गिनती 15

बलिदान इन नियम

1बाक यहोवा मूसा से अंदुन, 2इस्राएलीगोळ से अन कि याग नीव तान निवास इन द्याश दा पोहचुसीर, जो ना नीमी कोळतीन, 3अदिक यहोवा अन्द साटी येन होमबली, येन मेलबली, यातारा होमबली येरसी, चाहे अद विशेष मन्नत पुरा माळोद आगुल चाहे खुद इन इच्छा बलि इन आगुल, चाहे नीम ठहरूस्द समय दा टु आगुल, या चाहे गोसी-वस्ता चाहे म्यांडा-मर्रगोळ दा टु आगुल, यदुर देल यहोवा अन्द साटी सुखदायक सुंगध आगुल; 4जो मंळसा यहोवा अन्द साटी भेंट तरूल अद ऊंद चौथाई हीन याण्णा देल हचकु एपा अन्द हतवा अंश मैदा अन्नभेट माळकु येर्सेतीर, 5अदिक होमबली इन साटी हर ऊंद पाड्डा अन सांगुळ ऊंद चौथाई हीन अंगुर इन रास्सा अन्द पेयबली येर्सेत. 6अदिक म्यांडा अन्द हींद ऊंद तिहाई हीन1 याण्णा हचकु एपा अन्द येढ्ढ हतवा अंश मैदा अन्नभेट माळकु येर्सेत, 7अदिक अदुर्द पेयबली यहोवा अक सुखदायक सुंगध कोळावाळा ऊंद तिहाई हीन अंगुर इन रास्सा येर्सेत. 8अदिक याग नी यहोवा अक होमबलि या यातोदारा विशेष मन्नत पुरा माळोर साटी मेलबलि माळकु गोरा येरस्या, 9आग गोरा अक येरसावाळा अदुर सांगुळ आर्धा हीन याण्णा देल हचकु एपा अन्द मुर हतवा अंश मैदा अन्नभेट माळकु येरसुल. 10अदिक अदुर्द पेयबली आर्धा हीन अंगुर इन रास्सा येरसुल, अद यहोवा अक सुखदायक सुंगध कोळावाळा होमबली आदीत. 11“ऊंद ऊंद गोरा, या म्यांडा, या भेड़ इन पाड्डा, या मर्री इन पाड्डा अन्द सांगुळ ईदा रीति देल चढ़ावा येर्सकु आगुल. 12नीम बलिपशुगोळ्द याट गिनती आद, अदा गिनती इन हिसाब देल ऊंद ऊंद सांगुळ हिंग अच माळेतीर. 13यास मुंदुर द्याश इनोर आर आंदुर यहोवा अक सुखदायक सुंगध कोळावाळा होमबली येर्सा होती ई क्याल्सा ईदा रीती देल माळुल. 14अदिक यावारा परदेशी नीम सांगुळ ईरतान, या नीम यातोदारा पीढ़ी दा नीम न्याड्या यावारा ईरावाळा आन, अदिक आव यहोवा अक सुखदायक सुंगध कोळावाळा होमबली येरसोद चाहसुल, रा याता प्रकार देल नीव माळीर अदा प्रकार देल आव भी माळुल. 15मंडली इन साटी, मतलब नीम अदिक नीम सांगुळ ईरावाळेर परदेशी येढ्ढु मुंदुर साटी ऊंद अच विधी ईरूल; नीम पीढ़ी पीढ़ी दा ईद हमेशा अन विधी ठहरूसुल कि ह्यांग नीव आईर हांगा परदेशी भी यहोवा अन्द साटी ठहरूसतान. 16नीम अदिक नीम सांगुळ ईरावाळेर परदेशीगोळ साटी ऊंद अच व्यवस्था अदिक ऊंद अच नियम आद.”2

17बाक यहोवा मूसा से अंदुन, 18“इस्राएलीगोळी नान ईद वचन केळ्स, कि याग नीव आ द्याश दा पोहचुसीर यल ना नीमी ओयतीन, 19अदिक आ द्याश इन उपज इन अनाज तिनी, आग यहोवा अन्द साटी नेग्द भेंट येर्सतोगी. 20तान पयला काल्सद् हीट्ट इन ऊंद पापळी नेग्द भेंट माळकु यहोवा अन्द साटी येर्सेतीर; ह्यांग नीव केई दा टु नेग्द भेंट येरसीर हांगा अदरी भी येर्सेतीर. 21तान पीढ़ी पीढ़ी दा तान पयला काल्सद् हीट्ट दा टु यहोवा अक नेग्द भेंट येर्सोतोगेतीर.

