गिनती 17

हारून उन छळी

1आग यहोवा मूसा से अंदुन, 2“इस्राएलिगोळ से मातगोळ माळकु आंदुर पूर्वजगोळ्द घराना अन्द अनुसार, आंदुर सप्पा प्रधानगोळ हात्ती टु ऊंद ऊंद छळी ताकोम; अदिक आ हन्नेळ छळीगोळ दा टु ऊंद ऊंद मुख्य गंळ्स उन हेसुर लिख्स, 3अदिक लेवीगोळ्द छळी मा हारून उन हेसुर लिख्स. यतिकी इस्राएलिगोळ पूर्वजगोळ्द घराना अन्द ऊंद ऊंद मुख्य गंळ्स उन ऊंद ऊंद छळी ईत्तीत. 4अदिक आ छळीगोळी भेंट माळोद तम्बू दा वाचा अन सन्दुक इन मुंद, यल ना नीम लॉकुर से मुलाकात माळतीन ईट बुळ. 5अदिक याता गंळ्स उक ना निवळुसाईन आऊन छळी दा डगालीगोळ वळदाव; अदिक इस्राएली जो नीम मा बळबुळस्तेला ईरतार, अद बळबुळसोद ना तान म्याकुच टु दुर माळाईन.” 6अत: मूसा इस्राएलगोळ से ईद मात अंदुन; अदिक आंदुर सप्पा प्रधानगोळ तान तान साटी, तान तान पूर्वजगोळ घराना अन अनुसार, ऊंद ऊंद छळी आऊक कोट्टुर, ई प्रकार देल हन्नेळ छळीगोळ आदव; अदिक आंदुर छळी दा हारून उन छळी भी ईरोद. 7आ छळीगोळी मूसा वाचा अन सन्दुक इन तम्बू दा यहोवा अन्द मुंद ईट बुट्टुन. 8दुसरा दिशी मूसा वाचा अन सन्दुक इन तम्बू दा होदुन; रा येन नोळदुन कि हारून उन छळी जो लेवी इन घराना अन साटी ईरोद अदुर दा डगालीगोळ वळदाव, मतलब अदुर दा डगालीगोळ हतदव, अदिक फूल भी फूलुसदव, अदिक हण्ण बादाम भी हतकु आव. 9आग मूसा आ सप्पा छळीगोळी यहोवा अन्द मुंदु टु तेगुकु सप्पा इस्राएलगोळ हात्ती ओतुन; अदिक आंदुर तान तान छळी अर्तकु हुडु कोंडुर. 10बाक यहोवा मूसा से अंदुन, “हारून उन छळी इक वाचा अन सन्दुक इन मुंद मात्त ईट बुळ, कि ईद आ दंगा माळावाळेर साटी ऊंद निशान बन्सकु ईटकु ईरूल कि नी आंदुर्द बळबुळसोद जो नान खिलाप आगतेला ईरतद भविष्य दा रोक्सकु ईटुल, हिंग आगबाळुल कि आंदुर सोतोगुल.” 11अदिक मूसा यहोवा अन्द ईद आग्या अन्द अनुसार अच माळदुन.

12आग इस्राएली मूसा से अनली कुरतुर, “नोळ नाम जीव होळावाळा आद, नाव नष्ट आगतेला, नाव सप्पा च्या सप्पा मुंदुर नष्ट आगतेला होगेतेव. 13जो यावारा यहोवा अन्द निवास इन हात्ती होगतान आव कोंदकु आगतान. रा येन नाव सप्पा च्या सप्पा मुंदुर सोतोदेव.”