गिनती 16

कोरह, दातान अदिक अबीराम इन विद्रोह

1कोरह जो लेवी इन पळनातु, कहात उन नातु, अदिक यिसहार उन पार ईरोन, आव एलीआब उन पार दातान अदिक अबीराम, अदिक पेलेत उन पार ओन, 2ई मुरू रूबेनिगोळ देल मिलुस्कु मंडली इन ढाई सव इस्राएली प्रधान, जो सभासद अदिक नामी ईरोर, आंदरी सांगुळ हुळदुर; 3अदिक आंदुर मूसा अदिक हारून उन खिलाप दा येदकु नीदुरदुर, अदिक आंदुर से अनली कुरतुर, “नीव हापाळ माळदीर, ईग बस माळी; यतिकी पुरा मंडली इन ऊंद ऊंद मंळसा पवित्र आन, अदिक यहोवा आंदुर न्याड्या दा ईरतान; ईदुरसाटी नीव यहोवा अन्द मंडली दा धोळ पदवाळेर येती बन्सकु कुरतीर?” 4ईद केळकु मूसा तान बाय इन भार देल बिद्दुन; 5बाक आव कोरह अदिक आऊन पुरा मंडली से अंदुन, “व्हातर्या यहोवा तोर्स बुट्टान कि आऊनव याव आन, अदिक पवित्र याव आन, अदिक आऊक तान हात्ती कारू कोंडान; यारी आव खुद निवळुस कोंडान आऊका तान हात्ती कारू भी कोंडान. 6ईदुरसाटी, हे कोरह, नीव तान पुरा मंडली सांगुळ ईद माळी, मतलब तान तान धूपदान वळ्लीद माळी; 7अदिक नाळ अऊर दा बेक्‍की ईटकु यहोवा अन्द मुंद लुबान कोळेतीर, आग यारी यहोवा निवळुस कोंडान आवा पवित्र ठहरूस्यान. हे लेवीगोळा, नीव भी धोळ धोळ मातगोळ हेळतीर, ईग बस माळी.” 8बाक मूसा कोरह से अंदुन, “हे लेवीगोळा केळी, 9येन ईद नीमी स्यांळ्द मात हतेत्याद कि इस्राएल इन परमेश्वर नीमी इस्राएल इन मंडली से ब्यार्र माळकु तान निवास इन स्यावा माळली, अदिक मंडली इन मुंद नीदुरकु अदुर्द भी स्यावा चाकरी माळोर साटी तान हात्ती कारू कोंडान; 10अदिक नीनी अदिक नीन सप्पा लेवी वार्टुरी भी तान हात्ती कारू कोंडान? फिर भी नीव याजक पद इन भी खोजी आईर? 11अदिक ईदा कारण नी तान पुरा मंडली इक यहोवा अन्द खिलाप जमा माळ्द; हारून याव हुन कि नीव आऊन मा बळबुळस्तीर?”

12बाक मूसा एलीआब उन पार दातान अदिक अबीराम उक बुलावा कळुदुन; अदिक आंदुर अंदुर, “नाव नीन हात्ती बरालेव. 13येन ईद ऊंद स्यांळ्द मात हुन कि नी नामी हिंग द्याश टु यदुर दा हाल अदिक शयद इन धारागोळ वाहुसताव ईदुरसाटी तेगुकु तंद्या, कि नामी आळी दा कोंद बुट्या, बाक येन नी नाम म्याकुच शासक भी बन्सकु अधिकार जतुसत्या? 14बाक नी नामी ईत्ता द्याश दा यल हाल अदिक शयद इन धारागोळ वाहुसताव पोहुचुसीदील, अदिक न नामी केईगोळ अदिक अंगुर इन बेलीगोळ्द अधिकारी माळ्द. येन नी ई लॉकुर्द कण्णगोळ दा गागरा हाक्या नाव रा बरालेव.”