22“बाक याग नीव ई सप्पा आग्यागोळ दा टु जो यहोवा मूसा अक कोटान यातोदु आग्या अन्द उल्लंघन गलती देल माळीर, 23मतलब याता दिशी टु यहोवा आग्या कोळली कुरतुन, अदिक मुंदळोद नीम पीढ़ी पीढ़ी दा आ दिशी टु आव यास आग्यागोळ मूसा अन्द द्वारा कोटान, 24अदुर्दा गलती देल माळ्द पाप मंडली इन बिना जान्सकु आगुल, रा पुरा मंडली यहोवा अक सुखदायक सुंगध कोळावाळा होमबलि माळकु ऊंद गोरा, अदिक अदुर सांगुळ नियम इन अनुसार अदुर्द अन्नभेट अदिक पेयबली येर्सुल, अदिक पापबलि माळकु ऊंद व्हात येर्सुल. 25आग याजक इस्राएलिगोळ्द पुरा मंडली इन साटी पाप ढाकसुल, अदिक आंदरी माफ माळकु आदीत; यतिकी आंदुर्द पाप गलती देल आत, अदिक आंदुर तान गलती इन साटी तान चढ़ावा, मतलब यहोवा अन्द साटी होमबली अदिक तान पापबलि आऊन मुंद येर्सुल. 26ईदुरसाटी इस्राएलीगोळी पुरा मंडली इन, अदिक आंदुर न्याड्या ईरावाळेर परदेशीगोळी भी, अद पाप माफ माळकु आदीत, यतिकी अद सप्पा लॉकुर्द अनजान दा आत.

27“बाक अगर यावारा मंळसा गलती देल पाप माळुल, रा आव ऊंद साल इन ऊंद मर्री पापबलि माळकु येर्सुल. 28अदिक याजक गलती देल पाप माळावाळा मंळसा अन साटी यहोवा अन्द मुंद पाप ढाकसुल; अत: ई पाप ढाकसा कारण आऊन आ पाप माफ माळकु आदीत. 29जो यावारा गलती देल येनारा माळुल, चाहे आव इस्राएलिगोळ दा द्याश इनव ईरूल, चाहे नीम न्याड्या परदेशी आगकु ईरतान, सप्पा मुंदुर साटी नीम ऊंद अच नियम ईरूल. 30लेकीन येन देशी येन परदेशी, जो मंळसा मुजोरी देल येनारा माळुल, आव यहोवा अन्द अनादर माळावाळा ठहरूस्यान, अदिक आ मंळसा तान लॉकुर दा टु ब्यार्र माळकु आगुल. 31आव जो यहोवा अन्द वचन तुच्छ जान्सतान, अदिक आऊन आग्या अक टालसावाळा हुन, ईदुरसाटी आ मंळसा निश्चय अलग माळकु आगुल; आऊन अन्याय आऊंदा ताल्ला मा बिद्दीत.”

आराम दिन इन नियम इन उल्लंघन

32याग इस्राएली आळी दा ईरतोगोर, आ दिनगोळ दा ऊंद मंळसा आराम इन दिन दा हुळ्ली आयतेला सिकदुन. 33अदिक यारी आव हुळ्ली आयतेला सिकदुन, आंदुर आऊक मूसा अदिक हारून, अदिक पुरा मंडली इन हात्ती ओतुर. 34आंदुर आऊक हवालात दा ईटदुर, यतिकी हिंग मंळसा से येन माळ पायजे अद प्रगट माळकु आगली ईरोद. 35आग यहोवा मूसा अंदुन, “आ मंळसा निश्चय कोंदकु आदान; पुरा मंडली इन लॉकुर छावनी इन व्हार्या आऊक कल्लगोळ होडुल.” 36ई प्रकार देल ह्यांग यहोवा मूसा अक आग्या कोटीदुन अदुर्दा अनुसार पुरा मंडली इन लॉकुर आऊक छावनी टु व्हार्या ओतकु आऊक कल्ल होळदुर, अदिक आव सोतोदुन.

याद माळसुसावाळा झालर

37बाक यहोवा मूसा से अंदुन, 38“इस्राएलिगोळ से अन कि तान पीढ़ी पीढ़ी दा तान कपळागोळ्द किनारा मा झालर हचेतीर, अदिक ऊंद ऊंद किनारा अन झालर मा ऊंद नीळा फीता हचेतीर; 39अदिक अद नीम साटी हिंग झालर ठहरूसुल, यदुर देल याग याग नीव अदरी नोळीर आग आग यहोवा अन्द पुरा आग्यागोळ नीमी याद होट बरूल; अदिक नीव अदुर्द पालन माळी, अदिक नीव तान तान मन अदिक तान तान नजर इन वश दा आगकु व्यभिचार माळतेला वयाळबाळी जसा माळतेला बंदीर. 40लेकीन नीव यहोवा अन्द सप्पा आग्यागोळी याद माळकु अदुर्द पालन माळी, अदिक तान परमेश्वर उन साटी पवित्र बन्सी. 41ना यहोवा नीम परमेश्वर हुईन, जो नीमी मिस्र द्याश टु तेगुकु तंदान कि नीम परमेश्वर ठहरूसुल; ना नीम परमेश्वर यहोवा हुईन.”