गिनती 12

मरियम इक दण्ड कोळोद

1मूसा ऊंद कूशी आर्त इन सांगुळ मदा माळ कोंडीदुन. इदुरसाटी मरियम अदिक हारून आऊन आ मदावळ्त कूशी आर्त इन कारण आऊन निन्दा माळली कुरतुर; 2आंदुर अंदुर, “येन यहोवा सिर्फ मूसा अन सांगुळ मातगोळ माळदुन? येन आव नाम से भी मातगोळ माळीदिल?” आंदुर ई मातगोळ यहोवा केळदुन. 3मूसा पृथ्वी माकळोर ईरावाळेर सप्पा मंळसागोळ से हापाळ यक्कुल नम्र स्वभाव ईनव ईरोन. 4ईदुरसाटी यहोवा एकाएक मूसा अदिक हारून अदिक मरियम से अंदुन, “नीव मुरू मुंदुर भेंट माळोद तम्बू उन हात्ती होटकु बरी.” आग आंदुर मुरू मुंदुर होटकु बंदुर. 5आग यहोवा बादल इन खंभा दा ईळुकु तम्बू उन द्वार मा नीदुरकु हारून अदिक मरियम इक कारदुन; आंदुर येढ्ढु मुंदुर आऊन हात्ती होटकु बंदुर. 6आग यहोवा अंदुन, “नान मातगोळ केळी: अदिक नीम दा यावारा नबी आन, रा आऊन मा ना यहोवा दर्शन इन द्वारा तान तान इक प्रगट माळाईन, या कान्सा दा आऊन से मात हेळाईन. 7लेकीन नान दास मूसा हिंग हैलेच; आव रा नान सप्पा घराना दा विश्वासयोग्य आन. 8आऊन से ना गुप्त रीति देल ईला, लेकीन आमने-सामने अदिक प्रत्यक्ष आगकु मातगोळ माळतीन, अदिक आव यहोवा अन्द स्वरूप निहार्सतेला ईरतान. इदुरसाटी नीव नान दास मूसा अन निन्दा माळतेला येती अंजीदिल?” 9आग यहोवा अन्द कोप आंदुर मा भळकुस्त, अदिक आव होटोदुन; 10आग अद बादल तम्बू उन म्याकुच टु येदोत, अदिक मरियम कोढ़ रोग देल बरफ इन घाई बिळेर आगेदुर. अदिक हारून मरियम दी नोळदुन कि आक कोढ़ इन रोगी आगेदुर. 11आग हारून मूसा से अनली कुरतुन, “हे नान प्रभु, ना विनती माळतीन कि नाव येढ्ढु मुंदुर जो मुर्खता पुर्ण पाप इन क्याल्सा माळदेव, ईद पाप नाम मा हत गोळबाळ. 12अदिक मरियम इक आ सोत्तुर घाई ईर गोळबाळ, ह्यांग कि यार्द मय तान मोय इन व्हाट्या टु होळतेला अच आर्धा गलुस्कु ईरूल.” 13अत: मूसा ईद अनकु यहोवा अन्द दोहाई कोट्टुन, “हे ईश्वर कृपा माळ, अदिक आकीक चंगा माळ.” 14यहोवा मूसा से अंदुन, अगर आकिन आप्प आकिन बाय मा ऊगळायदुन अच, रा येन येळ दिन ताका आक लज्जित ईला ईरायदुर? ईदुरसाटी आक येळ दिन ताका छावनी टु व्हार्या बंद ईरूल, अदुर बाद्दा आक बुळ्क बरूल. 15अत: मरियम येळ दिन ताका छावनी टु व्हार्या बंद ईत्तुर, अदिक यागासताका मरियम बंदीदिल आगासताका लॉकुर प्रस्थान माळीदिल. 16अदुर बाद्दा आंदुर हसेरोत टु प्रस्थान माळकु पारान हेसुर इन आळी दा तान ड्यारा नीदरूसदुर.