15आग मूसा अन कोप हापाळ भळकुस्त, अदिक आव यहोवा से अंदुन, “आ लॉकुर्द भेंट दी नजर माळबाळ. ना रा आंदुर से ऊंद गदा ताकोंडीदील, अदिक न आंदुर दा टु यारदारा नुसक्यान माळदीन.” 16आग मूसा कोरह से अंदुन, “नाळ नी तान पुरा मंडली इक सांगुळ हुडुकु हारून उन सांगुळ यहोवा अन्द मुंद हाजिर आगेत; 17अदिक नीव सप्पा मुंदुर तान तान धूपदान हुडुकु अऊर दा लुबान कोळेतीर, बाक तान तान धूपदान जो सप्पा मुंदुर सांगुळ ढाई सव ईत्तार यहोवा अन्द मुंद ओयेतीर; विशेष माळकु नी अदिक हारून तान तान धूपदान ओयेतीर.” 18ईदुरसाटी आंदुर तान तान धूपदान हुडुकु अदिक अऊर दा बेक्‍की ईटकु अऊर मा लुबान हाकदुर; अदिक मूसा अदिक हारून उन सांगुळ भेंट माळोद तम्बू उन द्वार मा नीदुरदुर. 19अदिक कोरह पुरा मंडली इक आंदुर खिलाप भेंट माळोद तम्बू उन द्वार मा जमा माळ बुट्टुन. आग यहोवा अन्द तेज पुरा मंडली इक कांळ्सकु बिळ्त.

20आग यहोवा मूसा अदिक हारून से अंदुन, 21“आ मंडली इन न्याड्या दा टु अलग आगेगी कि ना आंदरी घळी तिमुर दा भस्म माळ बुळाईन.” 22आग आंदुर बाय इन भार देल बिदकु अनली कुरतुर, “हे ईश्वर, हे सप्पा प्राणीगोळ्द आत्मा नव परमेश्वर, येन ऊंद गंळ्स उन पाप इन कारण नीन सिट्ट पुरा मंडली मा ईत्तीत?” 23यहोवा मूसा से अंदुन, 24“मंडली इन लॉकुर से अन कि कोरह, दातान, अदिक अबीराम उन तम्‍बूगोळ आसपास टु हटुसेगी.”

25आग मूसा येदकु दातान अदिक अबीराम उन हात्ती होदुन; अदिक इस्राएल नोर श्याणा लॉकुर आऊन हिंद होदुर. 26अदिक आव मंडली इन लॉकुर से अंदुन, “नीव आ दुष्ट मंळसागोळ ड्यारा अन हात्ती टु वडगुसेगी, अदिक आंदुर्द यातोदु चिज मुटबाळी, ईलारा हिंग आगबाळुल कि नीव भी आंदुर्द सप्पा पापगोळ दा फसुसकु मिटुसेगी.” 27ईद केळकु आंदुर कोरह, दातान अदिक अबीराम उन तम्बूगोळ्द आसपास टु वडगुसेदुर; लेकीन दातान अदिक अबीराम होटकु तान हिंग्सुर, पारगोळ, अदिक बाल-बच्यागोळ सांगुळ तान तान ड्यारा अन्द द्वार मा नीदरेदुर. 28आग मूसा अंदुन, “इदुर देल नीव अर्त कोंडीर कि यहोवा नानी कळुदुन कि ईव सप्पा क्याल्सा माळाईन, यतिकी ना तान इच्छा देल येनु माळीदिल. 29अगर आ मंळसागोळ मृत्यु मात्त सप्पा मंळसागोळ घाई आगुल, अदिक आंदुर दण्ड सप्पा मंळसागोळ घाई आगुल, आग जान्सी कि ना यहोवा अन्द दी टु कळुकु आगीदील. 30लेकीन अगर यहोवा तान अनोखा शक्ति प्रकट माळुल, अदिक धरती तान बाय किसुकु आंदरी, अदिक आंदुर्द सप्पा येनारा नुंग कोमुल, अदिक आंदुर जीत्ता जी अधोलोक दा होगकु बिळुल, रा नीव समसेगी कि ई मंळसागोळ यहोवा अन्द अपमान माळ्यार.” 31आव ई सप्पा मातगोळ अंद अच बुट्टीदुन कि धरती आ लॉकुर्द काल इन ल्‍यालमा टु हरदोत; 32अदिक धरती तान बाय तेर्द बुळ्त अदिक आंदुर अदिक आंदुर्द मान्ना अन्द सामान, अदिक कोरह अन सप्पा मंळसागोळ अदिक आंदुर्द सप्पा धन-संपत्ती इक भी नुंग कोम्त. 33अदिक आंदुर अदिक आंदुर्द पुरा मान्न मकान जीत्ता अच अधोलोक दा होगकु बित्त; अदिक धरती आंदरी मुच्च बुळ्त, अदिक आंदुर मंडली इन न्याड्या दा टु नष्ट आगेदुर. 34अदिक यास इस्राएली आंदुर नाकु दी ईरोर आंदुर आंदुर्द किटरोद केळकु ईद अनतेला ओळदुर कि ईलारा धरती नामी भी नुंग बाळुल. 35आग यहोवा अन्द हात्ती टु बेक्‍की होळ्त, अदिक आ ढाई सव लुबान येरसावाळेरी भस्म माळ बुळ्त.

