गिनती 14

लॉकुर्द बळबुळसोद

1आग पुरा मंडली चिळ्लासली कुर्त; अदिक ईळ्ल्क तिम आ लॉकुर वर्लतेला अच ईत्तुर. 2अदिक सप्पा इस्राएली मूसा अदिक हारून मा बळबुळस्ली कुरतुर; अदिक पुरा मंडली आंदुर से अनली कुर्त, “भला आगाईत कि नाव मिस्र दा का सोतोगायदेव! या ई आळी दा का सोतोगायदेव! 3यहोवा नामी आ द्याश दा ओतकु येती तलवार देल कोनसुसोद चाहासतान? नाम आर्तेर अदिक बाल-बच्या रा लूट दा होटोदार; येन नाम साटी वळ्लीद हैलेच कि नाव मिस्र द्याश इक वापस होटोदेव?” 4बाक आंदुर आपस दा अनली कुरतुर, “बरी, नाव यारीकारा तान प्रधान माळाता, अदिक मिस्र अक वापस होटोगाता.” 5आग मूसा अदिक हारून इस्राएलीगोळ्द पुरा मंडली इन मुंद बाय इन भार देल बिद्दुर. 6अदिक नून उन पार यहोशू अदिक यपुन्ने अन पार कालेब, जो द्याश इन भेद ताकोमावाळेर दा टु ईरोर, तान तान फळक्या हरूकु, 7इस्राएलीगोळ्द पुरा मंडली से अनली कुरतुर, “या द्याश इन भेद ताकोमली नाव ईल अल वयाळकु बंदेव, अद अत्यंत वळ्लीद द्याश आद. 8अगर यहोवा नाम से प्रसन्न आन, रा नामी आ द्याश दा, यदुर दा हाल अदिक शयद इन धारागोळ वाहुसताव, पोहचुस्कु अदरी नामी कोट बुट्टान. 9सिर्फ ईट माळी कि नीव यहोवा अन्द खिलाप झगळा माळबाळी; अदिक न आ द्याश इन लॉकुर से अंजी, यतिकी आंदुर नाम रोट्टी ठहरूस्यार; सावली आंदुर म्याकुच टु हटुसेग्याद, अदिक यहोवा नाम सांगुळ आन; आंदुर से अंजबाळी.” 10आग पुरा मंडली चिळ्लास कुर्त कि ईंदरी कलगोळ होडी. आग यहोवा अन तेज भेंट माळोद तम्बू दा सप्पा इस्राएलगोळ मा प्रकाशमय आत.

लॉकुर साटी मूसा अन्द प्रार्थना

11आग यहोवा मूसा से अंदुन, “आ लॉकुर यागासताका नान तिरस्कार माळतेला ईत्तार? अदिक नान सप्पा आश्चर्यकर्म नोळदुर मा भी यागासताका नान मा विश्वास माळतीदील? 12ना आंदरी मरी देल कोन्नाईन, अदिक आंदुर्द निजी भाग टु आंदरी तेगु बुळाईन, अदिक नीन से ऊंद वंश पैदा माळाईन जो आंदुर से धोळ अदिक ताकतवर ईत्तीत.” 13मूसा यहोवा से अंदुन, आग रा मिस्री यार न्याड्या दा टु नी तान सामर्थ्य तोर्सकु आ लॉकुरी तेगुकु तंद्या ईद केळ्यार, 14अदिक ई द्याश इन ईरावाळेर से अंदार. आंदुर रा ईद केळ्यार कि नी जो यहोवा हुय, ई लॉकुर न्याड्या दा ईरत्या; अदिक प्रत्यक्ष कांळ्सत्या, अदिक नीन बादल आंदुर म्याकुच ठहरूसकु ईरतद, अदिक नी हागुल इक बादल इन खंभा दा, अदिक ईळ्ल्क इक बेक्‍की इन खंभा दा आगकु ईंदुर मुंद मुंद नळुत्या. 15ईदुरसाटी अगर नी ई लॉकुरी ऊंदा घन दा कोंद बुट्या, रा जो वंशगोळ नीन कीर्ति केळ्याव अव अंदाव, 16कि यहोवा आ लॉकुरी आ द्याश दा यदरी आव आंदरी कोळोद किर्या तिंदीदुन पोहचुस सकिदील, ई कारण आव आंदरी आळी दा कोंद बुटान. 17ईदुरसाटी ईग प्रभु उन सामर्थ्य अन महिमा नीन ईद अना हिसाब देल आगुल, 18कि यहोवा कोप माळदुर दा धीरजवन्त अदिक अति करूणामय आन, अदिक अन्याय अदिक अपराध इन माफ माळावाळा आन, लेकीन आव दोषी इक यातोदु प्रकार देल निर्दोष ठहरूसतिदील, अदिक पुर्वजगोळ्द अन्याय इन सजा आंदुर पारगोळ, नातुगोळ, अदिक पळ नातुगोळी कोळतान. 19ईग ई लॉकुर अन्याय इक तान धोळ करूणा अन अनुसार, अदिक ह्यांग नी मिस्र टु हुडुकु ईल ताका माफ माळतेला ईत्या हांगा ईग भी माफ माळ कोम.

