गिनती 13

भेदीगोळी कनान द्याश कळोद

(व्यवस्थाविवरण 1:19-33)

1बाक यहोवा मूसा से अंदुन, 2“कनान द्याश यारी ना इस्राएलगोळ इक कोळतीन अदुर्द भेद ताकोमोर साटी गंळ्सगोळ इक कळु; आंदुर तान पित्रगोळ प्रति कुल इन ऊंद-ऊंद प्रधान गंळ्स आगुल.” 3यहोवा से ईद आग्या हासिल माळकु मूसा ईत्ता गंळ्सुरी पारान आळी दा टु कळु बुट्टुन, जो सप्पा च्या सप्पा इस्राएलीगोळोर प्रधान ईरोर. 4आंदुर हेसुर ईव हुव: रूबेन उन कुल दा टु जक्कूर उन पार शम्मू; 5शिमोन उन कुल दा टु होरी इन पार शापात; 6यहूदा अन्द कुल दा टु यपुन्ने अन्द पार कालेब; 7इस्साकार उन कुल दा टु योसेप उन पार यिगाल; 8एप्रैम उन कुल दा टु नून उन पार होशे; 9बिन्यामीन उन कुल दा टु रापू उन पार पलती; 10जबूलून उन कुल दा टु सोदी इन पार गद्दीएल; 11यूसुफ वंशगोळ दा, मनश्शे अन्द कुल दा टु सूसी इन पार गद्दी; 12दान उन कुल दा टु गमल्ली इन पार अम्मीएल; 13आशेर इन कुल दा टु मीकाईल उन पार सतूर; 14नप्ताली इन कुल दा टु बोप्सी इन पार नहूबी; 15गाद इन कुल दा टु माकी इन पार गूएल; 16याता गंळ्सुरी मूसा द्याश इन भेद ताकोमोर साटी कळीदुन आंदुर हेसुर ईवा हुव. अदिक नून उन पार होशे अन्द हेसुर आव यहोशू ईटदुन.

17आंदरी कनान द्याश इन भेद ताकोमली कळा होती मूसा अंदुन, “ईतु टु, मतलब नेगेव इन दक्षिण टु आगतेला होगी, 18अदिक पहाळी द्याश दा होगकु आ द्याश इक नोळ कोमी कि ह्यांग आद, अदिक अदुर्दा ईरावाळेर लॉकुरी भी नोळी कि आंदुर ताकतवर आर या कमजोर, थ्वाळासा आर कि हापाळ, 19अदिक याता द्याश दा आंदुर बसुस्कु आर अद ह्यांग आद, वळ्लीद या बुरा, अदिक आंदुर ह्यांग ह्यांग वस्तीगोळ दा बसुस्कु आर, अदिक तम्बूगोळ दा ईरतार या गढ़ या किलागोळ दा ईरतार, 20अदिक अद द्याश ह्यांग आद, उपजाऊ आद या बंजर आद, अदिक अदुर्दा मार्र आव या हैलेच. अदिक नीव हिम्मत कटकु नळी, अदिक आ द्याश इन उपज दा टु येनारा हुडुकु भी तरेतीर.” अद समय पयला हण्ण काय अंगुर इन ईरोद.

21ईदुरसाटी आंदुर होटोदुर, अदिक सीन हेसुर इन आळी टु हुडुकु रहोब ताका, जो हमात इन हादी मा आद, पुरा द्याश इक नोळ माळकु अदुर्द भेद ताकोंडुर. 22आंदुर नेगेव इन दक्षिण टु आगतेला नळदुर, अदिक हेब्रोन ताका होदुर; अल अहीमन, शेशै, अदिक तल्मै हेसुर इन अनाक वंशीगोळ ईरतोगोर. हेब्रोन मिस्र अन्द सोअन टु येळ वर्ष पयले बसुस्कु आगीत. 23आग आंदुर एशकोल हेसुर इन नाला ताका होदुर, अदिक अल टु ऊंद डगाल अंगुर इन झुक्का अन सांगुळ मुर्द बुट्टुर, अदिक येढ्ढ मंळसा अदरी ऊंद कोल मा हिलगुसतेला नेगुकु होटोदुर; अदिक आंदुर अनारगोळ अदिक अंजीरगोळ दा टु भी थ्वाळा थ्वाळा तंदुर. 24इस्राएली अल टु अंगुर इन झुक्का मुर्दकु तंदीदुर, ई कारण आ जागा अन्द हेसुर एशकोल1 नाला ईटकु आत.

25चालीस दिन इन बाद्दा आंदुर आ द्याश इन भेद ताकोमकु वापस बंदुर. 26अदिक पारान आळी इन कादेश हेसुर इन जागा दा मूसा अदिक हारून अदिक इस्राएलीगोळ्द पुरा मंडली इन हात्ती पोहुचुसदुर; अदिक आंदरी अदिक पुरा मंडली इक बातणी कोट्टुर, अदिक आ द्याश इन काय आंदरी तोर्सदुर. 27आंदुर मूसा से ईद अनकु वर्णन माळदुर, “याता द्याश दा नी नामी कळीद अदुर्दा नाव होदेव; अदुर दा खराखुरा हाल अदिक शयद इन धारागोळ वाहुसताव, अदिक अदुर उपज दा टु ईवा हुव. 28लेकीन आ द्याश इन ईरावाळेर ताकतवर आर, अदिक अऊरव नगर गढ़वाळा आव अदिक हापाळ धोड्डेव आव; अदिक बाक नाव अल अनाक वंशीगोळी भी नोळदेव. 29नेगेव इन दक्षिण दा अमालेकी बसुस्कु आर; अदिक पहाळी द्याश दा हित्ती, यबूसी, अदिक एमोरी ईरतार; अदिक समुद्र अन्द किनारा किनारा अदिक यरदन गांगा अन्द किनारा मा कनानी बसुस्कु आर.”

30लेकीन कालेब मूसा अन मुंद प्रजा अन लॉकुरी सुंगा माळोद विचार देल अंदुन, “नाव ईगल्या चढ़ाई माळकु आ द्याश इक तान माळ कोंडेव; यतिकी नाम दा हिंग माळोद ताकत आद.” 31लेकीन जो गंळ्सुर आऊन सांगुळ होगीदुर आंदुर अंदुर, “आ लॉकुर मा चढ़ाई माळोद ताकत नाम दा हैलेच; यतिकी आंदुर नाम से ताकतवर आर.” 32अदिक आंदुर इस्राएलीगोळ मुंद आ द्याश इन यदुर भेद आंदुर ताकोंडीदुर ईद अनकु बेकार बातणी कोट्टुर, “आ द्याश यदुर भेद ताकोमली नाव होगीदेव हिंग आद, जो तान निवासीगोळी नुंग बुळतद; अदिक यास गंळ्सुर नाव अदुर दा नोळदेव आंदुर सप्पा च्या सप्पा हापाळ धष्टपुष्ट आर. 33बाक नाव अल नफीलगोळी, मतलब नफीली वंश वाळेर धष्टपुष्ट अनाक वंशीगोळी नोळदेव; अदिक नाव तान नजर दा आंदुर मुंद किळागोळ घाई कांळ्सकु बिळेव, अदिक हिंग अच आंदुर नजर दा मालूम बिळेव.”