धूपदान

36आग यहोवा मूसा से अंदुन, 37“हारून याजक उन पार एलीआजर से अन कि आ धूपदानगोळी बेक्‍की दा टु नेगु कोमुल; अदिक बेक्‍की इन अंगारागोळी आतल्या ढकलुस बुळुल, यतिकी अव पवित्र आव. 38यार पाप माळकु तांदा जीव इन हानि माळ्यार, आंदुर धूपदानगोळ्द पत्री पीट्स पीट्सकु माळकु आगुल यदुर देल अव वेदी इन मळुसोद क्याल्सा दा बंदव; यतिकी आंदुर यहोवा अन्द मुंद ईटीदुर, ईदुर देल अव पवित्र आव. ईत्ता प्रकार देल अव इस्राएलिगोळ साटी ऊंद निशान ठहरूसीत.” 39ईदुरसाटी एलीआजर याजक आ पीतळा अन धूपदानगोळी, यऊर दा आ होद्द मंळसागोळ लुबान येर्सीदुर, हुडुकु अऊर पत्री पीट्सकु वेदी इन मळुसोर साटी माळसुस बुट्टुर, 40कि इस्राएलीगोळी ई मात इन याद ईरूल कि यावारा दुसरा, जो हारून इन वंश इन ईला ईरूल, यहोवा अन्द मुंद लुबान येर्सली हात्ती होगबाळुल, हिंग आगबाळुल कि आव भी कोरह अदिक आऊन मंडली इन घाई नष्ट आगेगुल, ह्यांग कि यहोवा मूसा अन द्वारा आऊक आग्या कोटीदुन.

हारून उन दि टु लॉकुर्द रखवाली

41दुसरा दिशी इस्राएलिगोळ्द पुरा मंडली ईद अनकु मूसा अदिक हारून मा बळबुळस्ली हतदुर कि यहोवा अन्द प्रजा अक नीव कोंद बुटीर. 42अदिक याग मंडली इन लॉकुर मूसा अदिक हारून उन खिलाप जमा आगोर, आग आंदुर भेंट माळोद तम्बू दी नजर माळदुर, अदिक नोळदुर कि बादल आंदरी होच बुटाद, अदिक यहोवा अन्द तेज कांळ्सेत्याद. 43आग मूसा अदिक हारून भेंट माळोद तम्बू उन मुंद बंदुर, 44आग यहोवा मूसा अदिक हारून से अंदुन, 45“नीव आ मंडली इन लॉकुर न्याड्या दा टु हटुसेगी कि ना आंदरी घळी तीमुर दा भस्म माळ बुळाईन.” आग आंदुर बाय इन भार देल बिद्दुर. 46अदिक मूसा हारून से अंदुन, “धूपदान इक हुडुकु अदुर दा वेदी मा टु बेक्‍की ईटकु अदुर मा लुबान हाक्क, मंडली इन हात्ती फुर्ताई देल होगकु आंदुर साटी पाप ढाक्स यतिकी यहोवा अन्द कोप यक्कुल भळकुसकु आद, अदिक मरी फैलुसली हत्यात.” 47मूसा अन्द आग्या अन्द अनुसार हारून धूपदान हुडुकु मंडली इन न्याड्या दा ओळतेला होदुन; अदिक ईद नोळकु कि लॉकुर दा मरी फैलुसली हत्याद, आव लुबान होत्‍ताकु लॉकुर साटी पाप ढाक्सदुन. 48अदिक आव मुर्दागोळ अदिक जीत्ता मंळसागोळ न्याड्या दा नीदुरदुन; आग मरी रूकसेत. 49अदिक जो कोरह अन्द सांगुळ भागी आगकु सोतोगीदुर, आंदरी बिटकु जो लॉकुर ई मरी देल सोतोदुर आंदुर चौदा हजार येळ सव ईरोर. 50आग हारून भेंट माळोद तम्बू उन द्वार मा मूसा अन्द हात्ती वापस बंदुन, अदिक महामारी रूकसेत.