20यहोवा अंदुन, नीन विनती इन अनुसार ना माफ माळतीन; 21लेकीन ईद खरा आद कि ना जीत्ता आईन, अदिक पुरा धरती ना प्रभु उन महिमा देल परिपुर्ण आदीत; 22आ सप्पा लॉकुर जो नान महिमा मिस्र द्याश दा अदिक आळी दा नोळदुर, अदिक नान माळ्द आश्चर्य कर्मगोळी नोळदुर मा भी हत्त घन नान परीक्षा माळदुर, अदिक नान मातगोळ मान्सीदील, 23ईदुरसाटी याता द्याश इन बारा दा ना आंदुर पूर्वजगोळ से किर्या तिंदीन, अदरी आंदुर यागलु नोळ सकतीदील, मतलब यास मुंदुर नान अपमान माळ्यार आंदुर दा टु याऊ भी अदरी नोळ सकतीदील. 24लेकीन ई कारण कि नान दास कालेब उन सांगुळ दुसरा अच आत्मा आद, अदिक आव पुरा रीति देल नान अनुकरण माळ्यान, ना आऊक आ द्याश दा यदुर दा आव होगकु बंदान पोहुचुसाईन, अदिक आऊन वंश आ द्याश इन अधिकारी आदीत. 25अमालेकी अदिक कनानी लॉकुर तराई दा ईरतार, ईदुरसाटी नाळ नीव तिर्गकु प्रस्थान माळी, अदिक क्याचाँद समुद्र अन्द हादी देल आळी दा होगी.

