ई मन्ना अक बिटकु अदिक येनु भी कांळ्साल.” 7मन्ना रा शंभार इन बींजा अन घाई ईरोद, अदिक अदुर्द रंग रूप मोती इन घाई ईरोद. 8लॉकुर ईल अल होगकु अदरी सकलुसोर, अदिक चक्की दा पिसुसोर या ओखल दा कुटतोगोर, बाक तसला दा कासतोगोर, अदिक अऊर रोट्टी माळतोगोर; अदिक अदुर्द स्वाद याण्णा दा माळकु सुवारी इन घाई ईरोद. 9अदिक ईळ्ल्की याग छावनी दा ओद बिळतोगोद आग अदुर सांगुळ मन्ना भी बिळतोगोद. 10अदिक मूसा हर ऊंद घराना अन मंळसागोळी तान तान ड्यारा अन्द द्वार मा वर्लतेला केळदुन; अदिक यहोवा अन्द कोप यक्कुल भळकुस्त, अदिक मूसा अक भी बुरा समझ दा बत्त. 11आग मूसा यहोवा से अंदुन, “नी तान दास से ईद बुरा व्यवहार येती माळत्या? अदिक येन कारण आद कि नी नान से खुश हैलेच, कि नी ई सप्पा लॉकुर्द ओझा नान मा हाक्या? 12येन ई सप्पा लॉकुर नांदा मोगुल दा बिदकु ईरोर? येन नाना आंदरी पैदा माळीन, जो नी नान से अनत्या, कि ह्यांग आप्प हाल कुडुतेला चिग्द उक तान क्वारा दा नेगुकु ओयाळतान, हांगा ना ई लॉकुरी तान मोगुल दा नेगुकु आ द्याश दा ओयाईन, यदरी कोळोद किर्या नी आंदुर्द आप्प दादागोळ से तिंद्या? 13नानी ईट मॉदरा येल टु सिक्‍कीत कि ई सप्पा लॉकुरी कोळाईन? ईंदुर ईद अन अनकु नान हात्ती वर्लेत्यार, कि नी नामी मॉदरा तिनली कोळ. 14ना आबना ई सप्पा लॉकुर्द ओझा संभाल्स सकालीन, यतिकी ईद नान शक्ती इन व्हार्या आद. 15अदिक जो नीनी नान सांगुळ ईदा व्यवहार माळोद आद, रा नान मा नीन ईट कृपा आगुल, कि नी नान जीव एकदम ताकोम कोम, अदुर देल ना तान दुर्दशा नोळ सकतीदिल.”

मूसा अन द्वारा सत्तर लॉकुर्द चुनाव

16यहोवा मूसा से अंदुन, “इस्राएली पुरनियागोळ दा टु सत्तर हिंग गंळ्सुर नान हात्ती जमा माळ, यारी नी अरूत्या कि आंदुर प्रजा अन्द पुरनिए अदिक आंदुर सरदार उर; अदिक भेंट माळोद तम्बु उन हात्ती तर कि आंदुर नीन सांगुळ ईल नीदरूल. 17आग ना ईळुकु नीन से अल मातगोळ हेळाईन, अदिक जो आत्मा नीन दा आद अदुर्दा टु थ्वाळासा हुडुकु आंदुर्दा समुसाईन, अदिक आंदुर ई लॉकुर ओझा नीन सांगुळ नेगुकु ईटाता, अदिक नीनी अदरी आबना नेगोद बिळतीदील. 18अदिक लॉकुर से अन, नाळ इन साटी खुद इक पवित्र माळी, आग नीमी मॉदरा तिनली सिक्‍कीत, यतिकी नीव यहोवा अन्द केळतेला ईद अन अनकु वर्लीर, कि नामी मॉदरा तिनली याव कोट्टान? नाव मिस्र दा का भला ईरेव. ईदुरसाटी यहोवा नीमी मॉदरा तिनली इक कोट्टान, अदिक नीव तिनेतीर. 19बाक नीव ऊंद दिन, या येढ्ढ दिन, या अईद, या हत्त, या ईप्पत दिन अच ईला, 20लेकीन तिंगुळ तीम अदरी तिनतेला ईत्तीर, यागासताका अद नीम मुग्ग दा टु होट कोमाल अदिक नीमी अदुर से घृणा आगेगाल, यतिकी नीव लॉकुर यहोवा अक जो नीम न्याड्या दा आन तुच्छ जानसीर, अदिक आऊन मुंद ईद अनकु वर्लीर कि नाव मिस्र टु यती होटकु बंदेव?”

21बाक मूसा अंदुन, “या लॉकुर न्याड्या ना आईन आंदुर दा टु आर लाख रा पैदल नळावाळेर अच आर; अदिक नी अंद्या कि ना आंदरी ईट मॉदरा कोळाईन कि आंदुर तिंगुळ तीम अदरी तिनतेला ईत्तार. 22येन अव सप्पा म्यांडा-मर्रगोळ, गोसी-वस्ता आंदुर साटी कोंदकु आदव कि आंदरी चिच्ची सिक्‍कुल? या येन समुद्र अन्द सप्पा मेनगोळ आंदुर साटी जमा माळकु आगुल कि आंदरी चिच्ची सिक्‍कुल?”

23यहोवा मूसा से अंदुन, “येन यहोवा अन्द कय स्यांळ्द आगेग्याद? ईग नी नोळ्या कि नान वचन जो ना नीन से अंदीदिन अद पुरा आगतद का ईला.” 24आग मूसा व्हार्या होगकु प्रजा अन्द लॉकुर इक यहोवा अन्द मातगोळ अनतेला केळसदुन; अदिक आंदुर पुरनियगोळ दा टु सत्तर गंळ्स जमा माळकु तम्बु उन नाकु दी नीदरूसदुन. 25आग यहोवा बादल दा आगकु ईळदुन अदिक आव मूसा से मातगोळ माळदुन, अदिक जो आत्मा आऊन दा ईरोद अदुर दा टु हुळकु आ सत्तर पुरनियगोळ दा समुस बुट्टुन; अदिक याग अद आत्मा आंदुर दा बत्त आग आंदुर नबूवत माळली कुरतुर. लेकीन बाक मात यागलु माळीदिल. 26लेकीन येढ्ढ मंळसागोळ छावनी दा ईतोगीदुर, आदुर दा टु ऊंद मंळसा अन्द हेसुर एलदाद अदिक दुसरा मंळसा अन्द हेसुर मेदाद ईरोद, आंदुर दा भी आत्मा बत्त; इंदुर भी आंदुर दा टु उच ईरोर इंदुर हेसुर लिख्‍सकु आगीत, लेकीन तम्बू उन हात्ती होगीदिल, अदिक आंदुर छावनी दा नबूवत माळली कुरतुर. 27आग यावारा हारोदव पार ओळकु मूसा अक हेळदुन, कि एलदाद अदिक मेदाद छावनी दा नबूवत माळेत्यार. 28आग नून उन पार यहोशू, जो मूसा अन्द सेवक अदिक आऊन निवळुसदुर दा टु ईरोद, आव मूसा से अंदुन, “हे नान स्वामी मूसा, आंदरी रोक्स बुळ.” 29मूसा आऊन से अंदुन, “येन नी नान कारण आंदुर से होतेत्या? भला आगाईत कि यहोवा पुरा प्रजा अन लॉकुर नबी आगायदुर, अदिक यहोवा तान आत्मा आ सप्पा मुंदुर्दा तुम बुळायदुन!” 30आग बाक मूसा इस्राएल इन पुरनियगोळ सांगुळ छावनी दा होटोदुन.

यहोवा अन्द दी टु लावा पक्षीगोळ

31आग यहोवा अन दी टु ऊंद धोळ तुफान बत्त, अदिक अद समुद्र टु लावागोळ ऊळुसकु छावनी मा अदिक अदुर नाकु दी ईट तनकोळ्त, कि अव ईल अल ऊंद दिन इन हादी ताका जागा मा येढ्ढ कय इन लगभग म्याकुच ताका छासेत. 32अदिक लॉकुर येदकु आ हागुल तिमुर अदिक ईळ्लक तिम लावागोळी जमा माळतेला ईत्तुर; जो कम से कम जमा माळदुर अव हत्त होमेर1 जमा माळदुर; अदिक आंदुर अवरी छावनी इन नाकु दी फैलुस बुट्टुर. 33मॉदरा आंदुर्द बाय दा का ईरोद, अदिक आंदुर अदरी तिनली का ईरोर कि यहोवा अन्द कोप आंदुर मा भळकुस्त, अदिक आव आंदरी हापाळ धोळ महामारी हाकदुन. 34अदिक आ जागा अन्द हेसुर किब्रोथत्तावा बित्त, यतिकी जो लॉकुर तिनोद लालसा माळीदुर आंदरी अल मुण्ण कोटकु आत. 35बाक इस्राएलिगोळ किब्रोथत्तावा टु प्रस्थान माळकु हसेरोत दा पोहचुसदुर, अदिक अल्या ईत्तुर.