बळबुळसोद दण्ड

26बाक यहोवा मूसा अदिक हारून से अंदुन, 27ईद दुष्ट मंडली नान विरूद्ध नान मा बळबुळस्तेला ईरतद, अदरी ना यागास ताका सहन माळतेला ईराइन? इस्राएली जो नान मा बळबुळस्तेला ईरतार, आंदुर ईद बळबुळसोद ना केळीन. 28ईदुरसाटी आंदुर से अन कि यहोवा अन्द ईद वाणी आद कि नान जीवन इन किर्या जो मातगोळ नीव नान केळतेला अंदीर, ना अदुर्दा अनुसार नीम सांगुळ व्यवहार माळाईन. 29नीमव लाशगोळ ईदा आळी दा बिदकु ईत्ताव; अदिक नीम सप्पा मुंदुर दा टु ईप्पत साल ईनोर या अदुर से यक्कुल ऊमर इन यास मुंदुर आळकु आगीदुर, अदिक नान मा बळबुळसतोगोर, 30आंदुर दा टु यपुन्ने अन पार कालेब अदिक नून उन पार यहोशू उक बिटकु यावारा भी आ द्याश दा होग सकतीदील, यार बारा दा ना किर्या तिंदीन कि नीमी अदुर दा बसुसाईन. 31लेकीन नीम बाल-बच्यागोळ यार बारा दा नीव अंदीर, कि आंदुर लूट दा होटोदार, आंदरी ना आ द्याश दा पोहचुस बुळाईन; अदिक आंदुर आ द्याश इक अर्त कोंडार यदरी नीव तुच्छ जान्सीर. 32लेकीन नीम लॉकुर लाश ईदा आळी दा बिदकु ईत्ताव. 33“नीम बाल-बच्यागोळ आळी दा चालीस वर्ष ताका चरवाही माळतेला ईत्तार. अदिक आंदुर नीम्द पापगोळ्द दण्ड सहन माळ्यार, यागासताका नीम मय आळी दा सळुसालव. आगासताका आंदुर नीम्द व्यभिचार इन दण्ड भोगस्तेला ईत्तार.” 34यास दिन नीव आ द्याश इन भेद ताकोमतेला ईत्तीर, मतलब चालीस दिन, आंदुर गिनती इन अनुसार, हागुल हींद ऊंद साल, मतलब चालीस साल ताका नीव तान अन्याय इन दण्ड नेगुतेला ईत्तीर, आग नीव अर्त कोंडीर कि नान खिलाप आगोद ह्यांग आगतद. 35ना यहोवा ईद अन कोंडीन कि ई दुष्ट मंडली इन लॉकुर जो नान खिलाप जमा आग्यार ईदा आळी दा सोतोदार; अदिक ना हींगा माळाईन. 36आग याता गंळ्सुरी मूसा आ द्याश इन भेद ताकोमोर साटी कळीदुन, अदिक आंदुर वापस बंदकु आ द्याश इन बुरा बातणी कोटकु पुरा मंडली इक कुळकुळसोर साटी भळकुसीदुर, 37आ द्याश इन बुरा बातणी फैलुसावाळेर आ गंळ्सुर यहोवा अन्द महामारी देल आऊन मुंद सोतोदुर. 38लेकीन द्याश इन भेद ताकोमावाळेर गंळ्सुर दा टु नून उन पार यहोशू अदिक यपुन्ने अन्द पार कालेब येढ्ढु मुंदुर जीत्ता ईत्तार.

आ द्याश मा पयला आक्रमण

(व्यवस्थाविवरण 1:41-46)

39आग मूसा ई मातगोळ सप्पा इस्राएलीगोळी केळ्सदुन अदिक आंदुर हापाळ विलाप माळली कुरतुर. 40आंदुर व्हातर्या येदकु ईद अनतेला पहाळी इन म्याकुच येरली हतदुर कि नाव पाप माळेव; लेकीन ईग तयार आयेव, अदिक आ जागा दा होगाता यदुर बारा दा यहोवा वचन कोटीदुन. 41आग मूसा अंदुन, “नीव यहोवा अन्द आग्या अन्द उल्लंघन येती माळतीर? ईद सफल आगतीदील. 42यहोवा नीम सांगुळ हैलेच, येर बाळी, ईला रा दुश्मनगोळ से हारूसेदीर. 43अल नीम मुंद अमालेकी अदिक कनानी लॉकुर आर, ईदुरसाटी नीव तलवार देल कोंदकु आदीर; नीव यहोवा से तान मार्रा तिर्गुस बुटीर, ईदुरसाटी आव नीम सांगुळ ईरतीदील.” 44लेकीन आंदुर मूसा मा विश्वास माळीदील, आंदुर म्याकुच पहाळी दी होदुर, लेकीन मूसा अदिक यहोवा अन वाचा अन सन्दुक आंदुर सांगुळ होगीदील अदिक अद छावनी दा का ईत्त. 45आग अमालेकी अदिक कनानी जो आ पहाळी मा ईरतोगोर, आंदुर मा येरकु बंदुर, अदिक होर्मा नगर ताका आंदरी बडुतेला तंदुर.